Keçmiş millət vəkili, iqtisadçı ekspert Nazim Məmmədov Bakı Avrasiya Universitetinin  Mətbuat və İnformasiya xidmətinin rəhbəri Şəfayət Əliyevin mətbuatda barəsində səsləndirdiyi ittihamlara Moderator.az -a açıqlamasında aydınlıq gətirib.

"Mən bilmirdim ki, "kollec" adı ilə tanınan Avrasiya Universitetin ictimaiyyətlə əlaqələr üzrə xidmət rəhbəri var imiş və onun da ölkədə aparılan infrastruktur layihələrinə "özünəməxsus izahı" varmış. Mənim ünvanıma səsləndirilən fikirlərə isə ancaq onu deyə bilərəm ki, mənə qarşı qərəzli münasibət rektor tərəfinden hətta 2000 - ci ildən aparılıb və 2005 - ci ildə mən deputat seçilən vaxtdan, xatırladım ki, rektor 1995-ci ildən mütamadi olaraq Gədəbəydən namizəd olur, daha da kəskinləşib. Hal - hazırda rektorun kəndindəyəm və hər kəs onun mənə qarşı "qaz və yol" çəkdirmək məsələsi ilə,  guya bu işləri o gördürübmüş deyə "anti təbliğat" aparır. Mən də onun yaxınlarının facebookda məni izlədiklərini nəzərə alaraq bir status yazdım ki, özünə hörmət qoysun. Görünür, yenə öz ampluasındadır, ona görə xatırlatmaq istəyirəm ki, rektor ola bilər ki, mənim cənab prezidentin bölgələrə səfərləri zamanı onunla müzakirə etdiyim məsələlər barədə məlumatsız olsun, mənim MM-də seçicilərimin hansı problemləri ilə bağlı çıxışlarımı dinləməyib, hökumət qurumları ilə görüşlərimdən xəbəri olmayıb, büdcə müzakirələri ilə bağlı komitəmizdə mənim təbii qazla, yolla bağlı təkidlərimi də görməyib, ancaq 1995-ci ildən hər dəfə namizəd kimi seçkilərə qatıldığı MM-in deputatının statusu ilə özəl universitet kollecinin fərqini də bilmirmi? 

Kimin bu məsələlərə təsiri nə qədər ola bilər, onu ayırd etmək intellektimi yoxdur?

O ki, qaldı mənim fəaliyyətimə, içtimaiyyətlə əlaqədar şöbə müdirinə xatırladım ki, mənim tərcüməyi-halımla tanış olsun, mən 1993-cü ilə qədər Rusiyada 200 illik tarixi olan bir Universitetin qırmızı diplomla məzunu olub, əyani aspiranturasında oxumuşam. Həmin universitetdə müəllim işləmişəm və 1993-cü ildən biznes fəaliyyəti ilə məşğul olmuşam. 1999-cu ildə rəhmətlik prezident Heydər Əliyevin dəvəti ilə qayıtmışam. Bu vaxta qədər rektorun kiminlə çiyin-çiyinə vuruşduğu haqqında heç kəsdən heç nə eşitməmişəm. Qaldı ki, hörmətli prof. İzzət Rüstəmova o, Nazim Hüseynlinin qohumu olduğu kimi, mənim də qohumumdur, özü də dədə-baba qohumum. Məzahir Rüstəmovun da adı bizim hər bir azərbaycanlımız kimi mənə də əzizdir və əlimizdəki imkanlardan həmişə istifadə edib onun adını uca tutmaq, gənclərə nümunə göstərmək mənim də borcumdur ki, həmişə edirəm. Hörmətli professorla şəkil çəkdirirəm demək isə Nazim Hüseynlinin kollecinin mətbuat katibinin səviyyəsini nümayiş etdirir. Ona xatırladıram ki, son şəkillər çəkilən tədbirlərə İzzət müəllimi mən dəvət etmişəm, özüm aparmışam və şəkilin müəllifi də özüməm. Mən siz və kolleciniz kimi heç kəsdən istifadə etmərəm, o şəkilləri də sizin xatirinizə facebook profilimdən sildim ki, məni "qınamıyasınız". İzzət müəllimlə şəkil çəkdirmək "monopoliyaya" alındığını bilsəydim heç bunu da etməzdim."