"Tramp Kremlin agentidir, onunla 1987-ci ildə Moskvaya səfəri zamanı iş aparılıb..."

Gürcüstanı qarşıdurmaya çəkən prezident Zurabişvilidir, yoxsa?..- Analitik cavablandırır...

"Tramp Kremlin agentidir, onunla 1987-ci ildə Moskvaya səfəri zamanı iş aparılıb..." - VİDEO

Ekskluziv

Oxunub: 3131

18 Apr 2023 | 12:31

"Putin ölüm qoxusunu hiss edəndə onun rasional düşüncəsi işə düşür..."

"Bu, hansısa xüsusi xidmət orqanının əməliyyatı deyil, gerçəkdən, böyük sayda məxfi sənədlər sızıb..."

Milyardçı və ABŞ-ın eks-prezidenti Donald Trampın yeni seçkilərdə güman ediləcək qələbəsi Ukrayna üçün "dəhşətli yuxu" kimidir, çünki o zaman Rusiya müharibəni udacaq.

Moderator.az xəbər verir ki, bu fikri "QORDON" internet nəşrinin təsisçisi Dmitri Qordona müsahibəsində ABŞ-da yaşayan keçmiş sovet kəşfiyyatçısı və Rusiya prezidentinin tələbə yoldaşı Yuri Şvets ifadə edib.

"Tramp pudeldir (qıvrımtüklü it cinsi-red.), birmənalı olaraq Kremlin agentidir. Onunla hələ 1987-ci ildə Moskvaya səfəri zamanı iş aparılıb. O zaman bu səfər mənim işlədiyin şöbə tərəfindən təşkil olunub. O, Putinin mütləq agentidir, o, bunu, məncə, heç gizlətmir də.

Bu adam, özünün dediyi kimi, məsələni 24 saat ərzində "yoluna qoyacaq". Dərhal Ukraynaya yardımı kəsəcək və deyəcək: "Məsələni həll etmək istəyirsinizsə, bütün rusdilli əraziləri Moskvaya verin", - o, deyib.

Şvets ümid etdiyini bildirib ki, Trampa qarşı cinayət ittihamı irəli sürüldüyünə görə bu, baş verməyəcək.

"Putin ölüm qoxusunu hiss edəndə, onun rasional düşüncəsi işə düşür"

Putin təhlükənin və onun ordusunun məhv edilmə perspektivinin təsirindən rasional hərəkət edə bilər.

"Bilmirəm, indi necədir, amma amerikalılar hesab edir ki, ötən ilin mart ayından, Rusiya Silahlı Qüvvələrinin törətdiklərini nəzərə alsaq, Putində rasional düşüncə elementləri sezilib.

Xatırlayırsınız, hansı hərbi karvan Kiyevin üzərinə gedirdi? O, anlayanda ki, bu, çox təhlükəlidir, karvan tamamilə məhv edilə bilər, o, geriyə dönməyi əmr edib. Bir çoxları ona gülüb, bu, şok effekti olub, amma o, bu qərarı verib", - Şvets xatırladıb.

Daha bir misal kimi o, 2022-ci ilin sentyabrında Ukrayna Silahlı Qüvvələri tərəfindən tam mühasirəyə düşmək və sonradan məhv edilmək təhlükəsi altında olan Rusiya qoşunlarının Xersondan çıxmasını nümunə göstərib.

"O, ölüm qoxusunu hiss edəndə, rasional düşüncəsi işə düşür", - Putinin tələbə yoldaşı qeyd edib.

Qordon deyib ki, Putin indi sözün birbaşa mənasında öz həyatı uğrunda mübarizə aparır və onun üçün müharibənin necə bitməsi kritik vacibdir.

"Ukraynada məğlubiyyət onun həyatına son qoyulması, praktiki olaraq Putinin sonu deməkdir. O, indi nə düşünür, bu vəziyyətdən necə çıxa bilər?" - Qordon sual edib.

Sabiq kəşfiyyatçı güman edir ki, Putin yaranmış vəziyyətdə instinktiv olaraq hərəkət edir. "Xatırlayıram, mərhum Boris Berezovski (rusiyalı biznesmen) təxminən belə suala cavab verərkən deyib: "Əbləhin məntiqinə nüfuz etmək çətindir". Düşünürəm ki, o, tamamilə haqlıdır. Amma əgər cəhd etsək...

Mən indi Putinin mümkün gedişlərini təhlil edərkən, onun düşüncəsinə o qədər də bel bağlamıram, orada, baş beyində sapmalar, düyünlər, qapanmalar ola bilər. Mən ona heyvan kimi baxıram, hər bir heyvan orqanizmində isə başlıcası özünüqoruma instinktidir", - o, deyib.

Şvets bu fikrə meyllənir ki, Putinin özünün sağ qalması üçün Krımın Rusiyanın tərkibində saxlanılması və Rusiyanın maraqları nəzərə alınmaqla sülh sazişinə nail olmaqdır.

"Bu, hansısa xüsusi xidmət orqanının əməliyyatı deyil, gerçəkdən, böyük sayda məxfi sənədlər sızıb"

"Bu iş inkişaf etdikcə, bunun Rusiya, yaxud Amerikanın hansısa xüsusi xidmət orqanlarının düşməni dezinformasiya etmək məqsədilə aparılmış əməliyyatı olmadığı aydınlaşır. Gerçəkdən, böyük sayda məxfi və çox məfi sənədlər sızıb", - Şvets deyib.

O, qeyd edib ki, heç bir tərəf bu sənədlərin dərcində, açıqlanmasında maraqlı ola bilməz. Yəni indi vəziyyət elədir ki, sanki yeni Snouden (ABŞ xüsusi xidmət orqanlarının sabiq əməkdaşı, hakimiyyətin vətəndaşlarını kütləvi şəkildə izlədiyi barədə məlumat verən Edvard Snouden) peyda olub.

Sadəcə, bunu götürüb internet məkanına atıb, orada bunlar bir aya yaxın qalıb, heç kim buna diqqət yetirməyib, nəhayət, "The New York Times" hərəkətə gəlib və nəzər yetirib", - Şvets izah edib.

Onun sözlərinə görə, dərc edilən sənədlər "heç kimə sərfəli deyil". "Yeganə onu demək olar ki, bunlar kiməsə daha çox, kiməsə daha az ziyan vuracaq. Qlobal mənada bu, amerikalılar üçün heç yaxşı deyil, çünki məxfi məlumatla belə işləmək olmaz, heç vəchlə olmaz. Bu mənada onlar düzələn deyil", - Şvets hesab edir.