"Ərdoğanın sözlərinə görə, ABŞ və İsrailin (Suriyada Fərat çayının şərqində) nəzarət etdiyi və silahlandırdığı "Xalq özünmüdafiə qüvvələri" ("YPG") Kürdüstan Fəhlə Partiyası ("PKK") ilə bağlıdır və  İsrailin hədəflərinə nail olmaq üçün bir vasitə kimi istifadə olunur..."

 

“Türkiyə ilə İsrail arasında mümkün müharibə məsələsi ötən həftənin ən çox müzakirə olunan mövzularından biri oldu. Bu ehtimala konspiroloqlardan biri deyil, Türkiyə prezidenti Rəcəb Tayyib Ərdoğanın özü işarə edib. Ərdoğan bu açıqlamanı qəzəbindən və ya təsadüfən verməyib və  bu haqda yalnız bircə dəfə  xatırlatmayıb. Bu səbəbdən Türkiyə Böyük Millət Məclisində İsrail təhlükəsini müzakirə etmək üçün qapalı iclas keçirilib, nazirlər lazımi məlumatları millət vəkillərinə təqdim ediblər”.

 

Moderator.az xəbər verir ki, bunu “İslamnews” nəşrində dərc olunmuş araşdırmasında türkiyəli jurnalist və yazıçı Kamal Öztürk yazır.

 

Məqalənin qalan hissəsinin tərcüməsini olduğu kimi nəzərinizə çatdırırıq:

 

 

1 oktyabr 2024-cü il tarixində prezident Ərdoğan parlamentin yeni iclasının açılışındakı çıxışında demişdi: “İsrail hökuməti “vəd edilmiş torpaq” xülyasına qapılan və yalnız dini fanatizmə arxalanaraq, gözünü Fələstin və Livandan sonra Türkiyə ərazilərinə dikib. İndi bütün hesablamalar buna yönəlib. Aydındır ki, Netanyahu hökuməti Anadolunu da əhatə edən bir xəyalın arxasınca gedir. Onlar öz niyyətlərini dəfələrlə bəyan ediblər.

 

Oktyabrın 7-dən bu yana hər bir hadisə bu təhlükəni daha da artırıb. Əgər Fələstin və Livan təhlükəsiz deyilsə, doğrudanmı özünüz təhlükəsiz olacağını düşünürsünüz? Hər bir aqressiv bəyanatda İsrail təcavüzünün Türkiyəyə qədər uzandığı açıq-aydın görünür. Biz bundan sonra da vətənimiz, xalqımız, müstəqilliyimiz naminə bu təhlükə və terrorla bütün gücümüzlə mübarizə aparacağıq”.

 

Bu bəyanatlar Türkiyədə və Yaxın Şərqdə geniş rezonans doğurdu və bir neçə gün sonra Ərdoğan bunları təkrar edərək, onun ciddiliyini təsdiq etdi. “Bölgəmizdə yalnız Qəzza, İordan çayının qərb sahili və Livanla məhdudlaşmayan məkrli bir plan həyata keçirilir. Bu planın son məqsədini anlamaq üçün bir peyğəmbər olmağa ehtiyac yoxdur. Tarixi, siyasəti və dini bilən hər kəs bu vəziyyətlə "vəd edilmiş torpaq" illüziyası arasındakı əlaqəni asanlıqla anlayacaq. “Biz hamımız “vəd edilmiş torpaq”ın nə olduğunu bilirik...

 

İsrail sanki Türkiyəyə meydan oxuyur. İsrail hökumətinin hər bir xəritəsi və hər bəyanatı onların əsl niyyətlərini ortaya qoyur. Ötən əsrin əvvəllərində olduğu kimi, indi də sərhədlərin qanla yenidən cızılması cəhdi var. "HƏMAS" sadəcə bir bəhanədir. Nüfuz dairələrinin yenidən bölüşdürülməsi üçün İsrail vasitəsilə yeni çirkin müharibə aparılır”, - Ərdoğan vurğulayıb.

 

 

Ərdoğanın açıqlamalarından sonra Türkiyə parlamenti qapalı iclas keçirib. Xarici işlər naziri Hakan Fidan və müdafiə naziri Yaşar Gülər millət vəkillərinə İsrail təhlükəsi ilə bağlı məlumat veriblər. Müzakirələrin təfərrüatları dövlət sirri hesab olunduğu üçün 10 il müddətinə məxfi saxlanılacaq. Bununla belə, İsrailin bölgədəki təcavüzü Türkiyənin milli təhlükəsizliyinə açıq təhdiddir.

 

Hələlik hansı tədbirlərin görüldüyü və hansı strategiyaların hazırlandığı bəlli deyil, lakin Ərdoğanın açıqlamaları hökumətin bu təhlükənin Türkiyə torpaqlarına çatmamış onun qarşısını almağa çalışdığını göstərir. 

 

 

Ərdoğanın İsraili Türkiyə üçün təhlükə hesab etməsinin iki real səbəbi var: İsrail əsgərlərinin daşıdığı “vəd edilmiş torpaq” xəritəsində digər ölkələrlə birlikdə Türkiyə ərazisi də var.

 

Ərdoğan hesab edir ki, məqsədlərini açıq şəkildə bəyan edən İsrail hakimiyyəti bu məqsədlərə çatmaq üçün Qəzzada, Livanda, Suriyada və İranda müharibə aparır. O hesab edir ki, bu proses artıq gedir. Ehtimal olunur ki, işğal Qəzza və Livandan sonra Suriyaya yayıla bilər və bu, potensial olaraq İsrail və Türkiyə arasında sərhəd toqquşmasına səbəb ola bilər. Ərdoğanın sözlərinə görə, ABŞ və İsrailin (Suriyada Fərat çayının şərqində) nəzarət etdiyi və silahlandırdığı "Xalq özünmüdafiə qüvvələri" ("YPG") Kürdüstan Fəhlə Partiyası ("PKK") ilə bağlıdır və  İsrailin hədəflərinə nail olmaq üçün bir vasitə kimi istifadə olunur. O, parlamentdəki çıxışı zamanı deyib: “Biz onların İraq və Suriyanın şimalındakı separatçı təşkilatlardan istifadə edərək necə marionet dövlətlər yaratmağa çalışdıqlarını görürük”. 

 

 

İsrailin İran, Suriya və Livanda olduğu kimi NATO üzvü olan Türkiyəyə hücumu gözlənilmir. Lakin Türkiyə xüsusi xidmət orqanlarının məlumatına görə, Suriya-Türkiyə sərhədində yerləşən separatçı "YPG" təşkilatı yaxın vaxtlarda Türkiyəyə hücum edə bilər. Ərdoğan bu təşkilatı İsrailin məqsədlərinə çatmaq üçün bir vasitə kimi görür. İsrail Livandan sonra Suriyanın bir hissəsini işğal edərsə, çox güman ki, Türkiyə ordusu döyüşə hazır olacaq. Amma ilk növbədə Ankaranın separatçı qrupların Türkiyəyə qarşı hər hansı hücumuna sərt cavab verməsini gözləmək olar. Bunun Türkiyə ilə İsrail arasında münaqişənin başlanğıcı olub-olmayacağını zaman göstərəcək..."

 

S.Laçın