1959-cu ildə Azərbaycan Yazıçılar İttifaqına üzv olmuşam və bu günədək həmin qurumun varisi Azərbaycan Yazıçılar Birliyinin üzvü olaraq qalmışam. Müstəqillik dönəmində AYB qurultaylarının hamısına dəvət olunsam da, sonuncu, XII Qurultaya dəvət olunmadım. Qəribədir, hər il AYB üzvlərinin latın qrafikası ilə çap olunan əsərlərinnin arasında mənim - digərlərini demirəm - “Fətəli fəthi” tarixi romanım da yoxdur. Nəzərə alaq ki, AYB məni rəsmən öz sıralarından çıxardığını elan etməyib, hələ də AYB üzvü sayılırdım. Onu da deyim ki, AYB rəsmiləri 85 illiyimə mənə təbrik teleqramı belə göndərmədilər...

Göstərdiyim səbəblərə görə artıq özümü AYB üzvü kimi hiss etmirəm - Azərbaycan Yazıçılar Birliyindən istefa verirəm.

“Yeni Müsavat” son istefa və qurultay sonrası təəssüratlarını öyrənmək üçün Anarla yenidən əlaqə saxlayıb. Anar müxbirimizlə söhbətində deyib ki, AYB-nin Moskva bölməsinin sədri, professor Tofiq Məlikli bu məsələ ilə bağlı media orqanlarından birinə açıqlama verib. Müsahibimiz həmin açıqlamada hər şeyin əks olunduğunu söyləyib. 

Qurultayı necə qiymətləndirməsinə gəlincə, Anar “Mən çox müsbət qiymətləndirirəm. Əsas odur ki, siz necə qiymətləndirirsiz” deyə vurğulayıb. 

Qurultayda və ondan sonra mətbuatda sərt çıxışı ilə yadda qalan tanınmış şair Məmməd İsmayılın dediklərinə gəlincə, Anar bildirib ki, M.İsmayıl Azərbaycanın çox gözəl şairidir və ona hər zaman hörmət edib: “Onu qurultaya biz dəvət eləmişik. Bundan əvvəl onun yubileyini biz keçirmişik. Azərbaycanda onun üzünə açıq olan bəlkə də yeganə qapı Yazıçılar Birliyinin qapısıdır. O, bu fikirləri söyləyibsə bu, onun öz işi, vicdan işidir”. 

Qurultaysonrası tənqidlərə gəlincə, Anarın sözlərinə görə, hələ mətbuatda yazılan tənqidlərlə tanış deyil: “Amma bilirəm ki, əsasən ”Yeni Müsavat" qəzetindən gələcək tənqid". 

F.Qoca bildirib ki, AYB-də heç kimi zorla saxlamırlar: “Azərbaycan Yazıçılar Birliyinin qapısı var. O, bu qapını tanıyır. Gələ də bilər, gedə də, biz nə deyə bilərik? Bu cəmiyyətdə üzvlük könüllüdür. Çingiz müəllimə görə, bu qədər insan selinin üstündən xətt çəkə bilmərik”. 

Yazıçı Çingiz Hüseynovun Azərbaycan Yazıçılar Birliyindən istefa verməsinə münasibət bildirən AYB-nin Moskva bölməsinin sədri, professor Tofiq Məlikli “525"in əməkdaşına açıqlamasında bu hadisə ilə bağlı təəccüb və təəssüfünü ifadə edib: ”Təəccüblənməyimin bir neçə səbəbi var. Əvvəla, bundan öncəki qurultayın qərarına və nizamnaməyə görə, bölmələr öz aralarında nümayəndələrini seçirlər. 

Azərbaycan Moskva bölməsinin iclasında iki nəfər -mən və İlham Bədəlbəyli nümayəndə seçilib.

Bizim bölmə yarandığı zaman Çingiz Hüseynova müraciət etmişik, bizim bölmənin üzvü olub və sonra imtina edib. 2006-cı ildən bu yana bizim təşkilatın fəaliyyətində bu və ya digər şəkildə iştirak etməyib. O, həmişə özünü Rusiya Yazarlar Birliyinin nümayəndəsi  kimi qələmə verib. Hətta bizim təşkil etdiyimiz tədbirlərdə belə Rusiya Yazarlar Birliyinin nümayəndəsi olduğunu bizə çatdırmağa çalışıb. Digər bir məqam ondan ibarətdir ki, Çingiz Hüseynov aylar öncə Moskvadan İsrailə köçüb. Bizimlə də heç bir əlaqəsi yoxdur. Bütün bunları nəzərə alıb sual edirəm: hansı qanunlara və qaydalara görə biz onu namizəd göstərməliydik və nümayəndə seçməliydik? Qəribə burasıdır ki, istefa verməsini AYB-nin  Rusiya bölməsinə, yaxud Yazıçılar Birliyinə ünvanlamır, bu barədə Azadlıq Radiosuna məlumat verir.

Yəni mən onun bu addımında bir az təxribat və aranı qarışdırmaq havası olduğunu hiss eləyirəm. Mənə elə gəlir ki, istefa bəyanatının verilməsində bu hava öz rolunu oynayıb. Hörmət etdiyim ağsaqqal yazıçımızın bu hərəkətini heç cür başa düşmürəm və təəssüf edirəm. Bunun kiminsə tərəfindən yanlış yönləndirmə olduğunu düşünürəm. Onun çıxışına tam qulaq asmadığımdan mənə verilən məlumata dayanaraq bəzi şeyləri dəyərləndirirəm. Görünür, onun qurultaya dəvət edilməməsi, kitabının latın qrafikası ilə çap olunmaması, başqa istəklərinin həyata keçməməsi bütün narazılıqlarını bir yerə toplayıb. Amma fikrimcə, bu narazılıqlar yersizdir, bu narazılıqların altında nə isə başqa bir cəhət dayanır".

Musavat.com