Gələn ilin dövlət büdcəsində elmə ayrılan vəsaitin 146 milyon manatdan 142 milyon manatadək azaldılması elmi ictimaiyyət arasında birmənalı qarşılanmadı. 

Amma fikirlərini Moderator.az-la paylaşan akademik Nizami Süleymanov deyir ki, Azərbaycanda elmi fəaliyyətlə məşğul olmaq üçün kifayət qədər imkanlar var və büdcədən bu sahəyə ayrılan vəsaitin qismən azaldılmasını faciə kimi qiymətləndirmək doğru deyil, çünki Bilik Fondu vasitəsilə də bir çox alimlər qrant layihələrində çalışaraq həm yaxşı dolanmaq imkanı əldə edirlər, həm də elmi axtarışlarını inkişaf etdirə bilirlər:

“Əslində büdcədəki artım və ya azalmanın bizə isti-soyuğu yoxdur. Mən AMEA-nın müxbir üzvü kimi bu qurumla əlaqəliyəm, amma rəhbəri olduğum Milli Yaradıcılıq Akademiyasının o biri akademiyaya heç bir dəxli yoxdur və biz təsərrüfat hesablı qurum olduğumuzdan dövlət büdcəsindən vəsait almırıq.”

N. Süleymanov Azərbaycan elminin durğunluq içərisində olduğuyla bağlı vaxtaşırı müxtəlif səviyyələrdə səsləndirilən ittihamları da qəbul etmir:

“Yalan deyirlər. Bunu sübut edə də bilərəm. Buna inanmayanlara 2013-cü ilin hesabatını göstərə bilərəm. Yəni dəqiq rəqəmlərlə deyə bilərəm ki, bir il ərzində bizim alimlərimizin dünyanın məhşur elmi jurnallarında nə qədər məqaləsi dərc olunub, nə qədər patent alınıb və ya nə qədər qrant layihəsi həyata keçirilib. Bizim alimlərimizin bir çoxu bu gün dünyanın adlı-sanlı elm mərkəzlərinin elmi şuralarının nəinki üzvləridir, hətta rəhbəri və ya rəhbərinin müavinidir. Deməyim odur ki, alimlərimizin əməyini danmaq nankorluq olardı.”

N. Süleymanov universitetlərin özəlləşdirilməsinin də hələ vaxtının çatmadığını deyir:

“Mən bu gün universitetlərin tamamilə özəlləşdirilməsini məsləhət görməzdim. Onsuz da bu gün universitetlərdə pullu təhsil də var və bu elə özəlləşmənin bir növüdür. Amma elə ailələr var ki, övladlarını pullu təhsildə oxutmağa imkanları yoxdur. Niyə o zaman dövlət bu vətəndaşına sahib çıxaraq onun pulsuz oxumasına şərait yaratmasın? Yəni hələlik dövlət hesabına təhsilin davam etməsinin tərəfdarıyam. 

Təhsil ilinin uzadılmasıyla bağlı sualımıza cavabında akdemik bildirdi ki, bununla bağlı Nazirlər Kabineti müzakirə edib qərar qəbul etsə də onun nəticələri barədə fikir bildirmək üçün ən azı bir il gözləmək lazım gələcək:

“Yalnız bundan sonra deyə biləcəyik ki, bu qərarın xeyri və ya zərəri nədir. Praktika göstərəcək ki, bu addım nə dərəcədə effekt verdi.”