"İsrail Livanın cənubundakı şəhərləri məqsədyönlü şəkildə məhv edir" - BBC

"BBC Verify" peyk görüntüləri və videolar sistemli məhv iddialarını ortaya qoyur..."

Israil Livanın cənubunda yerləşən şəhər və kəndləri məqsədyönlü şəkildə dağıdır.

Moderator.az xəbər verir ki, bu barədə "bbc.com" nəşri yazıb.

Kütləvi dağıntılar və hərbi əməliyyatlar

Nəşr yazır ki, martın 2-dən bəri aparılan əməliyyatlar nəticəsində 1400-dən çox binanın məhv edildiyi bildirilir. Peyk görüntüləri və təsdiqlənmiş videolar bir sıra yaşayış məntəqələrində eyni vaxtda həyata keçirilən nəzarətli partlayışları göstərir. Əməliyyatların "Hizbullah" infrastrukturuna qarşı yönəldiyi iddia edilir.

"Təhlükəsizlik zonası" planı və genişlənən əməliyyatlar

İsrail müdafiə naziri Israel Kats sərhədə yaxın ərazilərdə "Qəzza modeli" üzrə dağıntıların sürətləndirilməsi barədə göstəriş verib. Baş nazir Benyamin Netanyahu isə bu addımların məqsədinin sərhəd boyunca "təhlükəsizlik zonası" yaratmaq və İsrailə qarşı potensial hücumların qarşısını almaq olduğunu bildirib. "BBC Verify"-nin analizinə görə, ən azı yeddi sərhəd şəhər və kənddə koordinasiyalı partlayışlar və genişmiqyaslı söküntülər qeydə alınıb.

İtkilər, köç və beynəlxalq hüquq mübahisəsi

BMT-nin Humanitar Məsələlərin Koordinasiyası İdarəsinin məlumatına görə, Livanda 1, 2 milyondan çox insan evlərini tərk etməyə məcbur olub, onların böyük hissəsi ölkənin şimalına və ya Suriyaya köçüb. Ölənlərin sayı 2 mini keçib. İsrail tərəfi isə əməliyyatların yalnız hərbi zərurət və "Hizbullah"ın mülki ərazilərdə yerləşdirdiyi hərbi obyektlərə qarşı yönəldiyini bildirir.

Lakin beynəlxalq hüquq ekspertləri bildirirlər ki, yaşayış məntəqələrinin bu miqyasda məhv edilməsi ciddi hüquqi suallar yaradır və bəzi hallarda "müharibə cinayəti" kimi qiymətləndirilə bilər. Onların fikrincə, təhlükəsizlik məqsədilə belə, bütöv kəndlərin dağıdılması hüquqi baxımdan əsaslandırıla bilməz və mülki əhalinin kollektiv şəkildə cəzalandırılması riski daşıyır.