Azərbaycanın sabiq xarici işlər naziri Tofiq Zülfüqarovun yaxın günlərdə səsləndirdiyi “Nəhayət təkbətək qaldıq - Ermənistan, Azərbaycan və Koronavirus” ifadəsi ictimai rəydə xeyli rezonans doğurub.

Moderator.az həm bu tezisin arxasında dayanan geosiyasi gəlişmələri, həm də Dağlıq Qarabağda keçirilən “seçki” şousunu şərh etmək üçün Tofiq Zülfüqarova müraciət edib.

Sabiq nazir bildirib ki, belə bir fikri söyləyərkən o, hazırda cərəyan edən bir sıra proseslərin məntiqi gedişini nəzərə alıb:

“Biz görməyə bilmərik ki, dünya ciddi böhran qarşısındadır”

“Hazırda elan edilən pandemiya hələ epidemiya demək deyil, epidemiya daha yüksək səviyyədə olan hadisədir. ÜST-ün məlumatlarına baxsaq görərik ki, dünyada pandemiyalar indiyədək çox olub və bir sıra xəstəlikərə aid edilir.

Ancaq biz onu da görürük ki, bu pandemiya geopolitik vəziyyətə təsir baxımından ciddi şərait yaradıb. Müşahidə edirik ki, artıq dost sayılan ölkələr arasında gərginlik yaranır, narazılıq ortaya çıxır.

O da açıq görünür ki, artıq dünyada ciddi siyasi dəyişikliklər baş verir. Eyni zamanda, iqtisadi böhran da göz önündədir. Neftin qiyməti bu vaxtadək olmadığı qədər ucuzlaşıb. Biz görməyə bilmərik ki, dünya ciddi iqtisadi böhran qarşısındadır.

Digər bir proses də müşahidə edirik: dövlətlər maraqlarını müdafiə edərkən çalışırlar ki, bunu öz suveren hüquqları çərçivəsində həyata keçirsinlər, hər ölkə ayrılıqda öz vətəndaşlarının təhlükəsizliyini təmin etməyə çalışır. Beynəlxalq təşkilatlara, o cümlədən BMT-yə ümid bəslənilmir.

Yəni, bu dəyişiklilərin baş verməsi istər-istəməz bizim bölgəmizə də təsir edəcək. Həm ölkə olaraq Azərbaycana, həm də bölgədə baş verən münaqişəyə. Ermənistanda da vəziyyət ağırdır. Bu problemlər təbii olaraq konfliktin gedişinə təsir edəcək. Bu göz önündədir.

İstər-istəməz bu vəziyyət daha real faktorları və elementləri ortaya çıxarır. Azərbaycanla Ermənistanın əhalisinin say fərqi, iqtisadi imkanlar, hərbi potensial, tibbi-sanitar sektorun səviyyəsi, səfərbərlik və sair amillər. Hansı ki, bunlar pandemiyadan əvvəlki vəziyyətə o qədər də təsir etmirdi. Çünki beynəlxalq faktorlar vardı, hansı ki, Ermənistanın öz imkanları ilə deyil, hansısa xarici qüvvənin köməyi ilə siyasətini həyata keçirməyə şərait yaradırdı. İndi isə bu imkanlar zəifləyib.

Mən bu fikri söylərkən bunları nəzərdə tuturam”.

“Tərəfdarı deyiləm ki, biz bu “seçkilərə” bu qədər diqqət yetirək… Mənim mövqeyim bundan ibarətdir”

Tofiq Zülfüqarov Dağlıq Qarabağdakı “seçkilər”dən danışarkən bu hadisəyə də fərqli münasibət sərgiləyib. Onun sözlərinə görə, əslində biz ermənilərin belə “tamaşalarına” bu qədər ciddi yanaşıb onları reklam etməməliyik:

“Mən, ümumiyyətlə, onun tərəfdarı deyiləm ki, biz bu “seçkilərə” bu qədər diqqət yetirək.

Çünki biz, ilk növbədə başa düşməliyik ki, orada baş verən hadisələrin kökündə nə dayanır. Biz bunu aydın şəkildə anlamalıyıq ki, işğal olunmuş ərazilərimizdə öz təcavüzkarlığını gizlətmək üçün Ermənistan qondarma qurumlar yaradıb və göstərmək istəyir ki, burada guya ki ikinci erməni dövləti var.

Ancaq əslində, hamı başa düşür ki, Dağlıq Qarabağda nə ikinci bir dövlət var, nə hansısa qurum var ki, biz ona xüsusi diqqət yetirək.

Söhbət bizim torpaqlarımızın Ermənistan tərəfindən işğalından və etnik təmizlənmədən gedir ki, o da bu ərazilərdə bu və digər şəkildə öz təbliğatını aparmaq üçün müxtəlif siyasi şoular düzəldir.

Bu baxımdan, düşünürəm ki, biz əsasən, bu siyasəti tənqid etməliyik, ermənilərin oyununa getməməliyik. Dolayısı ilə onların bu oyunlarını reklam etməməliyik.

Mənim mövqeyim bundan ibarətdir”.

T. Zülfüqarovun sözlərinə görə, Nikol Paşinyan “Dağlıq Qarabağ Ermənistandır və nöqtə” bəyanatını səsləndirəndə bununla açıq-aşkar dünyaya göstərib ki, burada irredentizm siyasəti var, yəni bir ölkənin digərinə, Ermənistanın Azərbaycana ərazi iddiaları vardır və bu ərazi iddialarını onlar işğalçılıqla həyata keçiriblər. Bu ərazilərdə tam şəkildə etnik təmizləmə aparıblar. İndi isə onların məqsədi Azərbaycanın bu torpaqlarını anneksiya etməkdir, yəni özlərinə birləşdirməkdir. Bütün bu oyunların arxasında bu siyasət dayanır".

Taleh