Avropa Birliyinin Genişlənmə və Avropa Qonşuluq Siyasəti üzrə Komissarı Stefan Füle Brüsseldə Avropa Birliyi-Azərbaycan Əməkdaşlıq Şurasının 14-cü iclasından sonrakı mətbuat konfransında rəsmi Bakıya çağırış edib: “Biz Azərbaycanı çağırırıq ki, fundamental insan azadlıqları ilə bağlı üzərinə götürdüyü beynəlxalq öhdəliklərə sayğı göstərsin. Mətbuat, birləşmək, toplaşmaq azadlığı kimi sahələrdə hələ görüləsi çox iş var”.

S.Füle daha sonra qeyd edib ki, seçki məcəlləsini ATƏT-in Demokratik İslahatlar və İnsan Haqları Bürosunun tövsiyələrinə uyğunlaşdırmaq mühümdür: “Bunu tez etməyə ehtiyac var ki, Azərbaycan gələn ilki bələdiyyə və 2015-ci ildəki parlament seçkilərinin azad və ədalətli keçməsini təmin edə bilsin. Korrupsiyaya qarşı mübarizə sahəsində də işlərin görülməsi vacibdir. Azərbaycan bütün bu sahələrdə Avropa Birliyinin dəstəyinə ümid edə bilər”.

Eyni zamanda, S.Füle AB-nin Azərbaycanla əməkdaşlığı sıxlaşdırmaqdan məmnun olduğunu da vurğulayıb: “Əməkdaşlığımız məhsuldardır. Bundan ötrü Vilnüsdakı Şərq Tərəfdaşlıq Sammitinin nəticəsinə, viza sadələşməsi haqda anlaşma altındakı imzaya baxmaq yetər. Bu, insanlar arasında kontaktları artıracaq. Bu çox mühüm elementdir. Biz əməkdaşlığı bütün sahələrdə genişləndirmək istəyirik. Assosiasiya razılaşması, eləcə də strateji modernizasiya üzrə tərəfdaşlıq yönündə danışıqlar davam edir. Biz danışıqların sürətinin artmasını istərdik. Bunun üçün biz Azərbaycanın Ümumdünya Ticarət Təşkilatına qəbul istiqamətində işləri sürətləndirməsini arzulayırıq. Bu, Avropa Birliyi ilə ticarətin genişləndirilməsi üçün qoyulmuş şərtdir. Həmçinin son nəticədə azad ticarət zonasının yaradılması baxımından vacibdir”.

Mətbuat konfransına qatılan xarici işlər nazirinin müavini Mahmud Məmmədquliyev Azərbaycanın AB ilə əməkdaşlığı genişləndirməyə hazır olduğunu vurğulayıb: “Ünsiyyətimiz davam edəcək. Bu bizim xarici siyasətimizin əsas prioritetlərindəndir. Məqsədimiz Avropanın ən yaxşı standartlarını, təcrübəsini, menecmentini Azərbaycana gətirməkdir. Amma əlbəttə ki, problemlər də var və AB-yə inteqrasiyamız qarşısında əsas problemlərdən biri  Dağlıq Qarabağ münaqişəsidir. Bu, nəinki regiona təsir edir, ondan daha geniş miqyasda proseslərə təsir edir. Bizim üçün AB-nin bu məsələdə tutduğu mövqe vacibdir. Əlbəttə, biz AB-nin Minsk qrupunun fəaliyyətini və Azərbaycanın ərazi bütövlüyünü dəstəkləməsindən məmnunuq. Amma biz inanırıq ki, AB bu münaqişənin həllində daha böyük rol oynaya bilər”.

Avropa Birliyinin komissarı Stefan Fülenin Azərbaycana yönəlik bu cağırışına münasibət bildirən AXCP sədrinin müavini Razi Nurullayev vurğulayıb ki, bu açıqlama ölkəmizlə bağlı bir çox önəmli faktların təsdiqlənməsi anlamına gəlir: “Stefan Füle bu çağrışı ilə Azərbaycanın Avropa Birliyi ilə inteqrasiyasına önəm verildiyini qabartmış oldu. Onun açıqlamasından belə anlaşılır ki, Azərbaycanın Avropa Birliyi ilə vizaların sadələşdirilməsi sazişini imzalamasını böyük hadisə olaraq dəyərləndirilir. Hesab edilir ki, bu sazişi imzalamaqla Azərbaycan Avropa Birliyinə daha da yaxınlaşıb”.

Ancaq Razi Nurullayev hesab edir ki, Azərbaycanın Avropa Birliyinə həqiqən yaxınlaşması üçün bir neçə önəmli şərtə də mütləq əməl etməlidir: “Rəsmi Bakı ilk növbədə Azərbaycanın Ümumdünya Ticarət Təşkilatına üzv olmasını təmin etməlidir. Çünki yalnız bu halda Azərbaycanda azad ticarət ənənələri yarana və ölkə iqtisadiyyatı liberallaşa bilər. Bunun nəticəsində də Azərbaycanda orta sinfin yaranaraq inkişaf etməsi prosesinin önü açılar. Bu isə öz növbəsində Azərbaycanda azad cəmiyyətin formalaşmasında önəmli faktor rolunu oynaya bilər. Digər tərəfdən, rəsmi Bakı ölkədə azad seçkilərin keçirilməsi, insan haqlarının qorunması, eləcə də demokratiyanın bərqərar edilməsi barədə də düşünməlidir. Və hakimiyyət 2014-cü ilin bələdiyyə, 2015-ci ilin parlament seçkilərini mütləq demokratik şəraitdə keçirtməlidir ki, Azərbaycan cəmiyyətinin siyasi politrası da şəffaflaşsın. Bütün bu şərtlərə əməl edilməyəcəyi təqdirdə, Azərbaycanın Avropa Birliyinə inteqrasiyası baş tuta bilməz”.

Razi Nurullayevin fikrincə, rəsmi Bakı bu şərtlərə əməl etməzsə, Azərbaycanın Avropa Birliyi ilə inteqrasiyadan yayınmağa çalışdığı bir daha təsdiqlənəcək: “Stefan Fülenin çağırışından belə anlaşılır ki, Avropa Birliyi Azərbaycan ilə kifayət qədər ciddi şəkildə işləyir. Və Azərbaycanın Avropa inteqrasiyasına nail olmağa çalışır. Ona görə də, 2014-cü ildən Avropa Birliyinin bu istiqamətdə Azərbaycana yönəlik təzyiqləri daha da artıra biləcəyi qətiyyən istisna deyil”.

Azərbaycan hakimiyyəti adətən, analoji məzmunlu çağırışları sərt reaksiya ilə qarşılasa da, Razi Nurullayev rəsmi Bakının bu dəfə Stefan Füleyə tənqidi yanaşmağa ehtiyac duyacağını düşünmür: “Yəqin ki, hakimiyyət bu çağırışa sərt reaksiya verməyəcək. Çünki bu açıqlamada müəyyən sahələr üzrə irəliləyişlərin olduğu da qeyd edilib. Və bu, yəqin ki, hakimiyyəti təmin edəcək. Ona görə də sərt reaksiyaya ehtiyac duymayacaqlar. Əksinə, hakimiyyətin bu çağırışa daha ciddi və həssas yanaşsa daha yaxşı olar. Çünki hakimiyyət Ukraynada baş verənlərdən də mütləq lazımi dərslər çıxartmalıdır. Hər halda, Ukrayna hadisələri göstərdi ki, Qərb siyasi anlaşmalara əməl etməyənləri cəzalandırmağı bacarır. Hətta ehtiyac duyduqda vədlərinə xilaf çıxan, anlaşmaları pozan siyasi qüvvələrin hakimiyyətdən uzaqlaşdırılması istiqamətində addımların atılmasından da qətiyyən çəkinmir”.