-FİKİR SAVAŞI-

 

“Modern” medianın təlblərinə uyğun olaraq ölkəmizdə də bir sıra sayt, telekanal, “You Tube” kanal, qəzetlər və s. gündəlik olaraq ağına-bozuna baxmadan, “sensasion”, “şok” xəbərlər axtarışındadır...

*** ***

Təəssüf ki, bu basabasda milli maraqlar, geo-siyasi, geostrateji dövlət maraqları, milli, dini dəyərlərə sayğı və s. amillər ən son plana atılır...

 

*** ***

Mediamızda Rusiyanın artıq  3 aya yaxındır sürən Ukraynaya təcavüzü ilə müşayiət olunan savaş haqda da xəbərlər, təbii ki, üstünlük təşkil edir...

 

*** ***

Düzdür, Azərbaycanın əksər media vasitələri Ukrayna savaşı haqqındakı xəbərləri haqq-ədalət meyarlarına uyğun olaraq haqsız, amansız və məkrli təcavüzə uğramış ölkənin yanında olaraq təqdim edirlər...

 

*** ***

 

Fəqət, bəzən həmkarlarımız Rusiyanın hücumları haqda xəbərləri elə şişirdirlər ki... Oxuyana, baxana, dinləyənə elə gəlir ki, artıq Ukrayna bitdi, tam işğal olundu, Ukrayna dövlətçiliyi yox oldu və Putin bir neçə günə bütün postsovet məkanını, o cümlədən Azərbaycanı işğal edərək SSRİ-ni doğrudan da bərpa edəcək...

 

*** ***

 

Demirik ki, əksəriyyət belə xəbərləri məhz Rusiya, Putin xofunu gücləndirmək məqsədi ilə tirajlayır... Hərçənd və nə yazıqlar ki, belələri də yox deyil... 

 

*** ***

 

Sözsüz ki, belə xəbərlər dost Ukrayna kimi, bizim də, Azərbaycan, eləcə də qardaş Türkiyənin və təbii ki, digər keçmiş sovet ölkələrinin və ümumiyyətlə, bütövlükdə bəşəriyyətin maraqlarına xidmət etmir...

 

*** ***

 

Elə çıxmasın ki, biz xəbər, reportaj, müsahibə və s. yazılarımızda Ukrayna tərəfinin işğalçı Rusiyaya qarşı savaşdakı uğurlarının şişirdilməsi tərəfdarıyıq. Xeyr, bu, əvvəla, jurnalist, yazar əxlaqına uyğun deyil, ikincisi də, Ukrayna xalqı kimi, heç Azərbaycan və s. ölkə xalqlarının da hazırkı Kreml hakimiyyətindən gözlənilən təhlükələrdən arxayın salmaq da regional və qlobal geo-siyasi maraqlara xidmət etmir...

 

*** ***

 

Amma maksimum çalışmaq lazımdır ki, oxucuya, dinləyici və tamaşaçıya Rusiya imperiyasının nəinki bu saat Ukraynada, ümumiyyətlə, keçmişdə və indi bütün dünyada, o cümlədən Azərbaycanda və ayrıca Qarabağda törətdiyi faciələri, işğalları və s. həddindən artıq qorxunc formada təqdim etməyək...

 

*** ***

 

Məsələn, o gün səhər saat 6-7 radələrində Ukrayna saytlarında Rusiya ordusunun Odessaya 7 raket atması haqda xəbərlər gözümə dəydi. Həmin informasiyanı digər saytlardan öncə hay-küylü bir başlıqla təqdim etmək şansım ola-ola bunu etmədim. Çünki düşündüm ki, bu, oxucularımızda, xüsusən də saytlarımızı daim izləyən Ukraynadakı soydaşlarımızda sübh tezdən Putinizm xofunu gücləndirməklə onlara bədbinlik, pessimizm ruhu aşılaya bilər.

 

*** ***

 

Təəssüf ki, bir neçə saat sonra bəzi media vasitələri həmin xəbəri elə hay-küylə verdi ki: “Rusiya bu gecə Odessanı 7 raketlə vurdu! Dəhşətli dağıntılar, ölən və yaralananlar...” Və sözsüz, bunları oxuyanda, dinləyəndə elə təəssürat yarandı ki, “vəssəlam, Odessa da darmadağın oldu, Rusiya tezliklə bu şəhəri də işğal edəcək...”

 

*** ***

Halbuki, bəhs edilən xəbəri xeyli sakit tonlu başlıqla, məsələn, sadəcə: “Rusiya Odessaya yenidən raket atdı...” kimi vermək olar. Çünki Kremlin təcavüzkar siyasətini də daim ifşa etmək, 20 Yanvardakı, Xocalıdakı kimi Buçadakı, İrpendəki, Mariupoldakı qətliamları da gündəmdə saxlamaq gərəkdir...

 

*** ***

 

Onu deyək ki, Rusiya xofunu daim keçmiş Sovet İttifaqı və ətraf qonşu ölkələrin əhalisinin canında saxlamaq taktikası artıq 300 ildən çoxdur ki, gündəmdədir... Və həmin xof artıq 4-cü əsrdir ki, bu imperiyanın təcavüz təhlükəsi ilə üz-üzə qalan Azərbaycan xalqının, demək olar ki, geninə hopdurulub... Burada da məhz yanlış və ya məqsədli şəkildə yönləndirilən informasiya və şayiələrin önəmli rolu olub... Bu işdə sapı özümüzdən olan baltaların, yəni  Rusiya köləliyindən ötrü sinov gedən xəyanətkarların, çağdaş siyasi leksikonla desək, “5-ci kalon”un da üzdəniraq xidmətləri böyükdür. Bu gün də digər possovet və postsosialist məkanlarındakı bu cür  Rusiyayönlü  qüvvələr eyni maraqlara xidmət edir və var qüvvələri ilə “Rusiyanın Ukrayna ilə savaşda qələbə çalacağını, Qərbin sanksiyaları qarşısında çökməyəcəyini, əksinə, nə yolla olursa-olsun, hətta nüvə müharibəsi hesabına olsa, Avropa və ABŞ-ı məğlub edəcəyini” təbliğ edirlər...

*** ***

 

Nə yazıqlar ki, bu saat sosial şəbəkələrin Azərbaycan seqmentində Putin rejimi tərəfindən  Ukraynanın amansız və məkrli işğalına haqq qazandıranlar və bunu alqışlayanlar var.  Luqansk şəhərinin işğalçılar tərəfindən “Voroşilovqrad” adlandırılmasına ürəkdən sevinən bir para azərbaycanlılar(?), yəqin ki, Rusiyanın Azərbaycanı işğal edib Bakını “Putinqrad” adlandırmasını da o qara qəlblərindən keçirirlər... Yazıqlar olsun...

*** ***

 

Bütün deyilənləri  nəzərə alaraq bir vətəndaş və yazar, jurnalist olaraq Ukraynadakı savaşdakı hər bir xəbər və yazımızı  Ukrayna xalqının qələbəsinə və digər ölkələrlə yanaşı, Azərbaycanın da Rusiya “5-ci kalon”undan, o cümlədən “KQB”-“FSB”-“QRU”-“PKK”-korrupsiya şəbəkəsindən tam qurtulmasına yönəltməliyik...

*** ***

 

Şükürlər olsun ki, 2020-ci ilin 44 günlük savaşı zamanı Ermənistan tərəfdən döyüşlərə atılan Rusiya silah və texnikalarını məhv etməklə Azərbaycan ordusu, Ukraynaya təcavüzü zamanı Rusiya ordusu haqdakı mifləri darmadağın etməsi ilə də Ukrayna ordusu əsrlərdən bəri Kremldən qaynaqlanan XOFU tam sarsıdıb...

**** ***

 

Digərləri kim, bu xalq da yazıqdır: son 200-300 ildə ilk dəfə Rusiya xofundan tam qurtulmaq şansı əldə edib...

 

Sultan Laçın