“Fuadla 1964-ci ildə tanış olmuşuq. Bir müddətdən sonra bu tanışlıq dostluğa çevrilib. Bir xeyli dostluq edəndən sonra da dostluğumuz qardaşlığa çevrilib. Fuad bu dünyaya xoş gəlib, səfa gətirib. Sizdən bir az əvvəl zəng vurub onu təbrik elədim. Dedim ki, həmişə sən gələsən, ay Fuad! Dostumu bir daha təbrik edirəm. Arzu edirəm ki, bundan sonra da 20-30 il ona zəng vuranda can sağlığıyla cavab versin ki, “Boooo, bəli qardaş, bəli!”.

 

Bunu Moderator.az-a açıqlamasında tanınmış nasir, şair, tərcüməçi Seyran Səxavət bu gün doğum gününü qeyd edən Xalq artisti, Azərbaycanın görkəmli teatr və kino aktyoru Fuad Poladovu təbrik edərkən deyib. 

Nasir qeyd edib ki, Fuad Poladov çox böyük sənətkarımızdır: “Hələ təxminən 20 il bundan əvvəl S.Vurğun adına rus dram teatrında Napaleon oynayırdı. O vaxt televiziya işçiləri mənə yaxınlaşın intervyu istədi. Hələ onda demişdim ki, bu gün Fuad imperatoru oynayır, bu onunla bağlıdır ki, Fuad Poladov özü sənətin imperatorluq dövrünü yaşayır. Yəni sənətinin imperator zirvəsinə qalxıb. Fuad Poladov çox nəhəng adamdır, nəhəng adam olduğu boyda da nəhəng aktyordur. Birinci nəhəng adam həmişə ikinciyə, nəhəng aktyora kömək edib və yaxud da tərsinə. Fuaddan heç vaxt bu dünyaya gəlməyək”.

S.Səxavət daha sonra aktyorun özünə xas keyfiyyətlərindən danışıb: “Fuad Poladovu başqa aktyorlardan fərqləndirən bir xüsusiyyəti var. Bizim nəhəng aktyorlarımız var ki, onlar ancaq müəllif mətni ilə, dramaturji materialla danışırlar. Gözəl aktyorlar olsalar da özlərinin sözləri yoxdur. Fuad Poladov isə özünün sözü olan böyük sənətkardır. Sənətdə də, həyatda da hər şeyə münasibəti, mövqeyi olan sənətkardır. Məndən soruşsaydınız ki, adam Fuad Poladov böyükdür, yoxsa sənətkar Fuad Poladov? Onların heç birisini ayıra bilməzdim, onu deyərdim ki, hər iki Fuad Poladov da nəhəngdir. Sənətkar Fuad Poladovun insan Fuad Poladovla münasibətləri son dərəcə gözəldir, bir birlərini çox gözəl başa düşüblər və bu gün Azərbaycan teatr sənətinin nəhəngi olan Fuad Poladovu yaradıblar. Fuadı oynadığı rollardan, Napoleondan, Hamletdən daha böyük şəxsiyyət kimi qəbul edirəm”. 

Qeyd edək ki, bu gün Azərbaycanın görkəmli teatr və kino aktyoru, lirik-psixoloji üslublu aktyorluq məktəbinin qabaqcıl sənətkarlarından biri, fəlsəfi-dramatik və faciə rollarının mahir ifaçısı, Azərbaycan Xalq artisti Fuad Poladovun 68 yaşı tamam olur.