Türkiyənin Azərbaycandakı keçmiş səfiri Hulusi Kılıç Moderator.az saytına ötən həftəki açıqlamasında Rusiya rəhbərliyinə anlaşıqlı bir mesaj verdi: Gəlin Suriyadakı kimi Qarabağda da birlikdə ədalətli sülh əldə edək. Hulusi bəy həmin çağırışını saytımızın 7 illiyi münasibətilə tərtiblədiyimiz süfrə başında bizimlə çörək kəsərkən də səsləndirdi. Dəyərli dost diplomatımıza “Sağ olun! Kılıçınız(qılıncınız) kəskin olsun”-deyirik...

Zaman-zaman eyni mesajı açıq-gizli şəkildə son illər dost kimi qucaqlaşıb görüşdüyünüz Türkiyə lideri R.T. Ərdoğan da sizə anladıb...

İndi əsas məsələ Rusiya baş diplomatı Lavrovun Ermənistana, Qarabağ separatçılarına son dəstək-mesajından sonra Türkiyədən gələn çağırışın ünvanına çatması və hədəfə vurmasıdır.  Kreml, Rusiya lideri Vladimir Putin bu müraciəti sözün əsl mənasında anlasa da, inanmırıq ki, buna canla-başla “hə” desin... Təəssüf ki, Moskva nə qədər Paşinyanı bəyənməsə belə, tarixi kölə “qardaş”ı, tülkü xislətli erməniləri əldən buraxmaq istəmir. Odur ki, Hulusi bəyin mesajına qüvvət verib Rusiya prezidenti Putinə bir neçə xatırlatma etmək yerinə düşər.

Yoldaş Putin, əvvəla, əgər doğrudan da, lap Qərbin diktatura kimi təqdim etdiyi bir sistemdə Rusiya xalqının gerçək sabitlik, rifah halında yaşamağını arzulayırsınızsa, buna çalışırsınızsa( hərçənd bir sıra rus ziyalı və keçmiş hərbçləri, ordu və “KQB” generalları sizin siyasətinizi bəyənmir, sizi ABŞ-la, Qərblə, super güclərlə birgə Rusiyanı tamamilə çökdürməyə, parçalamağa xidmət etdiyinizi iddia edirlər), onda, lütfən, 4-5 dəqiqəlik vaxtınızı ayırıb xatırlatmalarımıza diqqət edin...

Birincisi, “Rusiya xalqı” dedikdə yalnız rus xalqı nəzərdə tutulmur. Ölkənizin ərazisinin böyük bir hissəsi müsəlman, türk mənşəli xalqların respublika, diyar və vilayətləri tutur. Son məlumatlara görə, Rusiya əhalisinin təxm. 20-25 faizini böyük əksəriyyyəti türk mənşəli olan müsəlmanlar təşkil edir. Yəni ölkədə bəzi məlumatlara görə, 30 milyona yaxın müsəlman, türk yaşayır, onların sayı da getdikcə artır. Əksinə, 1991-ci ildən bəri sırf rus milləti arasındakı artım sürətlə azalır. Və açığını deyək ki, son 20-30 ildə Rusiya əhalisi arasındakı az-çox artımın böyük hissəsi də məhz müsəlman, türk kişilərinin hesabına baş verir. Ağlı başında olan rus qadınları əyyaşlığa qurşanmış rus kişisindənsə, Azərbaycan, Anadolu türkü, çeçen, tatar, avar, türkmən, qazax və s. kişilərlə ailə qururlar. Və bu minvalla gənc nəsil sürətlə türkləşir, müsəlmanlaşır. Doğrudur, siz bu amilləri qiymətləndirir və çıxışlarınızda Rusiyadakı müsəlman, türk xalqlarının varlığına böyük dəyər verir, dini, milli azadlıqlar sayəsində mütərəqqi sərəncam və göstərişlər imzalayırsınız. Müsəlmanlara dini azadlıqlar verilməsi məsələsində hətta bir sıra müsəlman adlanan ölkələri, o cümlədən Azərbaycanı da ötmüsüz. Məsələn, hicab məsələsində. Rusiyanın bir sıra regionlarında məktəblərdə qız şagird və müəllimələrin hicab bağlamasına icazə verilir... Amma bütün bunlar qurmaq istədiyiniz gerçək Avrasiya Evi, Birliyindən ötrü hələ yetərli deyil. Türk, müsəlman xalqlarının rəğbətini qazanmaq üçün daha tutarlı, strateji addımlar atmaq lazımdır ki, bu da məhz Azərbaycan, Türkiyə siyasətində Çar Rusiyası dövründən bəri, eləcə də Sovetlər dönəmində yol verilmiş səhvləri aradan qaldırmaqdan ibarətdir... Onu da nəzərinizə çatdıraq ki, sırf rus adlanan xalqın özü də tarixən türk, müsəlman xalqlarıyla qaynayıb-qarışıb. Sizin Puşkin, Dostoyevski kimi dahi yazarlarınız, Kutuzov, Suvorov kimi sərkədələrinizin də türk-müsəlman mənşəli olması barədə faktlar var... Burada rus, slavyan xalqların azı 3 əsr boyunca türk mənşəli müsəlman Qızıl Ordu kimi dövlətlərin himayəsi altında yaşadığını da nəzərə almaq gərəkdir... Hətta bəzi araşdırmaçılar türklərin və rusların kökünün Nuh peyğəmbərin iki ayrı oğluna bağlı olduğunu iddia edirlər. Və bu baxımdan da, eləcə də tarixi qonşuluq, əlaqələr baxımından Rusiya dövlətlərinin də zaman-zaman Türkiyə, Azərbaycan və digər türk, müsəlman xalqlarına qarşı işğalçılıq siyasətini kənara qoysaq, ortada bir gerçək var. Nə ruslar, nə də türklər dəniz-pirat(quldur) sivilizasiyasına mənsub, emosiyasız, hissiyyatsız, yalnız maddi maraqlarını düşünən ingilis, fransız, holland və s. kimi Qəb xalqlarına qarşı yaxınlıq göstərə bilmir. Arada olan bütün müharibələrə, işğallara, istismara rəğmən bu gün də rus qadınları digərlərindən, hətta kölə “qardaş” ermənilərdən daha çox türk, Azərbaycan kişilərinə, türk Azərbaycan kişiləri isə ingilis, fransız, holland qadınlarından dəfələrlə çox rus, slavyan qadınlarına meyl göstərirlər... 

Zatən, zaman-zaman Rusiyanı Osmanlı və Azərbaycan dövlətləri üzərinə hücumlara təhrik edən də məhz dəniz-pirat psixologiyalı qərblilər olub...

Lev Qumilyovu da oxumamış deyilsiniz, yəqin...

Odur ki,  meşə-çöl-dağ sivilizasiyasına mənsib qədim xalqlarımızın gələcəyi, dəniz-pirat xislətli Qərb ölkələrinnin mövcud ekspansiyasından qurtulmaq, gerçək birliyimizi qurmaq üçün keçmiş səhvlərin aradan qaldırılmasına həddindən artıq ehtiyac var.  Özünüz son günlərdə  SSRİ dönəmində yol verilmiş səhvlərin düzəldilməsinin zəruriliyindən danışdınız. Həmin səhvlər arasında türk-müsəlman xalqlarına, o cümlədən Azərbaycana qarşı  edilmiş ağır günahlar da çox önəm daşıyır. Moskva ermənilərə Azərbaycan torpaqları hesabına dövlət qurması azmış kimi, hələ Azərbaycanın daxilində də onlara gələcək üçün böyük bir mina olan Dağlıq Qarabağ muxtariyyətini yaratdı. 1948-1952-ci illərdə “Ermənistan” adlandırılan Qərbi Azərbaycandan yüz minlərlə Azərbaycan türkü deportasiya olundu... Sonda çanaq elə SSRİ-nin öz başında da partladı: Dağlıq Qarabağdakı erməni minası ABŞ, Avropa kəşfiyyatlarının və “KQB”-nin, “QRU”-nun ələ alınmış hissəsinin dəstəyi ilə işə salındı.  Və SSRİ digər etnik münaqişələrlə yanaşı,  daha çox məhz Qarabağ münaqişəsinin sayəsində çökdü və parçalandı.  Nəticədə 14 müttəfiq respublikadan ibarət nəhəng bir ərazi Kremlin hüquqi-siyasi nəzarətindən çıxdı. Dövlət qurduğunuz, muxtariyyət verdiyiniz ermənilərin fəal maşalığı sayəsində... Yəni ermənilər Rusiya imperiyasına birbaşa xəyanət etdi... 

Bundan sonrakı Qarabağ savaşlarında Moskva ara-sıra planlaşdırılmış hərbi-siyasi oyunlar, yaxud ayrı-ayrı generalların, komandirlərin Azərbaycan tərəfindən müvəqqəti ələ alınması sayəsində Bakıya dəstək versə də, sonda birmənalı şəkildə işğalçı,separatçı, terrorçu  ermənilərin tərəfini tutdu. Nəticədə Azərbaycan Respublikasının hüquqi ərazisinin 20 faizi Ermənistanın işğalı altına verildi.  Və son  25 ildə Moskva guya Qarabağ məsələsini həll etməyə, faktiki isə bu problem vasitəsilə həm Azərbaycan, həm də Ermənistanı nəzarətdə saxlamağa çalışır. Halbuki, Qarabağ münaqişəsinin başladılması, hərbi əməliyyatların aparılması, eləcə də hakimiyyətlərin devrilməsi, qurulması mexanizmləri,  hər iki tərəfdən münaqişə və müharibənin qızışdırılmasına xidmət edən kəşfiyyat, təxribat agentura  şəbəkələri və s. keçmiş “KQB”, “QRU” və deməli, hazırkı Rusiya kəşfiyyat və xüsusi xidmət orqanlarının əlindədir. Balayanın,  Kaputikyanın, Ter-Petrosyanın, Köçəryanın, Sərkisyanın, Qukasyanın, Saakyanın və hazırkı Paşinyanın, eləcə də Azərbaycanda 30 ildir xalqın başına corab hörənlərin əslində kim olduğunu Ermənistandan da, Azərbaycandan da yaxşı siz bilirsiniz.  Odur ki, cənab Putin, istəsəniz, Qarabağ “problemi”nin ədalətli həllini, yəni Azərbaycanın işğal altındakı torpaqlarından Ermənistan ordusunun çıxarılmasını 3 gündə icra etdirərsiniz. Amma bunu etmirsiniz. Deməli, ya etmək istəmirsiniz, yəni ABŞ, Avropa liderləri kimi siz də Türk, İslam dünyasına, Türkiyə və Azərbaycana qarşı çoxüzlü siyasət yürüdürsünüz və əslində məqsədiniz torpaqlarımızı Ermənistanın, dolayısıyla öz nəzarətinizdə saxlamaqdır.  Yox, Qarabağ məsələsini ədalətlə həll edə blmirsinizsə, deməli, böyüklüyünüzə, nüvə silahınıza, nəhəng orduya, tükənməz yeraltı-yerüstü sərvətlərə malik olmağınıza rəğmən Rusiya da  müstəqil    deyil. Yəni siz də bir prezident olaraq super güclərin, transmilli dələduz oliqarxiyanın əlində bir fiqur, oyuncaqsınız. Və bu mənada Paşinyandan fərqiniz o qədər də çox deyil... Belədirsə, siz Rusiya xalqının, ayrıca da rusların da taleyini düşünmürsünüz.  O halda son onilliklərdə rus ziyalılarının da şikayətləndiyi korrupsiya, özbaşınalıq halları da bunu təsdiqləyir...

Bir sözlə, onu da qəti bilin ki, siz Türkiyə və Azərbaycanla səmimi, bərabərtərəfli müttəfiqlik, dostluq etmək niyyətindəsinizsə,  Suriya ilə yanaşı, Qarabağ problemni də ədalətli həll etməlisiniz. Hulusi Kılıç bəyin dediyi kimi, Suriyada Türkiyə ilə bir olduğunuz kimi, Qarabağda da bir olmalısınız (Unutmayın ki, Rusiya ərazisində milyonlarla türk, müsəlman yaşayır. Sabah onlar bir az öz təşəbbüsləri, bir az da Qərbin, ABŞ-ın təsiri sayəsində ayağa qalxa bilər. Biz türklərin, müsəlmanların nüvə silahı olmasa da, Allahın iradəsinə söykənən namus-qeyrətimiz var. Və o, gec-tez bir daha partlayacaq)...  Əks halda gerçək Avrasiya Evi qura bilməyəcəksiniz. Əksinə, 30 il öncə SSRİ-ni çökdürən Qarabağ minası bu dəfə də Rusiyanı çökdürüb parçalayacaq və Qərb, ABŞ- dəniz-pirat sivilizasiyası qarşısında Rusiyanı tam çökdürəcəksiniz. Və o halda nəinki Anadolu, Azərbaycan türkləri, müsəlmanlar zəhmətkeş sadə rusiyalılar, ruslar da Mixail Qorbaçova lənət oxuduqları kimi, sizi də tarix boyu lənətləyəcək...

Sultan Laçın