“Əgər bir ölkədə ki, ölkə rəhbərliyinin yanında işləyən məmurlar vətəndaşın, Xalq şairinin sözünü, müraciətini ondan gizlədirlərsə, vəziyyət bu cür  olacaq”

 

Bunu Moderator.az-a açıqlamasında Xalq şairi Vahid Əziz deyib. Xalq şairi bölgələrdə  qazi və şəhid ailələrinə qarşı hörmətsizlik edən məmurları sərt tənqid edib:

 

“Bölgələrdə yerli məmurların şəhid və qazi ailələrinə qarşı özbaşınalıq etməyinin səbəbləri var. Bu gün 6 icra başçısı həbsdədi, bir neçəsinin isə vəziyyəti “xarabdı”. Bütün bu özbaşınalıqların səbəbi ondan ibarətdir ki, illər boyu jurnalistlərin, özünü ləyaqətli hesab edən insanların yazdığı tənqidi yazılara, haraylara fikir verilmədi, məhəl qoyulmadı. Qəzetlər bu problemi yazdılar, amma “yuxarıda” oturan bəziləri dedilər ki, bunlar bizim düşmənimizdir. Vahid Əzizin dediyini düşmən sözü kimi qələmə verdilər. Prezidentdə yazılan məktubları ondan gizlədirlər. Bunu ölkə başçısı özü dəfələrlə qeyd edib. Əgər bir ölkədə ki, ölkə rəhbərliyinin yanında işləyən məmurlar vətəndaşın, Xalq şairinin sözünü, müraciətini ondan gizlədirlərsə, vəziyyət bu cür  olacaq. Söhbət bundan gedir. Bu gün 6 icra başçısı rüşvət aldığına görə həbsdədir”. 

 

Xalq şairi deyib ki, ölkə başçısı bir gün bunun hesabını onlardan soracaq:

 

“Ölkə başçısının başı indi Qarabağa, daxili təxribatlara, namərdlərə, şərəfsizlərə qarışıb. Biri gedib Londonda, digəri isə Amerikada ev alır. Niyə bu məmurlar Azərbaycanı talayırlar? Ona  görə həmişə demişəm ki, Qarabağa asfalt yol çəkən erməni Azərbaycan xalqının pullarını talayan məmurlardan daha ləyaqətli adamdır. Bütün bu özbaşınalıqlar ona görə baş verir. Jurnalistlərin özlərini dördüncü hakimiyyət sayırlar, amma onların qaldırdığı problemlərə baxan yoxdur. Yadımdadır ki, Heydər Əliyevin vaxtında Mərkəzi Komitədə işləyirdim. Onda adicə bir qəzet məqaləsinə görə Mərkəzi Komitənin plenumu çağırılırdı və o məsələ müzakirə olunurdu. Amma indi heç görmüsünüz ki, Azərbaycanda bir qəzet məqaləsinə görə onu müzakirə ediblər? Əlbəttə, yox. Çünki bunu gizləyirlər və vəzifədə olan da öz yaramazlarıdır”. 

 

Xalq şairi bu cür məmurların vətənpərvər Azərbaycan insanını ruhdan saldığını bildirib:

 

Əgər Hərbi Səfərbərliklərdə, İcra Hakimiyyətlərində, bələdiyyələrdə şəhid ailələrinə və qazilərə qarşı bu cür şərəfsiz münasibət varsa, bu o deməkdir ki, həmin məmurlar mütləq baş verə biləcək üçüncü Qarabağ savaşında bizi qələbəyə yox, məğlubiyyətə hazırlayırlar. Çünki adamları iyrəndirib, bezdirirlər. İllərlə mənim özümü dövlət başçısının yanında gözdən sadılar. Amma çox sağ olsun ki, yaxşı adamlar mənim necə bir vətənini sevən adam olduğumu ölkə başçısına dedilər. Ondan sonra prezident mənə Xalq şairi fəxri adını verdi. Amma indi bəzi dövlət qurumlarına zəng vururam, telefona cavab verən yoxdur. Qarabağ müharibəsində əlil olan vətəndaş bir gün o məmurların üz-gözünü cıracaq. Kabinetlərdə bu şərəfsizləri kürsüdən tullayacaqlar. Bütün baş verənlərin əsas səbəblərin biri də yüksək vəzifə tutan bəzi şərəfsiz məmurların illər boyu yeritdiyi yarıtmaz kadr siyasətinin nəticəsidir. Bunlar ancaq heç bir həyat təcrübəsi olmayan qohum-əqrabalarını vəzifəyə qoydular”.