Sabah bütün Avropanın diqqəti Azərbaycanda olacaq. Azərbaycanın tarixdə ilk dəfə Avropa Oyunları keçirməsinə artıq saatlar qalıb. Azərbaycanın Avropa Oyunlarına qədər keçdiyi yol isə asan olmayıb.

ANS TV-nin məlumatına görə, Avropa Oyunlarının keçirilməsi ilə bağlı qərar hələ 2012-ci ilin dekabrında, Romada Avropa Olimpiya Komitəsinin Baş Assambleyasında qəbul edilib. Baş Assambleya iştirakçıları arasında keçirilmiş gizli səsvermə nəticəsində 48 səsdən 38 səs lehinə olmaqla ilk Avropa Oyunlarının Azərbaycanda keçirilməsi qərara alındı. 

Əlbəttə bu, böyük tarixi hadisə idi. Baxmayraq ki, Olimpiya Oyunları Avropa qitəsində yaranmış və Avropa qitəsində də bərpa edilmişdi, ancaq bu günə qədər Avropa Oyunları keçirilməmişdi. Bu mənada ilk Avropa Oyunlarının Bakıda keçirilməsi böyük uğur idi və bunu prezident İlham Əliyev 2013-cü ilin fevralında birinci Avropa Oyunları Təşkilat Komitəsinin ilk iclasında məhz bu cür də qiymətləndirdi:

“Biz bu tədbirləri keçirməklə və öz təşkilatçılıq qabiliyyətimizi göstərməklə bir növ yeni standartlar tətbiq edirik. Bu, artıq Azərbaycan standartlarıdır. Çünki istənilən beynəlxalq tədbir Azərbaycanda, Bakıda yüksək səviyyədə keçirilir və hesab edirəm ki, Avropa Oyunları da yüksək səviyyədə keçiriləcək”.

Əslində belə bir məsuliyyətli yükün altına çiyin vermək üçün vaxt tələb olunurdu. Məsələn, yay Olimpiya Oyunlarında ev sahibi olacaq ölkəyə hazırlıq üçün azı 6-7 il vaxt verildiyi halda, bizim cəmi iki ilimiz vardı. Bu iki ildə nə etmək olardı, açığı adam düşünməyə belə qorxurdu. Amma hadisələr göstərdi ki, əslində əl-ayağa dolaşanlardan qorxmaq lazımdır. İşlər onsuz da gedəcək. Həqiqətən də birinci Avropa Oyunları Təşkilat Komitəsi işinin öhdəsindən layiqincə gəldi. Qısa zaman ərzində 12 daimi idman obyekti hazırlıq vəziyyətinə gətirildi. 

Onlardan 5-i - Milli Gimnastika Arenası, BMX Veloparkı, Bakı Su İdmanı Mərkəzi, Bakı Atıcılıq Mərkəzi və Olimpiya Mərkəzi yeni inşa olundu. Həmçinin Su Polosu Arenası, Basketbol, Çimərlik Arenaları, Dağ velosipedi veloparkı və başqa müvəqqəti idman obyektləri tikildi. 13 binadan, 3 və 4 otaqlı müxtəlif növ mənzildən ibarət Atletlər kəndi də bizim “Bakı 2015” ilk Avropa Oyunlarından qazancımız oldu. Və nə qədər qəribə olsa da, biz bütün bu işləri müxtəlif beynəlxalq təzyiqlər və basqılar altında həyata keçirdik. 

Avropa Birliyi baykota çağırdı, sərhədsiz repartyorlar ədalətə çağırdı və bu zaman unutdular ki, Azərbaycan düz 25 ildən çoxdur ki, dünyadan Qarabağa ədalət istəyir. Bu ədaləti təmin edə bilməyənlər Azərbaycandan nə istəyirlər, başa düşüləndir. İstəyirlər ki, Azərbaycan inkişaf etməsin, istəyirlər ki, bizdə də münaqişə ocaqları alovlansın. Xeyr cənablar. Bizdə alovlanan Avropa məşəlidir.

Hamını da onun istisinə qızınmağa dəvət etdik. Əslində bunun üçün Azərbaycana minnətdar olmalısınız. Məhz Azərbaycan bütün Avropaya qucaq və qapı açdı ki, gəlin bizdə oynayın. 

Amma idman oyunu oynayın, siyasət oyunu yox. Kim necə başa düşdü, necə qiymətləndirdi, öz işidir. Əsas odur ki, biz də öz işimizi layiqincə gördük. Və budur, sabah açılışdır. Xeyirli olsun, dövlətiimiz, millətimiz üçün.