Bu gün Azərbaycanın Milli Qəhrəmanı, Azərbaycan Respublikası Silahlı Qüvvələrinin Baş Qərargahı rəisinin sabiq birinci müavini, polkovnik Şikar Şikarovun anım günüdür. Polkovnik 13 iyun 1992-ci ildə Azərbaycan ordusunun Ağdərə istiqamətində aparılmış uğurlu əməliyyatlarından biri zamanı həlak olub.

 

Şəhid Milli Qəhrəmanın anım günü ailə üzvləri, Müdafiə Nazirliyi əməkdaşları və I Qarabağ savaşının qaziləri olan tanınmış zabitlərin iştırakıyla bu gün - iyunun 13-də Azərbaycan Hərb Tarixi muzeyində qeyd edilib. Anım tədbirində iştirak etmiş müdafiə nazirinin sabiq müavini, istefada olan polkovnik Mehman Səlimov Moderator.az-a açıqlamasında şəhid polkovnik Şikar Şikarov haqda xatirələrindən bəhs edib:

 

“Şikar Şikarovu 1991-ci ilin payızından tanıyıram. Həmin vaxt mən Zaqafqaziya Hərbi Dairəsinin Bakıdakı 295-ci motoatıcı diviziyası komandirinin müavini -siyasi şöbənin rəisi vəzifəsini icra edirdim. Sizə əvvəllər bu haqda bəhs etmişəm... 1991-ci ilin yayından başlayaraq  gizli və açıq şəkildə Azərbaycanda Milli Ordu quruculuğuna, Müdafiə Nazirliyi strukturunun formalaşmasına dəstək verməyə başladım. 1991-ci il yayında - artıq  o vaxtkı Prezident Ayaz Mütəllibov Milli Ordu yaradılması haqda qeyri-rəsmi qərar verəndən sonra Ali Sovetin sədri rəhmətlik Elmira Qafarovanın xahişi ilə Milli Ordunun yaranması haqqında qanunun hazırlanmasında birbaşa qatılmağa razılıq verdim. 1991-ci ilin  avqustunda məzuniyyətə çıxdım və parlament binasının 11-ci mərtəbəsində mənə verilmiş otaqda işləməyə başladım. O zaman Ali Sovetdə hüquq şöbəsinin müdiri işləyən Şahin Əliyevin rəhbərliyi ilə İlqar Qurbanov, Niyazi Səfərov adlı əməkdaşlar da mənə yardım edirdi. İlk Müdafiə nazirimiz general  Valeh Bərşadlı həmin vaxt mülki müdafiə qərargahında çalışan rəhmətlik Şikar Şikarovu da bizə dəstək vermək üçün göndərdi. Bu minvalla Azərbaycan Milli Ordusunun ilk qanunvericilik bazasını hərbçi olaraq əsasən Şikarla ikimiz hazırlayıb sonradan Ali Sovetdə müzakirəyə çıxarılmasına nail olduq...

 

Şikar Şikarovu öz peşəsini sevən  vətənpərvər və cəsarətli bir zabit kimi tanıdım. 1992-ci ilin fevralında mən müdafiə nazirinin köməkçisi - şəxsi heyətlə iş idarəsinin rəisi vəzifəsində xidmət edəndə Nəcməddin Sadıkova 703-cü briqada yaratmaq tapşırılmışdı. Biz ona nazirlikdə bir otaq vermişdik. O zaman artıq Baş Qərargah rəisinin müavini vəzifəsində çalışan Şikar Şikarov Nəcməddinlə tanış oldu. Və bir gün  dedi ki, kabinetdə oturmaq mənlik deyil, mən də Ağdərə istiqamətində genişmiqyaslı hücum əməliyyatlarında iştirak etmək üçün nazirlikdəki vəzifəmdə qalmaqla ezamiyyətlə Nəcməddin Sadıkovun komandiri olduğu 703-cü briqadaya qərargah rəisi kimi yollanacam. Dediyi kimi də etdi, rəhbərlikdən heç bir göstəriş olmadan tam könüllü şəkildə ön xəttə yollandı.  Cəhbədə olduğu ilk vaxtlar Şikarla telefonla əlaqə saxlayırdıq, arada işlə bağlı Bakıya gəlib-gedirdi; deyirdi ki, hər şey yaxşıdır, tezliklə torpaqlarımızı azad edəcəyik...

 

Goranboy-Ağdərə istiqamətində əsas əməliyyatlar iyunun 12-də başladı, ertəsi gün isə, təəssüf ki, Şikar Şikarovun şəhid olması haqda xəbər yayıldı. Onun meyitini Təzə Pir məscidində özüm qarşıladım. Kəfənlənməsində, dəfnində birbaşa iştirak etdim.  Sol tərəfdən ürəyinin yanında bir qəlpə yarası olduğunu gözlərimlə gördüm. Sonradan məlum oldu ki, Şikar Şikarov briqada qərargah rəisi kimi əməliyyat planını dəqiqləşdirmək  üçün avtomobillə döyüş cəhbəsinin ön xəttinə yollanıb. Həmin vaxt düşmənin artilleriya mərmisi birbaşa avtomobilin üzərinə düşüb. Sürücüsü qəlpə yaraları ilə qurtula bilsə də, qəlpələrdən biri Şikarın ürək nahiyəsindən dəydiyindən o, şəhid olub. Şikarın həlak olma şəraiti bir çoxları kimi mənim üçün də müəmmalı qaldı. Ümumiyyətlə, 1992-ci ilin iyun ayının 12-13-dən başlayaraq  Milli Qəhrəmanlar Şikar Şikarov, Allahverdi Bağırov, ilk təyyarəçilərimizdən Vaqif Qurbanovun, daha sonra iyunun 18-də Şirin Mirzəyevin həlak olması, iyunun 28-də Fred Asifin minaya düşməsi sanki Rusiya və Ermənistan kəşfiyyatlarının daxilimizdəki xəyanətkarlar vasitəsilə təşkil etdiyi bir qətliam ssenarisinin tərkib hissəsi idi. Həmin vaxt dediyim kimi, sonradan 27 ildən çox Baş Qərargah rəisi olmuş Nəcməddin Sadıkov Qarabağda briqada komandiri idi... Maraqlıdır ki, artıq 2020-ci ilin iyulunda milli qeyrətli generalımız Polad Həşimov da Tovuz istiqamətindəki müdafiə döyüşləri zamanı ermənilərin sanki əvvəlcədən koordinatları verilmiş dəqiq artilleriya zərbəsi nəticəsində həlak oldu...

 

 

Sultan Laçın