Məlum olduğu kimi, sentyabrın 15-dən etibarən rayon qeydiyyatında olan avtomobillər səhər saat 7:00-dan axşam saat 24:00-a qədər paytaxta buraxılmayacaq. Sözügedən qadağa bu avtomobillərin yalnız gecə saat 24:00-dan səhər saat 7:00-a qədər Bakı şəhərinə daxil ola biləcəyini nəzərdə tutur. Qeyd edilən qadağa Bakı xaric istisnasız olaraq bütün şəhər və rayonlara, eləcə də Sumqayıt şəhəri və Abşerona da aiddir.

Əlaqədar qurumlar şəhər və rayon sakinlərinə Bakıya gəlmək üçün dəmiryolu nəqliyyatı və ictimai nəqliyyat vasitələrindən istifadə etməyi tövsiyyə edib.

Maraqlıdır, məlum dəyişiklik Azərbaycan konstitusiya və qanunları ilə nə dərəcədə uzlaşır? Rayon sakinlərinin Bakıya şəxsi avtomobillə girişinə qadağa qoymaq Azərbaycan vətəndaşlarına sosial mənsubiyyətinə görə ayrı-seçkilik sərgiləmək, onları sırf Bakıda yaşamadıqları üçün cəzalandırmaq deyilmi? Niyə şəxsi avtomobili olan vətəndaş Bakıya ya dərmir yolu, ya da ictimai nəqliyyat vasitələri ilə girməlidir? Şəxsi avtomobilə malik şəxsləri ictimai nəqliyyatdan istifadəyə məcbur etmək vərəndaş hüquqlarının pozulması hesab oluna bilərmi?

“Vətəndaşları bu qadağaya əməl etməməyə çağırıram”

Moderator.az xəbər verir ki, bununla bağlı “Hürriyyət” qəzetinə açıqlama verən hüquqşünas Müzəffər Baxışov bu qadağanın ölkə konstitusiyası və qanunlarına tamamilə zidd olduğunu bildirdi:

 “Bu məsələ Azərbaycan Respublikasının Nazirlər Kabinetinin yanında Yol Hərəkəti Təhlükəsizliyi Komissiyaslnda müzakirə edilib. Komissiya belə bir qərar qəbul edib ki, Bakı şəhərindən başqa digər şəhər və rayonlarda qeydiyyatda olan nəqliyyat vasitələrinin 15 sentyabr 2015-ci il tarixindən etibarən Bakı şəhərinə girişinə qadağa qoyulsun. Həmin avomobillər Bakı şəhərinin şimal və cənub hissəsindəki xüsusi dayanacaqlarda saxlanılsın. Qadağaya görə, onlar səhər 7-dən axşam saat 12-yə qədər öz avtomobilləri ilə Bakı şəhərinə daxil ola bilməzlər.

Mən tam məsuliyyətlə bildirirəm ki, Nazirlər Kabinetinin yanında Yol Hərəkəti Təhlükəsizliyi Komissiyasının qəbul etdiyi bu qərar Azərbaycan Respublikası Konstitusiyası və qanunlarını kobud şəkildə pozulması deməkdir. Mən nəqliyyat vasitəsi rayon qeydiyyatlı olan vətəndaşlara müraciət edərək bildirirəm ki, onlar bu qərarı icra etməsinlər. Çünki bu qərarın heç bir hüquqi qüvvəsi yoxdur. Bu qərarın icrasından imtinaya görə kimsə məsuliyyətə cəlb edilə bilməz”.

“Qadağa konstitusiyanın 25 və 71-ci maddələrinə ziddir”

Hüquqşünas məlum qadağanın konstitusiyanın bir çox maddə və bəndləri ilə təzad təşkil etdiyini bildirdi:

“Konstitusiyanın 25-ci maddəsinin tələblərinə görə, hər kəs qanun və məhkəmə qarşısında bərabərdir. 25-ci maddənin üçüncü hissəsinə görə, “dövlət irqindən, milliyyətindən, dinindən, dilindən, cinsindən, mənşəyindən, əmlak vəziyyətindən, qulluq mövqeyindən, əqidəsindən, siyasi partiyalara, həmkarlar ittifaqlarına və digər ictimai birliklərə mənsubiyyətindən asılı olmayaraq hər kəsin hüquq və azadlıqlarının bərabərliyinə təminat verir. İnsan və vətəndaş hüquqlarını və azadlıqlarını irqi, milli, dini, dil, cinsi, mənşəyi, əqidə, siyasi və sosial mənsubiyyətə görə məhdudlaşdırmaq qadağandır”. Heç kəsə bu maddənin III hissəsində göstərilən əsaslara görə zərər vurula bilməz, güzəştlər və ya imtiyazlar verilə bilməz, yaxud güzəştlərin və ya imtiyazların verilməsindən imtina oluna bilməz. V. Hüquq və vəzifələrlə bağlı qərarlar qəbul edən dövlət orqanları və dövlət hakimiyyəti səlahiyyətlərinin daşıyıcıları ilə münasibətlərdə hər kəsin bərabər hüquqları təmin edilir. Eyni maddənin dördüncü hissəsinə görə “heç kəsə bu maddənin III hissəsində göstərilən əsaslara görə zərər vurula bilməz, güzəştlər və ya imtiyazlar verilə bilməz, yaxud güzəştlərin və ya imtiyazların verilməsindən imtina oluna bilməz. V. Hüquq və vəzifələrlə bağlı qərarlar qəbul edən dövlət orqanları və dövlət hakimiyyəti səlahiyyətlərinin daşıyıcıları ilə münasibətlərdə hər kəsin bərabər hüquqları təmin edilir”.

Konstitusiya bu məsələlərdə çox ciddi qaydalar müəyyən edir. Bundan əlavə, 71-ci maddəsinin 9-cu hissəsinə görə hər kəs qanunla qadağan olunmayan hərəkətləri edə bilər və heç kim qanunla nəzərdə tutulmayan hərəkətləri etməyə məcbur edilə bilməz. 10-cu hissəyə görə dövlət orqanları yalnız bu konstitusiya əsasında, qanunla müəyyən edilmiş qaydada və hüdudlarda fəaliyyət göstərə bilərlər”.

“Bu yasaq yol hərəkəti haqqında qanunu da pozur”

M.Baxışovun bildirdiyinə görə, rayon qeydiyyatlı avtomobillərin ölkə paytaxtına girişini yasaqlayan qərar yol hərəkəti haqqında qanunla da ziddiyyət təşkil edir: “Hərəkətin tənzimlənməsi yol hərəkəti haqqında  Azərbaycan Respublikasının qanunu ilə tənzimlənir. Bu qanun 3 iyun 1998-ci ildə qəbul edilib. Sonradan həmin qanuna əlavə və dəyişikliklər edilib. Həmin qanuna görə Bakı şəhərindən başqa digər yerlərdə qeydiyyatda olan nəqliyyat vasitələrinin Bakı şəhərinə girişini qadağan edən hər hansı normal nəzərdə tutulmayıb və nəzərdə tutula da bilməz. Milli Məclis belə bir qanun qəbul edə bilməz. Çünki belə bir qanun konstitusiya ilə ziddiyyət təşkil edəcək. Konstitusiyanın 7-ci maddəsinə görə Azərbaycan hüquq dövlətidir. Hər bir qadağa hüquqa söykənməli, hüquqla tənzimlənməlidir. Amma əfsuslar olsun ki, Azərbaycan respublikaısnın baş nazirinin müavini vəzifəsində çalışan, amma hüquqdan anlayışı olmayan bir şəxs Yol Hərəkəti Təhlükəsizliyi Komissiyasının sədri vəzifəsində çalışır və o, belə bir qərar qəbul edib”.

“Sədr və komissiya üzvləri cəzalanmalıdır”

Əslində bu şəxs Azərbaycan Cinayət Məcəlləsinin 154-cü maddəsinə, yəni vətəndaşların bərabərlik hüququnu pozduğuna görə, habelə vəzifəli şəxs olduğu üçün eyni məcəllənin 154.2-ci maddəsinə əsasən cinayət məsuliyyətinə cəlb edilməlidir. O, vəzifəli şəxs olduğu üçün şəxsi marağı səbəbi ilə belə bir qərar qəbul etdiyi üçün Cinayət Məcəlləsinin 308.2-ci maddəsi ilə də məsuliyyətə cəlb olunmalıdır. Bir sözlə, indiki halda  baş nazirin müavini Abid Şərifov cinayət məsuliyyətinə cəlb edilib cəzalandırılmalıdır. Komissiyanın bu qərara səs verən üzvləri də Cinayət Məcəlləsinin 154.2 və 308.2-ci maddələri ilə cənayət məsuliyətinə cəlb edilərək cəzalandırılmalıdır.

Əfsuslar olsun ki, Azərbaycan hüquq dövləti olmadığna görə, alınan qərarlar hüquqa söykənmədiyi üçün bu cür qanunsuz qərarlar qəbul edilir. Bu cür qərarlar nəticə etibari ilə Azərbaycanda yaşayan vətəndaşların hüquqlarının pozulmasına gətirib çıxardır. Təəssüf edirəm ki, belə bir hakimiyyətin rəhbərlik etdiyi dövlətin vətəndaşıyam. Hansı ki, Azərbaycan Respublikasında konstitusiyaya zidd bu cür qərarlar qəbul edilir. Bu qərarların həyata keçirilməsini polis orqanlarının vasitəsi ilə təmin etmək istəyirlər”.

Seymur Əliyev