23 oktyabr saat 15:00-dan 2-11-ci sinif şagirdlərinin elektron yerdəyişməsi prosesinə start veriləcək. Şagirdlərin yerdəyişməsi prosesi www.sy.edu.az portalı vasitəsilə həyata keçiriləcək.
Eyni zamanda müxtəlif səbəblərdən 10-cu siniflərə qeydiyyat üçün gecikən şagirdlər 23 – 31 oktyabr tarixləri arasında ümumi təhsil müəssisələrinə qəbul üçün müraciət edə bilərlər.
Qeyd edək ki, 10-cu siniflərə şagirdlərin qəbulu da şagird yerdəyişməsi elektron sistemi (www.sy.edu.az) vasitəsilə aparılacaq.
Moderator.az şagirdlərin elektron yerdəyişməsi prosesi ilə bağlı valideynlər tərəfindən ən çox verilən suallara cavabları təqdim edir:
Sual : Şagirdlərin yerdəyişməsi hansı formada həyata keçirilir?
Cavab : Şagirdlərin yerdəyişməsi sy.edu.az portalı vasitəsilə elektron formada həyata keçirilir.
Sual: Şagirdlərin elektron yerdəyişməsi portalında valideyn (qanuni nümayəndə) qeydiyyatdan keçmək üçün nə etməlidir?
Cavab: Valideyn (qanuni nümayəndə) sy.edu.az portalına daxil olub, “qeydiyyat” bölməsini seçdikdən sonra ilk olaraq özünü qeydiyyatdan keçirir. Bunun üçün şəxsiyyət vəsiqəsinin FİN kodunu yazıb, “Mən robot deyiləm” düyməsini işarələyib “Yoxla” düyməsini vurur.
Məlumatların düzgünlüyünü yoxlayıb “TƏSDİQ ET” düyməsini vurur. Daha sonra əlaqə nömrəsini daxil edir və təsdiqləyir, nömrəyə göndərilən 4 rəqəmli şifrəni ekranda göstərilən müvafiq sahəyə daxil edib təsdiqlədikdən sonra “İrəli” düyməsini sıxır. Bu mərhələdə valideyn tərəfindən kabinetə şifrə təyin edilməsi tələb olunur. Valideyn şifrəni daxil etdikdən sonra kabinet yaranır. Açılan səhifədə “Şagird əlavə et” bölməsinə daxil olub övladının FİN kodunu və yaxud ÜTİS kodunu yazıb, şagirdin oxuduğu rayonu və məktəbi seçib “Yoxla” düyməsini vurur. Tapılan məlumatların düzgünlüyünü yoxladıqdan sonra “Yadda saxla” vurub şagirdi kabinetə əlavə edir.
Sual: Valideyn (qanuni nümayəndə) sy.edu.az portalında yaratdığı şəxsi kabinetə neçə övladını daxil edə bilər?
Cavab: Say məhdudiyyəti qoyulmayıb.
Sual: Şagirdin eyni məktəbin daxilində digər sinfə keçməsi elektron yerdəyişmə portalı vasitəsilə aparılır?
Cavab: Bəli
Sual: X-XI sinif şagirdlərinin yerdəyişməsi necə həyata keçirilir?
Cavab: X-XI sinif şagirdlərinin yerdəyişməsi üçün sorğu yerləşdirildikdə valideyndən “fayl” bölməsinə ailəsi ilə birlikdə yaşayış yerinin (rayonu, şəhəri) dəyişməsinə dair müvafiq təsdiqləyici sənəd yüklənilməsi tələb olunur.
Sual: Şagird xarici ölkədən gəldiyi halda onun Azərbaycan Respublikasının ümumi təhsil müəssisələrinə yerdəyişməsi necə həyata keçirilir?
Cavab: Şagirdə şərti ÜTİS kodu alındıqdan sonra sy.edu.az portalında qeydiyyatdan keçirilməklə yerdəyişməsi həyata keçirilir. Bütün ümumi təhsil müəssisələri tərəfindən şərti ÜTİS kodu verilə bilir.
Sual: Hansı halda məktəb tərəfindən yerdəyişmə sorğusuna imtina verilə bilər?
Cavab: Tədris olunan xarici dillər uyğun olmadığı halda məktəb tərəfindən sorğuya imtina verilə bilər. Əgər şagird ailəsi ilə birlikdə yaşayış yerini dəyişirsə və yeni köçdükləri ərazidə onun əvvəl oxuduğu məktəbdə tədris olunan xarici dil tədris olunan məktəb yoxdursa, bu halda istisna hal kimi şagirdin yerdəyişməsinə razılıq verilə bilər.
Sual: Özəl təhsil müəssisələrinə yerdəyişmə hansı formada aparılır?
Cavab: Özəl təhsil müəssisələrinə yerdəyişmə sy.edu.az portalı vasitəsilə. Valideyn sorğu vermək istədiyi məktəbi seçərkən səhifənin yuxarı hissəsində qeyd olunan “Özəl və ya digərqurumlara tabe məktəblər” bölməsini öncədən işarələməlidir.
Sual: Yerdəyişmə etmək istədiyi məktəbin müvafiq sinfi üzrə boş yer olmadığı halda valideyn (qanuni nümayəndə) nə etməlidir?
Cavab: Valideyn bu halda “Növbəyə yazıl” bölməsinə daxil olub növbəyə yazıla bilər.
Sual : Bir şagird neçə sinfə növbəyə yazıla bilər?
Cavab: Məktəbin bir və ya bir neçə sinfinə eyni anda növbəyə yazıla bilər.
Sual: Valideynin sorğusuna hansı müddət ərzində ümumi təhsil müəssisəsi tərəfindən təsdiq və ya imtina vurula bilər?
Cavab: Valideynin sorğusuna hər mərhələ üzrə 3 iş günü ərzində təsdiq və ya imtina vurulmalıdır.
Sual: Lisey və gimnaziyalara yerdəyişmə hansı formada aparılır?
Cavab: Lisey və gimnaziyalara yerdəyişmə mərkəzi və ya məktəblərin xüsusi imtahanları əsasında ildə bir dəfə olmaqla sy.edu.az portalında qeydiyyatdan keçməklə təşkil olunur.
Sual: Məktəb tərəfindən sorğu təsdiq edildikdən sonra valideyn nə etməlidir?
Cavab: Valideyn şəxsi kabinetin “Sorğularım” bölməsində aktivləşən elektron ərizəni 2 nüsxədə (bir nüsxə şagirdin çıxdığı məktəbə, digər nüsxə şagirdin yerdəyişmə etmək istədiyi məktəbə təqdim olunur) çap edərək imzalayıb şagirdin təhsil aldığı məktəbə yaxınlaşır.
Məktəb direktoru tərəfindən elektron ərizə əsasında şagirdin məktəbdən çıxması əmrləşdirilir və elektron portalda qeyd olunur. Valideyn elektron ərizə və şəxsi işlə birlikdə 5 iş günü ərzində şagirdin yerdəyişmə etmək istədiyi məktəbə yaxınlaşmalı və yerdəyişmə prosesini yekunlaşdırmalıdır.
Sual: Valideyn şəxsi kabinetin şifrəsini itirdiyi zaman nə etməlidir?
Cavab: Valideyn portala daxil olub, “Şifrəni unutdum” düyməsinə vurub FİN kodunu yazır, növbəti addımda qeydiyyatdan keçərkən istifadə etdiyi əlaqə nömrəsini müvafiq sahəyə daxil edib “Göndər” düyməsini vurur. Sistem tərəfindən avtomatik təyin olunmuş yeni şifrə əlaqə nömrəsinə göndərilir. Əgər əvvəl qeydiyyatdan keçdiyi nömrə artıq aktiv deyilsə, valideyn şəxsiyyətini təsdiq edən sənədlə birlikdə nömrənin dəyişilməsi ilə bağlı rayon(şəhər) təhsil şöbəsinə yaxınlaşmalıdır (və yaxud müraciət etməlidir).
Sual: Övladım üçün məktəbə sorğu yerləşdirən zaman uyğun sinif və bölmədə yer olmadığından növbəyə yazılmışam. Növbəm nə zaman çatacaq?
Cavab: Növbənin sorğuya çevrilməsi üçün şagirdin növbəyə yazıldığı siniflərdən birindən şagird çıxarsa, (onun növbədəki sırasına əsasən 1,2 və ya 3 nəfər) Sizin qeydiyyatdan keçdiyiniz mobil nömrəyə sms bildirişi göndəriləcək.
Sual: Biz xarici ölkədən Bakı şəhərinə köçmüşük. Övladım üçün sy.edu.az saytında sorğu yerləşdirən zaman fayl yüklənməsi tələb olunur. Burada hansı sənədlər yüklənməlidir?
Cavab: Əvvəlki dövrdə xarici ölkədə təhsil alan şagirdlər ümumtəhsil müəssisələrinə sorğu yerləşdirən zaman həmin ölkədə təhsil aldığını təsdiq edən müvafiq sənədləri,qiymət cədvəlini “faylı yüklə” xanasından yükləməlidir.