Siyasi bitərəf bir şəxs olduğum üçün AXCP-Müsavat arasında yeri düşdü-düşmədi yaşananlara, söz davalarına qarışmaq niyyətində deyiləm.

Amma eyni zamanda, son günlər sosial şəbəkələrdə, facebook səhifələrində ciddi müzakirə mövzusuna çevrilən, bəzi hallarda isə əxlaqi dəyərləri, bütün əndazəni aşıb keçən bir məsələyə də biganə qala bilmirəm.

Həmin məsələ də bundan ibarətdir ki, hakim Yeni Azərbaycan Partiyasından (YAP) olan millət vəkili Aydın Mirzəzadənin sabiq deputat həmkarı, müsavatçı İkram İsrafil tərəfindən övladının toyuna dəvət edilməsi bəzi müxalifətçilərin, xüsusilə, AXCP-çilərin ciddi qınağına, təpkisinə və təhqiraqmiz ittihamlarına səsəb olub.

Onların iddiasınca, Aydın Mirzəzadənin, YAP-iqtidar təmsilçisinin müxalifətçinin toyunda iştirakı qəbuledilməz və iqtidara satqınlıq deməkdir... Adamı sadəcə, heyrət bürüyür... 

Şəxsən mən xeyir-şər işlərinin siyasətə bulaşdırılmasını heç bir halda düzgün və normal hesab etmirəm...

Bu günə kimi bir çox iqtidar nümayəndələrinin, hakim partiya-YAP təmsilçilərinin xeyir-şər məclislərində müxalifətə yaxın olan simaların iştirak etdiyinin şahidi olmuşam. Eyni zamanda, müxalifət liderlərinin, həmin düşərgəyə mənsub olan insanların xeyir-şər məclislərində də iqtidaryönlülərin iştirakına rast gəlmişəm...

Özüm iştirak etməsəm və şahidi olmasam da, Milli Şuranın sədri Cəmil Həsənlinin övladlarından birinin toyunda - deputat olduğu zamanlar - 2000-ci illərin ortaları idi - tanınmış iqtidaryönlülərin, hakim partiya təmsilçilərinin iştirak etdiyini eşitmişəm.

Bunu orada iştirak edənlər özləri söyləyiblər. Həmçinin, orada AXCP sədri Əli Kərimli və digər cəbhəçi bəylər də iştirak ediblər. İndi buna görə Cəmil müəllim və ya YAP-çılar dara çəkilməlidirlərmi?

Burada qəbahətli, əxlaqa, o cümlədən, siyasi əxlaqa zidd olan nə var və nə ola bilər ki? Kimsə Aydan, Marsdan gəlməyib ki? Hamı-hamımız bu torpaqda doğulub-doğulmuşuq və bu torpaqda da dəfn olunacaq-olunacağıq... Heç kim heç yerə gedəsi də deyil...

İndi,  yuxarıda da qeyd etdiyim kimi,  Müsavat Partiyasının tanınmış simalarından olan sabiq millət vəkili,  hörmətli İkram İsrafilin övladının toyunda çox dəyərli və ləyaqətli insan, siyasəti heç zaman əxlaqi dəyərlərə qarışdırmayan, insani keyfiyyətləri ilə hamının rəğbətini qazanan YAP-çı deputat Aydın Mirzəzadənin iştirakı nəyə görə bu qədər hay-həşirə, səs-küyə, təhqiramiz ittihamlara səbəb olmalıdır?

İkram bəy dəvət edib, Aydın müəllim də həmin dəvəti səmimi şəkildə qəbul edərək bir azərbaycanlı-türk övladının xoş günündə, toy mərasimində iştirak edib.

Burada qəbahət, günah, əxlaqsızlıq sayıla biləcək nə var? Xeyirdə, Allah uzaq etsin, şərdə iştirak nə vaxtdan günah sayılıb, ittiham, qınaq mövzusu olub? Əksinə, hesab edirəm ki, bu, alqışlanmalı və təqdir olunmalı bir məqamdır... 

Yenə deyirəm, biz bu vətəndən heç yerə köçəsi deyilik və bu baxımdan, siyasətlə, siyasi mübarizə ilə milli-əxlaqi dəyərləri bir-birinə qarışdırmayıb, qarşılıqlı anlaşma və güzəş mühitində yaşamağı öyrənməli və bunu bacarmalıyıq.

Şəxsən, bu addımı ilə həm İkram bəy, həm də uzun illərdən bəri tanıdığım, dostluq etdiyim Aydın müəllim bir daha gözümdə ucaldı. Nə yaxşı ki, onlar milli-əxlaqi, milli-mənəvi dəyərləri hər şeydən, hətta, bəziləri tərəfindən çirkab mənbəyi hesab edilən siyasətdən üstün tuta bildilər, gözəl nümunə ortaya qoydular...

Yeri gəlmişkən, təxminən 1997-ci ilin qış ayları olardı, - o zaman hələ 4-5 yerə bölünməmiş AXCP Dilarə Əliyeva adına Qadın Hüquqlarının Müdafiəsi Cəmiyətinin köhnə binasında fəaliyyət göstərirdi,- həmin vaxt Dağlıq Qarabağ münaqişəsi ilə bağlı supergüclər tərəfindən Azərbaycana növbəti dəfə sərf etməyən hansısa tələb, şərt irəli sürülmüşdü və bununla bağlı o vaxt hələ AXCP sədrinin birinci müavini və millət vəkili olan Əli Kərimlinin təşəbbüsü, sədrliyi ilə Dəyirmi Masa təşkil olunmuşdu.

Həmin tədbirə də o zamankı Demokratik Konqresin  üzvləri, partiya liderləri, o cümlədən, hakim partiyanın və Prezident Administrasiyasının (PA) təmçilçisi kimi Aydın müəllim (Aydın müəllim həmin vaxt deputat deyildi və PA-nın ictimai-siyasi şöbəsində sektor müdiri işləyirdi) dəvət olunmuşdu.

Həmin tədbirdə Aydın müəllim də çıxış edərək öz fikrini bildirmişdi.

Tədbirdən əvvəl və sonra özüm şahid idim ki, Əli Kərimli Aydın müəllimlə Dəyirmi Masada iştirakı səbəbindən nə qədər mehribancasına görüşdü və təşəkkürünü bildirdi...

Əslində belə də olmalıydı və olmalıdır. Milli-mənəvi dəyərlər, Vətən, Dövlət, Millət məsələsində hamı bir olmalıdır, siyasi baxışlarını buraya qatmamalıdır!

Hörmətli cəbhəçi bəylər, Əli Kərimliçilər də bunu qəbul etsələr, daha yaxşı olar!