Müsavat Partiyası Mərkəzi İcra Aparatının rəhbəri Arif Hacılı “Yeni Müsavat”a müsahibə verib. Moderator.az onunla müsahibəni təqdim edir:

- Arif bəy, Müsavat Partiyasının qurultayı Azərbaycan siyasətinin üzdə olan məsələlərindəndir. Siz partiya başqanı olmağa iddialısınız. Proses necə davam edir?

- Hesab edirəm ki, Müsavat Partiyasının başqanlığı ilə bağlı məsələnin bu gün Azərbaycan siyasətinin baş mövzularından olması olduqca təbiidir. Bu, Müsavat Partiyasının Azərbaycan cəmiyyəti üçün nə qədər önəmli siyasi təşkilat olduğunu təsdiq edir. Bəllidir ki, bir neçə ildir hakimiyyət Müsavata qurultay keçirməklə bağlı problemlər yaradır. Ümid edirəm ki, biz bu problemləri aşa biləcəyik.

- Sizcə, əsas rəqibləriniz kimlər ola bilər?

- Partiya başqanlığı uğrunda ciddi mübarizənin gedəcəyini düşünmürəm. Hesab edirəm ki, Müsavat Partiyasındakı gözlənilən başqan seçkiləri partiyanın, eləcə də Azərbaycanın siyasi həyatında ciddi hadisə olacaq. Ancaq nə dostlarımızın məyus olmasına, nə də opponentlərimizin sevinməsinə heç bir əsas olmayacaq. Müsavat Partiyası yeniləşmiş qaydada, yeni Divanla, yeni Məclislə, yeni başqanla, yeni Nəzarət Təftiş Komissiyası ilə yenə Azərbaycan siyasətinin ön sırasında olacaq. Şübhəsiz ki, Müsavat Partiyası rəhbərliyinə yeni qüvvələr gələcək, bu da partiyanın fəaliyyətinin yeni mərhələsini başladacaq. Ancaq hər hansı kataklizmlərin olacağı qənaətində deyiləm. Müsavat Partiyası daxilində rəqiblərə gəldikdə isə mənim Müsavat daxilində rəqibim yoxdur. Partiyadakı bütün şəxslər bizim yaxın dostlarımız və silahdaşlarımızdır.

- Yeni qüvvələr dedikdə kimləri nəzərdə tutursunuz - indiyə qədər Müsavat Partiyasında olub rəhbərlikdə təmsil olunmayan şəxsləri, yoxsa sizin başqanlığınıza görə Müsavata gələcək yeni qüvvələri?

- Mən Müsavat Partiyasının potensialını yetərincə ciddi potensial hesab edirəm. Müsavat Partiyasının on minlərlə üzvü var. 8 ilə yaxın bir zamanda Müsavat Partiyasının qurultayının keçirilməməsi təbii ki, bir sıra şəxslərin partiyada fəaliyyətini zəiflətməsinə səbəb olub. Onlardan bəziləri hətta Azərbaycanı tərk edib. Hesab edirəm ki, bu qüvvələrin yenidən partiyaya, hətta partiya rəhbərliyinə cəlb edilməsi Müsavatı gücləndirə, idarəçiliyi daha da yaxşılaşdıra bilər. Ona görə də başqan olsam, bu istiqamətdə də fəaliyyətim olacaq. Ancaq Müsavatla bağlı bütün prosesləri başqan seçkilərinə fokuslaşdırmağın da əleyhinəyəm. Çünki partiyanın qurultayında yeniləşmə yalnız başqanlığa aid olmayacaq. Partiyanın bütün strukturları yeniləşəcək. İnanıram ki, bu prosesdə Müsavat Partiyası bütün potensialından yararlana biləcək. Fikrimcə, partiyanı indiki vəziyyətə gətirən insanlarla bərabər, Müsavata sonradan daxil olmuş, son illər xeyli siyasi təcrübə toplamış, öz siyasi fəaliyyətləri ilə həm ölkədə demokratiyanın inkişafına, həm də partiya strukturlarının möhkəmlənməsinə xidmət etmiş şəxslərin də partiya rəhbərliyində təmsil olunması Müsavat Partiyasının fəaliyyətinin daha çevik və dinamik olması ilə nəticələnər.

- Bir qədər zamanı qabaqlayıb düşünək ki, siz artıq Müsavat başqanısınız. Bu halda Müsavat Partiyasının Milli Şuradakı yeri və rolu hər hansı formada dəyişəcəkmi?

- Müsavat Partiyası demokratik qaydalarla idarə olunan bir siyasi qurumdur. Bu gün də mənim Müsavat Partiyasının siyasətinin müəyyənləşməsində iştirakım yetərincə ciddidir. Düşünmürəm ki, mən Müsavat Partiyasının başqanı olduqdan sonra partiyanın siyasətinə təsir imkanlarım həlledici surətdə dəyişəcək. Təbii, müəyyən dəyişikliklər ola bilər. Ancaq Müsavat hər hansı bir siyasi xadimin, hətta o, başqan olsa belə, şəxsi düşüncələri və iradəsi ilə idarə olunmur. Müsavat Partiyası oturuşmuş, 100 ildən artıq tarixi olan bir partiyadır. Müsavatın ideoloji-siyasi xətti var. Bu ideoloji-siyasi xəttə uyğun fəaliyyət partiyanın qurultayından sonra da davam etdiriləcək, qəbul olunan qərarlar da həmin siyasətə uyğun olacaq.

- Eks-spiker Rəsul Quliyevin sizin başqan namizədliyinizlə bağlı açıqlaması var. O, sizinlə İsa Qəmbər arasında müqayisə aparılmasının mümkünsüzlüyünü deyib. Sizin Rəsul Quliyevə cavabınız nədir?

- Bir daha bildirirəm ki, Müsavat Partiyasında olan şəxslərin hamısı mənim dostlarım və silahdaşlarımdır. İsa Qəmbərlə təxminən 25 ilə yaxındır ki, birgə siyasi fəaliyyət göstəririk. Azərbaycan siyasətində siyasi mövqeləri bu qədər uzun illər ərzində daim oxşar və ya eyni olan siyasətçi tapmaq mümkün deyil. Ona görə də hesab edirəm ki, Rəsul Quliyev bu məsələ haqqında danışaraq ciddi səhvə yol verib. Mən İsa Qəmbəri həmişə özümdən daha ciddi siyasətçi hesab etmişəm. Onun mövqeyini, bütün seçkilərdə onun namizədliyini birmənalı şəkildə müdafiə etmişəm. Yəni burada başqa səbəblər yoxdur. İkincisi də hesab edirəm ki, İsa Qəmbər Müsavat Partiyasının başqanı olmadığı dövrdə də biz öz siyasi fəaliyyətimizi elə indi olduğu kimi birlikdə davam etdirəcəyik.