Rusiya xarici işlər naziri Sergey Lavrov bu gün keçirdiyi mətbuat konfransında ilk və sadəlöhv  baxışdan Azərbaycanın xeyrinə olan kimi görünən bəyanatlar verib. Məsələn, deyib ki, 1991-ci il Alma-Ata Bəyannaməsinə görə, “bütün ittifaq respublikaları Müstəqil Dövlətlər Birliyini formalaşdırır və SSRİ-nin İttifaq dövlətləri arasındakı mövcud olan sərhədlərin pozulmamasını təsdiqləyir. Başqa sözlə, həmin vaxt Dağlıq Qarabağ Muxtar Vilayəti birmənalı olaraq Azərbaycan Sovet Sosialist Respublikasının tərkib hissəsi olub. Bu, həm Azərbaycan, həm Ermənistan, həm Fransa, həm də cənab Mişel tərəfindən sənəd çərçivəsində təsdiq olunub”...

 

Və yaxud Lavrov cənabları bildirib ki, “Azərbaycan Qarabağdakı ermənilərə Azərbaycanın digər vətəndaşlarının sahib olduğu hüquqlarla bağlı zəmanət təqdim etməyə hazırdır"...

 

Göründüyü kimi, yoldaş Kələntəryan(Lavrov) Qarabağın Azərbaycan Respublikasının yox, məhz Azərbaycan SSR-in tərkibində olduğunu, bununla həm də Azərbaycanın uzun bir dövrdə Moskvaya tabe olduğunu vurğulayıb.

 

Amma Rusiya baş diplomatı növbəti cümləsi ilə şovinist, imperiyapərəst Kremlə xas möhürünü daha dəqiq vurub:

 

 

Lavrovun bu deyiminin mahiyyətini tam anlamayan həm erməni, həm Azərbaycan tərəfindən olan sadəlöhv kəslər, eləcə də savadsız pulitoloq və şərçilər, yaxud bunu yaxşı anlayan, amma Bakı və İrəvandakı Rusiya “5-ci kalon”larına xidmət edənlər Rusiya xarici işlər nazirinin bu çıxışının Azərbaycanın xeyrinə olduğunu car çəkməkdədirlər…

 

Ancaq Kremlin baş diplomatı Rusiya  Silahlı Qüvvələrinin Baş Qərargahında olan xəritələrlə açıqca hər iki Güney Qafqaz ölkəsini şantaj etməyə çalışır. Yəni öz aləmində  demək istəyir ki, örkən(sülh prosesi, sərhədlərin delimitasiyası) nə qədər uzun olsa da, doğanaqdan(Kremldən) keçər… Heç də Brüsselə, Vaşinqtona arxayın olub oralara qaçmayın…

 

Qoca erməni mənşəli Lavrov onu da gözəl bilir ki,  Rusiya Silahlı Qüvvələrinin Baş Qərargahında, daha doğrusu, onun Baş Kəşfiyyyat İdarəsində, Nəcməddin Sadıqovun “vayenni” dili ilə desək, “QRU”-da xəritələrdən başqa da  Rusiya imperiyası üçün çox qiymətli “xəzinələr” var… Məsələn,  çar dövründən, sovet dövründən bəri, həmçinin SSRİ-nin olmadığı müstəqillik illərində də digər keçmiş sovet respublikaları kimi, Azərbaycan və Ermənistandan da həmin  Rusiya, yaxud Sovet ordu kəşfiyyatına işləmiş və hələ də işləyən rezident və agentlərin adbaad siyahısı var. Və hazırda da bir-birinə düşmən kəsilmiş hər iki ölkədə “QRU”-ya işləyənlər də məhz oradan Kremldən, Moskvadan idarə olunur… Həmin agentlər də “KQB”-“FSB”-“PKK” şəbəkəsi ilə əlbir olaraq hələ 1990-cı ildə Bakıda 20 Yanvar qətliamını, neçə-neçə nəqliyyat terrorunu, Qarabağda silahlı qarşıdurmanı, torpaqlarımıızın işğalını və s. təşkil edib, Ermənistan parlamentində terror, İrəvanda çevriliş,  2017-ci ildə Tərtərdə  Azərbaycan hərbçilərinə  qarşı kütləvi işgəncə və qətliam törədiblər… 

 

Lavrov yaxşı bilir ki, “QRU”-nun Azərbaycandakı iki əsas agentindən biri 1992-ci ildə yeni qurulan ordunun baş qərargah rəisi olub və sonradan - illər sonra bunu boynuna alsa da, o vaxtkı Rusiya prezidenti Yeltsin onu təhvil verməkdən açıqca imtina edib. Digəri isə 27 illik yüksək vəzifəsindən azad edilsə də, Bakıda sərbəst gəzir…  

 

Rusiya baş diplomatının  ondan da gözəl xəbəri var ki, Azərbaycanın hərbi qələbə çaldığı 44 günlük savaşdan, yaxud 10 noyabr bəyanatından bəri isə yenə də Putinin, Şoyqunun komandası ilə istənilən vaxt gah sərhəddə, gah Qarabağdakı təmas xəttində atəşkəsi pozaraq təxribatlar törədə, traktoru, erməni kəndlini və s. atəşə tuta bilirlər… Təxribat olan, atəşkəs pozulan yerdə isə, heç vaxt sülh olmaz. Və bu halda istər Brüssel, istərsə də Vaşinqton mütləq “Rusiyanın vasitəçiliyi, missiyası”, “birgə bəyannamələr”, “Rusiya sülhməramlı kontingenti”, ən azı, KTMT-nin hay-küyü gərəkdir…

 

Qısası, Putinin, Lavrovun, nə bilim, Şoyqunun  şantaj və hədələrinə rəğmən Azərbaycanın da, Ermənistanın da rəhbərliyi bundan sonra elə siyasət yeritməlidir ki, bizim mərdliyimizdən, ermənilərin nankorluğundan, "Böyük Ermənistan" və türklərə haqsız və yersiz nifrət xəstəliyindən yararlanaraq bizləri savaşdıran və daha çox Azərbaycana zərbə vuran bu imperiya inventarlarının bataqlığından qurtulmalıdır…

 

Putin rejiminin Ukraynada tam iflasa, məğlubiyyətə uğradığı bir məqamda Azərbaycanın qardaş Türkiyəyə də, bir sıra məqamlarda ABŞ-a da, Avropaya da, Böyük Britaniyaya da güvənərək Rusiya agenturasını ölkənin hərbi, siyasi, iqtisadi, texnoloji və s. sahələrindən tam qaşıyıb təmizləyə və həm Qarabağ və Zəngəzurdakı, həm də müstəqilliyi ilə bağlı bütün digər əsas problemlərindən qurtula bilər…

 

Sultan Laçın