“Film və seriallarda yox, amma kiçik səhnəciklər olanda çəkilirəm, etiraz etmirəm. Film Akademiyasında rejissor Zaur Tahirsoy bir dəfə məni müəllim obrazına çəkib. Yenə də təklif gəlib. Sadəcə olaraq özümü yaxşı hiss etmirəm. Müalicəyə gedirəm. Daha sonra çəkiləcəyəm. O da böyük yox, xırda rollar. Böyük rol olsa çəkilməyəcəm, gücüm çatmaz. Film, serial çəkmək əziyyətlidir. Səhərdən axşama qədər gərək çəkiliş meydançasında olasan, növbəni gözləyəsən. Nə qədər hörmət edib, sayğı göstərsələr də can məndən gedir. Buna qüvvəm yoxdur. Həm də seriala çəkilsəm gərək 40-50 seriya orada olasan. Dözə bilmərəm”

 

Bunu Moderator.az-a açıqlamasında əməkdar artist Kübra Əliyeva deyib. O daha sonra evinin, mətbəxinin köhnə olduğunu efirdə müzakirə edənlərə də səslənib.

 

 

“İstəyirəm aparıcı xanıma zəng edib deyim ki, qızım, siz bir az abartdınız. İzləyicilər mənim halıma yanmayıblar, sadəcə deyiblər ki, mətbəxi köhnədir. O qədər gözəl sözlər yazıblar ki.. Verilişdə xalq artisti Əbdül Mahmudbəyov da iştirak edib. O məni bu gün tanımır ki, o vaxtdan tanıyır. Özü də mənim nə zülmlərlə gəlib bu günə çıxdığımı da bilir. Qız evim haqda deyir ki, “kasıblıqdan da aşağı”. Bundan da betər təmirsiz evlərdə yaşayan insanlardan artığam?! Nə kasıb? Kübra xanım kasıb deyil. Mən də aktrisayam da. Müğənni deyiləm ki, toylara gedib pul qazanıb. Kübra xanım öz dəyərlərinə hörmətlə yanaşır. Heç vaxt ayağımı yorğanımdan bir santimetr də çölə çıxarmamışam. Nə qədər imkanım var o cür yaşamışam. Bu gün də elə yaşayıram. 1985-ci ildə avtomobil almışam. Mən qənaətlə yaşamağı bilən bir qadınam. Adam var ki, bir şeyi artıqdır və onu tullayır. Mən onun da qədrini bilən insanam. Evim 1920-ci ildə tikilib. Bu evə əl vurmaq olmur, söküb yenidən təmir etmək olmaz. Etmək olar. Amma niyə edim ki?! 10 kvadratlıq bir mətbəxdir. Bu mənə yetir. Mən bu balaca mətbəximdə 30 nəfər qonağımı yola salmışam. Hələ 13 il bir qadınla yaşamışam. Sumqayıtdan Bakıya köçəndə otağın biri rus qadında idi. Qonşulu ev idi. İllərimi vermişəm. 1976-cı il sentyabrın 20-dən bu evdə yaşayıram. Kafelləri əllərimlə vurmuşam. Evim bərəkətlidir, huzurludur. Mən evimdə gəlib bir fincay çay içən insan evimin ab-havasından danışır. Ev dəyişmək asandır. Tərtəmiz evim var. Həmişə dua edib deyirəm ki, rəbbim, heç kəsi kirayədə qoyma. Hər kəsin bir ocağı olsun.. Balaca olsun, amma özünün olsun. Şükürlər olsun, övladlarımın da evi var, nəvələrimin də. Kübra xanım ayrı bir insandır. Məni yaxından tanımaq üçün oxumaq lazımdır. Bəzən deyirlər ki, sizə yaxın gələ bilmirdik, gələndən sonra gördük ki, siz necə sadə insansınız. Bəli, mən sadə anayam, nənəyəm” deyə aktrisa bildirib.

 

 

Sevilən aktrisa bildirib ki, cənab prezidentin verdiyi evi xəstəliyinə görə satıb.

 

“Prezidentim ev vermişdi. Mən heç nəyə görə o evi satmazdım. Sağlığıma görə satdım. 11 min manat Türkiyədə pul köçürməli oldum. Sığortam da yox idi, birdən-birə pul ödəmək lazım oldu. Heç yana əlim çatmadı. Heç kimdən borc almağı da sevmirəm. Bu günə qədər bir adama da borcum olmayıb. Heç əməliyyat da olunmadım, amma xəstə olmağımın cavabı orada çıxdı. Mən onu özümə halal edirəm. Çünki xəstəliyim uzana bilərdi. 12 ildir mən yaşayıram, yaşamaya bilərdim. O ev məni xilas etdi. Xəstəliyim irəliləmədən üstünə düşdüm. Dövlətimiz biz sənətkarları qoruyur” deyə sənətkar bildirib.