İqtisadçı ekspert Akif Nəsirli Moderator.az-a bir müəllif yazısı göndərərək saytda yerləşdirilməsini xahiş edib:

Azərbaycan ərazisində tutulma şəraiti barədə ziddiyyətli xəbərlər yayılan Ermənistan diversantı Karen Petrosyanın ölümü bəzi vətəndaşlarımızı sevindirsə də, məni çox məyus etdi. Çünki əsiri öldürmək çox asan olduğu kimi, beynəlxalq aləm qarşısında onun məsuliyyətindən yaxa qurtarmaq, ləkəsini silmək olduqca çətindir. Budur, artıq ilkin nəticə reallaşmaqdadır. Belə ki, Ermənistan avqust ayının 7-də əsir düşən və bir gün sonra ürək çatışmazlığından dünyasını dəyişən hərbçisinin ölümünə görə Azərbaycana qarşı cinayət işi qaldırıb. Bu isə istər-istəməz ölkəmizin əleyhinə işləyən faktlardan biri kimi formalaşmağa başlayacaq. 

Sösüz ki, qarşı-qarşıya döyüşlərdə düşmənə nə qədər ağır itki verdirsək də, buna görə bizi heç kim qınaya bilməz. Amma ələ keçirilmiş canlı əsirin ölümü artıq bizim üçün problemdir. Bu problemi bir qədər də çətinləşdirən bizim maymaqlığımız və məsuliyyətsizliyimizdir. Bu maymaqlıq və məsuliyyətsizliyimiz isə aşağıdakılardan ibarətdir:

 Əvvala, yuxarıda qeyd etdiyimiz kimi, əsirin ölümü bizim əleyhimizə işləyən məsələdir, əgər ölümün səbəbi bizimkilər tərəfdən verilən işgəncədirsə, bu vəziyyəti bir qədər də mürəkkəbləşdirir. Yox, əgər əsirin ölümünün səbəbi ona verilən işgəncələr deyilsə, onda bunu sübut etmək üçün meyitin ekspertizasına beynəlxalq ekspertlər dəvət etmək lazım idi. Ölkə mətbuatını diqqətlə izləyən bir şəxs kimi, bu barədə heç bir informasiya rast gəlməmişəm. Heç olmasa bu barədə manipulyasiya xəbərləri yaymaq olardı ki, erməni diversantının meyitinin ekspertizasına beynəlxalq ekspertlər cəlb edilib. Bizdə bu da yoxdu. Amma əslində bu işin çözülməsində Azərbaycan tərəfi tam şəffaflığı təmin etməlidir ki, əsirlə kobud davranan bir ölkə kimi hansısa beynəlxalq təşkilatın hesabatında yer almasın. 

Ermənilər isə hadisənin birinci həftəsində bizə qarşı cinayət işi qaldırdı. Bu cinayət işinə isə bizim heç bir kompromatımız, əks addım imkanımız qalmayıb. Çünki biz vaxtında erməni diversantının ölümündə günahkar olmadığımızı sübut etmədik. Bəlkə də bu, erməni tərəfinin təxribatı idi ki, iki günlük müddəti olan bir vaksini özündən xəbərsiz diversantına vuraraq biz tərəfə göndərib. Bir gün keçəndən sonra diversant ölür və ermənilər bununla bizi şərləyir. Lakin bu mənin düşündüyüm bir versiyadır, əgər belədirsə, bunun da sübuta ehtiyacı var. 

Bu məsələnin bir tərəfi, digər tərfdən isə ermənilər də analoji səhvi bir ay əvvəl buraxdılar. Belə ki, Kəlbəcərdə girov düşmüş üç Azərbaycan vətəndaşından biri olan Həsən Həsənovu öldürdülər. Digərlərinə qarşı isə ağır işgəncələr verildiyi barədə xəbərlər almaqdayıq. Bəs biz ermənilərin bu vəhşiliyinə qarşı hansı tədbirlər gördük? Yalnız Beynəlxalq Qırmızı Xaç Komitəsinin Ermənistan nümayəndəliyini ictimai qaydada qınamaqdan başqa ağlımıza heç nə gəlmədi. "Qaçqınkom"un sədri Əli Həsənov və Şuşa şəhər icra hakimiyyətinin başçısı Bayram Səfərov isə cəmiyyətə xoş xəbər verirmiş kimi, biri deyir əsirlərin qulağını kəsiblər, digəri isə iddia edir ki, gözünü çıxarıblar. Bu informasiyaları erməni tanışlarınızdan alıb, ictimailəşdirmək çox azdır, bir məmur olaraq xalqınıza xidmət etmək istəyirsinizsə, bu informasiyalar əsasında adekvat tədbirlər görün! Ermənistanı heç olmasa hüquqi müstəvidə nokauta salın! Ermənilər belə faktları əldə çıraq gəzdikləri halda, bizdə bunun üçün kifayət qədər faktlar var. Müharibə etməyə dünya imkan vermir, bunu başa düşürük, bəs nə üçün hüquqi müstəvidə ərazilərimizin 20 faizini işğal altında saxlayan Ermənistanı özümüzdən qabağa buraxırıq, bu səhədə də onlara uduzuruq?

Bütün bunları görərək düşünürəm ki, biz hələ də maymaq xalq, maymaq dövlət və maymaq hökumətik. Çox təəssüflər olsun ki, bir vaxtlar dünyaya meydan oxuyan monqol xalqı indi ən küt xalq "brend"i yaratmaqla monqol xanlarının tarixdə adlarını batırdığı kimi, biz də türk xaqanları olan babalarımızın ruhunu utandırmaqdayıq...

Akif Nəsirli