"Si Tszinpin üçün Tramp hörmətli rəqib, Putin isə kiçik tərəfdaşdır" - "Deutsche Welle"

"ABŞ-Çin rəqabəti fonunda Rusiyanın Pekindən asılılığı dərinləşir..."

Rusiyalı jurnalist Konstantin Eggert hesab edir ki, Pekin Ukrayna müharibəsində balansı qorumağa çalışır - nə Rusiyanın uduzması, nə də qalib gəlməsi Çinə sərf edir.

Moderator.az xəbər verir ki, bu barədə "dw.com" nəşri yazıb.

Çinin əsas hədəfi: nə qələbə, nə məğlubiyyət

Bu kontekstdə Si Tszinpin və Donald Tramp arasında gözlənilən görüş xüsusi əhəmiyyət daşıyır. Müəllif vurğulayır ki, Si Tszinpin Tramp ilə danışıqlardan əvvəl Vladimir Putin ilə mövqelərini koordinasiya etməyəcək. Bu isə Pekinin Moskva ilə münasibətlərdə formal yaxınlığa baxmayaraq, strateji müstəqilliyini qoruduğunu və müstəqil xətt yürütmək istədiyini göstərir.

ABŞ-Çin dialoqu: rəqabət və qarşılıqlı asılılıq

Tramp Çinə rəqib kimi gedir, amma bu, hörmət edilən rəqibdir. Dünyanın iki ən böyük iqtisadiyyatı arasında ticarət dövriyyəsi təxminən 600 milyard dollardır və bu qarşılıqlı asılılıq dialoqu zəruri edir. Trampın gündəmində ticarət mübahisələri və Çinin İrana dəstəyi dayanırsa, Si Tszinpin üçün əsas məsələ Yaxın Şərqdə sabitlik və enerji axınının qorunmasıdır. Etimad aşağı səviyyədə olsa da, Çin üçün ABŞ-la anlaşmaq alternativsizdir, çünki həm iqtisadi, həm də hərbi baxımdan hələ də zəif tərəfdir.

Rusiya Çindən asılıdır və bu, Pekinə sərf edir

Moskva ilə Pekin "strateji tərəfdaşlıq"dan danışsa da, bu münasibət bərabər deyil. 2022-ci ildən sonra Vladimir Putin Rusiyanı faktiki olaraq Çindən asılı vəziyyətə salıb. Rusiya xammal ixrac edir, əvəzində texnologiya idxal edir və sanksiyalardan yan keçmək üçün Çinə güvənir. Müəllifə görə, Trampın Rusiyanı Çindən uzaqlaşdırmaq planları real deyil. Çin üçün ən əlverişli ssenari isə uzanan müharibədir - bu halda Rusiya zəif və asılı "kiçik tərəfdaş" kimi qalır.