Əslən Göyçə mahalının Aşağı Şorca kəndindən olan Azad Hümbətov 24 yanvar 1996-cı ildə Bakı şəhərində anadan olub. Azad Hümbətov orta təhsilini Nərimanov rayonunda 291 nömrəli ekologiya liseyində alıb. 2013-cü ildə orta məktəbi bitirərək Heydər Əliyev adına Azərbaycan Ali Hərbi Məktəbinin tank bölüyünə daxil olub. 2017-ci ildə hərbi məktəbi bitirib və “leytenant” hərbi rütbəsi alıb. Hərbi xidmətə Füzuli rayonunun Horadiz şəhərindəki “N” saylı hərbi hissədə başlayıb. 

 

Xidmətinin ilk illərində Azad Hümbətov peşəkarlığını artırmaq üçün Bakıda yerləşən Silahlı Qüvvələrin Təlim və Tədris Mərkəzində 45 gün müddətində zabit heyətinin təkmilləşdirmə kursunu keçərək baş leytenant rütbəsi alıb. 

 

Azad Hümbətov 2018-ci ildə  “Azərbaycan Ordusunun 100 illiyi” münasibətilə keçirilən hərbi tədbirdə ön sırada bayraqdar vəzifəsini daşıyıb. Hərbi xidmət dövründə nümunəvi xidməti nəzərə alınaraq “Azərbaycan Ordusunun 100 illiyi (1918-2018)” yubiley medalı ilə təltif olunub. 

 

Azad Hümbətov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsinə döyüşün ilk günlərində qatılıb. Tank tağımı komandiri olan Azad Hümbətov Vətən Müharibəsi zamanı Füzuli, Qubadlı, Laçın rayonunun azadlığı uğrunda gedən döyüşlərdə fəal iştirak edib. 

 

Azad Hümbətov öz həyatını təhlükəyə ataraq düşmənə dəfələrlə sarsıdıcı zərbələr endirib. Müharibənin yeni başladığı dövrdə o, komandirlik etdiyi tankı ilə minaya düşüb. Azad Hümbətov özü isə ayağından yaralanıb. Tankı idarə edən mexanikinin daha ağır xəsarətlər aldığını görən komandir onu yaralı halda 25 km meşə ərazisində belində daşıyaraq 2 gündən sonra öz döyüş postlarına gətirib çıxara bilib. Bundan sonra Azadı Beyləqanda hospitala müalicə üçün göndərsələr də, o, müalicəsini yarımçıq qoyaraq yenidən döyüş meydanına qayıdıb.

 

Baş leytenant Azad Hümbətov 27 oktyabr 2020-ci ildə Laçın rayonu uğrunda gedən döyüşlərdə qəhrəmanlıqla döyüşərək şəhid olub. Azad Hümbətov II Fəxri Xiyabanda torpağa tapşırılıb. 

 

Şəhid baş leytenant Azad Hümbətova məxsus materiallar ailəsi tərəfindən Milli Azərbaycan Tarixi Muzeyinin İkinci Qarabağ müharibəsi fonduna təhvil verilib. 

 

Azərbaycanın ərazi bütövlüyünün bərpa edilməsində xüsusi xidmətlərinə və işğal olunan ərazilərin azad olunması zamanı düşmənin məhv edilməsi üzrə qarşıya qoyulan döyüş tapşırığını yerinə yetirən zaman göstərdiyi qəhrəmanlıq nümunəsinə görə, həmçinin hərbi qulluq vəzifəsini yerinə yetirən zamanı igidliyin və mərdliyin nümayiş etdirilməsinə görə Azərbaycan Prezidenti İlham Əliyevin 09 dekabr 2020-ci il tarixli Sərəncamına əsasən baş leytenant Azad Hümbətova “Vətən Müharibəsi Qəhrəmanı” adı verilib. 

 

Bundan başqa Azad Hümbətov Azərbaycanın ərazi bütövlüyünün təmin edilməsi uğrunda döyüş əməliyyatlarına qatıldığı və hərbi hissə qarşısında qoyulan  tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin sərəncamına əsasən ölümündən sonra “Vətən uğrunda”, “Füzulinin azad olunmasına görə” və “Xocavəndin azad olunmasına görə” medalı ilə təltif edilib medalları ilə təltif edilib.

 

Torpaqlarımızın azad edilməsində canından keçən qəhrəmanlarımızın adının əbədiləşdirilməsi üçün addımlar atılıb. 2021-ci ilin noyabr ayından Azad Hümbətovun təhsil aldığı  291 nömrəli Ekologiya liseyi onun adını daşıyır.  2021-ci ilin dekabrında isə Bakıdakı mərkəzi küçələrin birinə Vətən Müharibəsi Qəhrəmanı, Baş leytenant Azad Hümbətovun adı verilib.