Ukrayna hücumunun dayandırılması barədə Kremlin iddialarına rəğmən, getdikcə bunun əksini göstərən daha çox sübutlar üzə çıxır.

 

Moderator.az xəbər verir ki, bu barədə Almaniyanın "Bild" qəzetinin hərbi eksperti Yulian Repke yazıb.

 

"Avqustun 20-də Rusiyanın "Sever" qruplaşmasının Telegram-kanalının dərc etdiyi videoda Ukrayna Silahlı Qüvvələri (USQ) bölmələrinin Korenevo qəsəbəsinin girişində (sərhəddin 19 km-də) olduğu görünür. Videoyazıda Ukraynanın dörd avtomobilinin atəş altına düşməsi, ikisinin zədələnməsi və ya məhv edilməsi göstərilir. Bu kadrlar onu göstərir ki, USQ-nin bir neçə gün ərzində yaxınlaşdığı Korenevo qəsəbəsi uğrunda döyüşlər başlayıb", - analitik qeyd edib.

 

O, iddia edir ki, bu şəhər tipli qəsəbənin itirilməsi Vladimir Putinin nüfuzu üçün Sucanın itirilməsindən daha da pis olacaq. "Sucadan fərqli olaraq, o, hücumun gözlənilməz və müdafiənin hazırlıqsız olduğuna istinad edə bilməyəcək. Kursk vilayətində döyüşlərdən iki həftə sonra Rusiya ordusu burada döyüş hazırlığı vəziyyətinə gətirilib və bu regiona kömək üçün minlərlə əsgər göndərilib. Bu vəziyyətdə Ukraynanın ekspedisiya korpusuna məğlub olmaq Rusiyanın hərbi rəhbərliyi üçün dəhşətli rüsvayçılıq olacaq", - Repke vurğulayıb.

 

O, həmçinin diqqəti ona yönəldib ki, USQ iki istiqamətdə irəliləyir. "Sucadan şimal-şərqə inadkar döyüşlərdən sonra Ukrayna qoşunları Martınovka kəndini nəzarətə götürüb. Bu kənd birbaşa Kurska aparan P200 magistral yolda yerləşir. Martınovka kəndi çeçen bölmələri tərəfindən müdafiə edilib, bu kənd Suca şəhərinə potensial əkshücum üçün ilkin məntəqə olub. Hazırda USQ üçün təhlükə sürətlə azalmaqdadır", - analitik qeyd edib.

 

Amerikanın müharibənin öyrənilməsi İnstitutunun (ISW) analitikləri məlumat verib ki, Rusiya USQ-nin irəliləməsini dayandırmaq üçün Ukraynanın Donetsk vilayətinin Çasov Yar məntəqəsindən öz bölmələrini Kursk vilayətinə göndərib. Bundan başqa, Rusiya Müdafiə Nazirliyi sərhəd vilayətlərinin müdafiəsi üçün "Belqorod", "Kursk" və "Bryansk" qoşun qruplaşmaları yaratmaq qərarına gəlib. 

 

Bundan öncə Rusiya qruplaşmaları yalnız Ukraynaya hücum üçün tətbiq edilib, bunlar "Mərkəz", "Qərb", "Cənub", "Şərq", "Dnepr" və "Sever" qruplaşmalarıdır. Sonuncu qruplaşma Kursk və Belqorod vilayətlərinin müdafiəsinə cavabdeh olub. Rusiyalı müxalifəçi Aleksandr Nevzorovun dərc etdiyi fotoşəkildə Kursk AES yaxınlığında səngərlər görünür. "Kursk AES. Orklar səngər qazır. USQ isə onların Kursk vilayətində Malaya Loknada 18-ci diviziyasını mühasirəyə alıb", - o, yazıb.