Beynəlxalq Olimpiya Komitəsinin (IOC) Olimpiya Həmrəyliyi Fondunun, Dünya Atletikasının dəstəyi, Azərbaycan Milli Olimpiya Komitəsinin (MOK) və Azərbaycan Atletika Federasiyasının (AAF) təşkilatçılığı ilə Bakıda atletika üzrə 1-ci dərəcəli məşqçilərin texniki kursuna yekun vurulub.
AAF-dən verilən məlumata görə, kursun bağlanış mərasimində MOK-un vitse-prezidenti Çingiz Hüseynzadə, Baş Katib Azər Əliyev və Azərbaycan Atletika Federasiyasının prezidenti Cavid Qurbanov iştirak ediblər.
MOK-un Beynəlxalq Proqramlar İdarəsinin əməkdaşı Ceyhun Rəhmənov məşqçilərin bilik və bacarıqlarını artırmaq üçün İOC-nin Olimpiya Həmrəyliyi Fondunun və Beynəlxalq İdman Federasiyalarının dəstəyi ilə voleybol, velosiped, atletika, badminton və digər idman növləri üzrə keçirilən kurslar haqqında ümumi məlumat verib. Daha sonra çıxış edən Ç.Hüseynzadə bildirib ki, bu cür seminarların keçirilməsi MOK tərəfindən artıq ənənə halına çevirilib. 2016-cı ildən başlayan bu tipli seminarların təşkili idmanın inkişafına, beynəlxalq dərəcəli məşqçilərinin yetişdirilməsinə, məşqçi və hakim heyətinin nəzəri və praktiki biliklərinin genişləndirilməsinə, bu yolla peşakar idmançıların düzgün və savadlı şəkildə maarifləndirilməsinə kömək edir: "Milli Olimpiya Komitəsinin və Beynəlxalq Olimpiya Komitəsinin Olimpiya Həmrəyliyi Fondunun birlikdə fəaliyyəti nəticəsində belə əhəmiyyət kəsb edən kursların keçirilməsi və uğurların əldə olunması həqiqətən də sevindirici haldır".
Sonda Çingiz Hüseynzadə məşqçilərə uğurlar arzulayıb.
C.Qurbanov isə deyib ki, belə kursların keçirilməsi kütləvilliyin artırılmasına və regionlarda idmanın inkişafına öz tövhəsini verəcək. AAF prezidenti atletikanın inkişafı, yerli idmançıların Azərbaycanı beynəlxalq arenalarda, Olimpiya Oyunlarında layiqincə təmsil etmələri və ölkə bayrağını zirvələrə qaldırmaqları üçün bütün şaraiti yaradacağını bildirib.
Nəzəri və praktiki hissələrdən ibarət olan təlimdə ümumillikdə 20 iştirakçıya Beynəlxalq Olimpiya Komitəsinin prezidenti Tomas Baxın imzası olan iştirakçı sertifikatları verilib. Onlardan yalnız 2-si təlimi uğursuz başa vurub. Digər 18 nəfərə Dünya Atletikası tərəfindən 1-ci dərəcəli məşqçilik (Level-1) dərəcəsini təsdiqləyən sertifikatlar təqdim olunub. Sertifikatları Çingiz Hüseynzadə, Cavid Qurbanov və Azər Əliyev təqdim edib.
Sonda ən yaxşı nəticə göstərən Narxanım Fərəcli Dünya Atletikası tərəfindən saniyəölçən hədiyyə olunub.