3 gündür saxlandıqları Binəqədi müvəqqəti təcridxanasında aclıq aksiyası keçirən gənclər aksiyanı dayandırıblar. Bu barədə müsavat.com-un müxbirinə hazırda təcridxananın önündə olan Müsavat Partiyasının üzvü Şamil Beydulla xəbər verib. O deyib ki, aksiya sutkalıq həbs alan gənclərin valideynlərinin xahişindən sonra dayandırıb. İçəridə işgəncələrə məruz qalması iddia edilən Orxan Eyyubzadə isə ağır vəziyyətdə təcili yardımla xəstəxanaya aparılıb. 

 Yada salaq ki, 29 dekabrda “Qaziləri yandırmayın” şüarı ilə Qarabağ müharibəsi əlili Zaur Həsənovun ölümünə etiraz olaraq bir qrup gənc etiraz aksiyası keçirib. 30 dekabrda Səbayel rayon məhkəməsi həmin aksiyanın iştirakçılarından 6 nəfərə sutkalıq həbs cəzaları verib. Müsavat partiyasının üzvləri Cavid Hacıbəyli 16, Tural Sadıqlı 17, AXCP üzvləri Türkel Əlisoy 15, Orxan Carçı 15, bitərəf gənc Orxan Eyyubzadə 18, Samir Poladov 17 sutka həbs cəzası almışdılar. Gənclər Binəqədidəki müvəqqəti saxlanma təcridxanasına gətirildikləri andan aclıq aksiyasına start veriblər. Onlardan biri -  Müsavat Partiyasının üzvü Tural Sadıqlı atası vasitəsi ilə sosial mediaya aksiyanın tələblərini çatdıran məktub ötürmüşdü. Məktubun məzmunu belə idi:

“Həbs yerində Orxan Eyyubzadəyə işgəncə verildi: o, bu qış günündə pəncərə şüşələri sınmış, qızdırılmayan kamerada qandallarla işləməyən qızdırıcıya bağlandı və bu işgəncə 24 saat davam etdi. 3 gündür ki, saxlandığımız həbs yerində su gəlmir və yuyuna bilmirik. Kameralar qızdırılmır. Yataq şəraitimiz insan ləyaqətini alçaldan bir səviyyədədir. Hüquqi müdafiəmiz üçün bizə heç bir şərait yaradılmır: hətta mövcud şəraitdən şikayət etmək üçün bizə kağız və qələm də verilmir.

Ona görə də artıq 3-cü gündür ki, həbs yerində aclıq aksiyası keçiririk!

Tələblərimiz:

1. Həbs yerində işgəncə hallarına son verilməsi,

2. Həbs edilənlər üçün normal saxlanma şəraitinin yaradılması,

3. Özümüzün hüquqi müdafiəmiz üçün şəraitin yaradılması,

4. Polis özbaşınılığına son qoyulması.

Bu 3 gündə insan haqları təşkilatlarının bizimlə maraqlanmamasından üzgünük!”

Orxan Eyyubzadənin anası  Rəhimə Məmmədova da oğluna işgəncə verilməsi iddiası ilə müsavat.com-a müraciət etmişdi. Hazırda Orxan Eyyubzadənin vəziyyətinin ağır olması deyilir.