Tanınmış ictimai-siyasi xadim, hüquq müdafiəçisi Oqtay Gülalıyev facebook səhifəsində övladı Əli Gülalıyevin məhkəmə prosesi ilə bağlı maraqlı status paylaşıb. Moderator.az həmin statusu oxucuların diqqətinə çatdırır:

“... Bu gün Apelliyasiya Məhkəməsində azyaşlı övladım Əli ilə bağlı Xətai rayon məhkəməsinin ədalətsiz qərarından verilmiş apelliyasiya şikayətinə baxıldı. Hakim Vüqar Məmmədovun sədrliyi ilə keçirilən ötən prosesdə cinayət işi ilə bağlı ilkin istintaqın düzgün aparılmadığını, Xətai rayon məhkəməsinin dəlil və subutları araşdırmadan bir tərəfli və qərəzli şəkildə hökm çıxardığını əsas gətirərək Apelliyasiya məhkəməsindən qismən məhkəmə istintaqının aparılması barədə verdiyimiz vəsatət qəbul olunmamışdı. 
Bu günki prosesdə isə birinci instansiya məhkəməsinin protokollarında bilərəkdən ciddi nöqsanlara və saxtakarlıqlara yol verildiyi üçün eyni halın Apelliyasiya məhkəməsində də təkrarlanmaması üçün məhkəmə proseslərində video çəkilişin aparılmasının təmin edilməsi barədə oldu. Hakim bu vəsatətimizi qəbul etmədi. 
Növbəti vəsatətimiz həm birinci instansiya məhkəməsində, həm də Apelliyasiya məhkəməsində "zərərçəkən" iştirak etmədiyi üçün məhkəmə prosesinin onun iştirakı ilə aparılması barədə oldu. Hakim bu vəsatətimizi də qəbul etməyərək prosesdə onun iştirakına ehtiyac olmadığını bildirdi.
Daha bir vəsatətimiz istintaqda qorxudulub hədə- qorxu gələrək, öncədən hazırlanmış hazır protokollara qol çəkdirilmiş şahidlərin iştirakının təmin olunması barədə oldu. Məhkəmə bu vəsatətimizi də qəbul etmədi.
Ən nəhayət sonuncu vəsatətimiz hadisə yerində quraşdırılmış hadisənin baş verdiyi zamanda müşahidə kamerasının yaddaşında lentə alınmış video görüntülərə baxış keçirilməsi barədə oldu. Bu vəsatətimizi də qəbul etməyəcəyi təqdirdə ədalətsiziliyin və saxtakarlığın pik həddə, siyasi sifarişin açıq- aşkar faş olacağını hiss edən hakim prosesi 11 marta qədər təxirə saldı. 
Təsəvvür edirsinizmi, məhkəmə heç bir şahidi dinləmədən, "zərərçəkən"- in özünü görmədən və "şikayəti"-nə qulaq asmadan, baş verdiyi iddia olunan hadisə ilə bağlı əsas və yeganə tutarlı faktı- video görüntüyə baxmadan, az yaşlı məktəbli uşaqlardan polis bölməsində valideynlərinin iştirakı olmadan zorla alınmış ifadələri incələmədən, eləcə də digər subut və dəlilləri araşdırmadan məhkəməni yekunlaşdırıb, tələm- tələsik qərar vermək istəyirdi.
... Doğrusu etiraf edim ki, mən Azərbaycanda məhkəmələrin bu qədər aciz, rəzil və yazıq durumda olduğunu bilmirdim. Söhbət onların övladım Əli ilə bağlı çıxartdığı və çıxaracağı saxta qərarlardan getmir. Söhbət yüzlərlə, minlərlə, on minlərlə vətəndaşımızın haqqında çıxarılan ədalətsiz qərarlardan gedir. Bir də söhbət ondan gedir ki, Azərbaycanda məhkəmələr o qədər aşağılanıb, hörmətdən, nüfuzdan salınıb cılızlaşdırılıb ki, artıq məhkəmələrə inam qalmayıb. Sifarişlərlə qərar qəbul edən məhkəmələr icra qurumlarının ən kiçik bölmələrinə çevrilib. 
... Mən inanıram ki, avtoritar rejimlərə xas olan məhkəmələrimizin sifarişə və ələ baxan durumu ötüb keçəcək. Azərbaycan məhkəmələrində haqqın öz yerini tutacağı, ədalətin zəfər çalacağı gün uzaqda deyil. O gün mütləq gələcək. Heç kim inamını itirməsin. Azərbaycan insanının həqiqi ədaləti məhkəmələrdə axtaracağı və tapacağı gün uzaqda deyil. 
Biz hamımız bir yerdə ölkəmizdə ədalətli, demokratik bir cəmiyyətin qurulmasına nail olacayıq. Onda məhkəmələrimizin sifarişlə işləməsinə, saxta, ədalətsiz qərarlar qəbul etməsinə ehtiyac qalmayacaq! Çünki ədalətli məhkəmələr ədalətli cəmiyyətlərdə olar...”