Moderator.az xəbər verir ki, bu barədə Türkiyənin "Cumhuriyet" nəşri yazıb.

 

Belə şəraitdə Vaşinqtona təcili olaraq öz müttəfiqini xilas etmək qalır. İsrail hazırda "növbəti günün" böhranını yaşayır.

 

Hərbi kabinetin naziri, sabiq müdafiə naziri Beni Qants iyunun 8-dək baş nazir Binyamin Netanyahunun HƏMAS qruplaşması ilə müharibə bitəndən sonra Qəzza bölgəsində fəaliyyət planını təklif etməyəcəyi təqdirdə istefa verəcəyi ilə təhdid edib.

 

İsrail KİV-ləri Qantsın güzəştsiz mövqeyini Netanyahu üçün təhlükə kimi dəyərləndirib. 

 

Nazir eyni zamanda baş nazirlə Qəzza bölgəsinin idarə edilməsi məsələsində razı olmayan İsrail müdafiə naziri Yoav Qalanta dəstəyini ifadə edib. Qalantın nöqteyi-nəzərini İsrail mətbuatı Netanyahuya meydan oxumaq kimi şərh edib. 

 

 

İsrail müdafiə naziri mayın 15-də mətbuat konfransında Qəzzada hərbi administrasiyanın yaradılmasına qarşı çıxıb. 

 

"Ordunun planı müzakirəyə çıxarılmayıb, bundan pisi isə heç bir alternativin təklif edilməməsidir", - Qalant deyib və Netanyahunu çətin vəziyyətə salıb.

 

Baş nazir cavabında deyib: "Nə qədər ki, HƏMAS var, Qəzzada idarəçiliyi heç kim, üstəlik də Fələstin administrasiyası öz üzərinə götürməyəcək". 

 

Netanyahu vuğulayıb ki, Qəzzada sabah nəyin baş verəcəyini müzakirə etməyin mənası yoxdur. 

 

 

İsrail kabinetində böhranlı vəziyyət bununla məhdudlaşmır. İrqçi ovqatda olan Milli Təhlükəsizlik naziri İtamar Ben-Qvir hərbi kabinetin üzvü və İsrailin sabiq Baş Qərargah rəisi Hadi Ayzenkotla toqquşub, üstəlik, Ayzenkot hətta ona yumruq silkələyib!

 

Kabinetin iclasında Ayzenkot hökuməti "strateji qərarları qəbul etməməkdə" ittiham edib və bəzi təkliflərini sadalayıb.

 

Ben-Qvir müdaxilə edərək deyib: "General, biz Sizi kifayət qədər dinləmişik". Buna cavab olaraq Ayzenkot deyib: "Sözümü kəsməyin" və nazirdən "sərhədi keçməməyi" xahiş edib. 

 

Onların arasında söz atışması daha da qızışıb, bundan sonra Ayzenkot Ben-Qviri fərari adlandırıb və ona yumruq silkələyib.

 

 

İsrail kabibetində böhran və onun üzvləri arasında münaqişə əlbəttə ki, Təl-Əvivin işlərinin o qədər də yaxşı olmadığı ilə bağlıdır. Fələstin udur, İsrail isə uduzur.

 

Mən anlayıram, Fələstinin qələbəsi xüsusilə Qəzza bölgəsində dağıntılara baxanda dumanlı görünür. Lakin strateji müstəvidə gerçəklik belədir.

 

Zatən, Mossadın sabiq direktor müavini Ram Ben Barak bu günlərdə oxşar nəticəyə gəlib:

 

"Bu, məqsədi olmayan savaşdır və biz bu savaşı açıq-aşkar uduzuruq. Biz həmçinin beynəlxalq aləmdə də uduzuruq. Bizim ABŞ-la münasibətlərimiz ciddi şəkildə pisləşir. Biz Qəzza bölgəsində savaşı uduzmuşuq, İsrail iqtisadiyyatı isə dağılır".

 

 

Xatırlayırsınızsa, oktyabrın 7-dən sonra ABŞ-ın öz hərbi gəmilərini regiona göndərəndə amerikalıların "Böyük Yaxın Şərq" layihəsini başa çatdırmaq, İrana zərbə endirmək və regionun xəritəsini yenidən müəyyən etmək niyyətində olduğu barədə fikirlər səsləndirilib.

 

Lakin biz bununla razılaşmırdıq və qeyd edirdik ki, əksinə, gəmilər hücum etmək üçün deyil, İsraili müdafiə üçün gəlir. 

 

Bu arada isə ABŞ-İsrail-İran üçbucağında çoxsaylı qarşılıqlı toqquşmalar baş verib, o cümlədən Tehran ilk dəfə olaraq İsrailə zərbə endirib. Lakin Vaşinqton son nəticədə öz hegemonluğunun zəifləməsi səbəbindən gərginliyin bundan sonra da eskalasiyasından yan keçir. 

 

Bu gün vəziyyət necədir? İsrail mətbuatının məlumatına görə, ABŞ və İran nümayəndələri Omanda gizli görüş keçirib.

 

Amerika nümayəndə heyətinin tərkibinə Ağ Evib Milli Təhlükəsizlik Şurasının Yaxın Şərq və Şimali Afrika üzrə əlaqələndiricisi Brett Makqerk, habelə İran üzrə xüsusi nümayəndənin müavini Abram Peyli daxil olub. 

 

Başqa sözlə desək, Birləşmiş Ştatlar İranla münasibətləri kəskinləşdirməyə deyil, böhranı yumşaltmağa və güzəştlər axtarmağa məcburdur.