"Ukrayna Prezidenti Ofisinin rəhbəri Andrey Yermak xüsusi xidmət orqanları tərəfindən izlənilir, ona görə də onun xarici agent olması ehtimalı azdır". 

 

Moderator.az xəbər verir ki,  bu fikri  A.Yermakın müşaviri Aleksey Arestoviç əminliklə ifadə edib.

 

A.Arestoviç  bu barədə “GORDON” internet nəşrinin təsisçisi Dmitri Qordonla müsahibəsində danışıb.

 

“Yermaka gəlincə, həm onu,  həm də Demçenkonu[Ukrayna Milli Təhlükəsizlik və Müdafiə Şurasının keçmiş birinci müavini Ruslan Demçenko), 20-yə yaxın xüsusi xidmət orqanı çox yaxından izləyir.  Amerika Birləşmiş Ştatları və Ukrayna əlaqələri haqda bütün sirrlərə çıxışı olduğundan, onun necə izləndiyini təsəvvür edə bilərsiniz. Və mənim bir sualım var: əgər onun agent olduğuna dair əsaslı (vurğulayıra: əsaslı!) şübhələri olsaydı, adamlar silah ötürülməsi, müharibədə qalib gəlmək, Avropada və nəhayət, bütün dünyada təhlükəsizlik sisteminin yenidən formatlanması kimi həssas mövzularda bu şəxslə işləyərdilərmi? Əgər onun agent olduğu sonradan məlum olarsa, biz birdən çox veriliş hazırlaya və kitab yaza bilərik. Sadə  bir səbəbə görə: bu səviyyədə agentlər, mənim fikrimcə, heç vaxt və heç yerdə olmayıb”, - deyə Arestoviç vurğulayıb.

Zəruri arayış:

ABŞ Konqresinin Nümayəndələr Palatasının üzvü Viktoriya Sparts 2022-ci il iyulun 8-də ABŞ prezidenti Co Baydendən Ukrayna Prezidenti Ofisinin(UPO) rəhbəri Yermakla bağlı nəzarət prosedurlarına dair izahat verməsini və onun “Rusiya ilə iddia edilən əlaqələri” haqqında məlumatı yoxlamasını xahiş edib. Məktubda o, İxtisaslaşdırılmış Korrupsiyaya Qarşı Mübarizə Prokurorluğuna rəis təyinatını yubatmaqda ittiham etdiyi UPO rəhbərinin müavini Oleq Tatarovun da adını çəkib.

Ukrayna Xarici İşlər Nazirliyi Spartsın müraciətini tənqid edərək bildirib ki, onun hərəkətləri “Amerika siyasətinə Ukrayna rəhbərliyi ilə Rusiya arasında iddia edilən əlaqələrə dair klassik rus təbliğat hekayələrini qaytarmaq və dövlətimizi ABŞ-ın daxili siyasətinə cəlb etmək üçün gizli cəhddir”.

İyulun 9-da ABŞ Konqresində Ukraynayönlü qrupa həmsədrlik edən demokrat Marsi Kaptur Ukrayna Prezidenti Ofisini dəstəklədiyini bildirib. O, xüsusilə qeyd edib ki, “müharibə zamanı Ukrayna rəsmilərinin mövqelərini sarsıtmağa yönəlmiş qondarma hekayələr yayanlar” Rusiya prezidenti Vladimir Putinə və onun təbliğatçılarına kömək edirlər.

Sparts cavab verib ki, Kaptur Andrey Yermakın “cib bürokratlarını” dinləyir. İyulun 11-də o, UPO rəhbərinin istefaya getməli olduğunu bildirib.

İyulun 12-də Milli Təhlükəsizlik və Müdafiə Şurasının katibi Aleksey Danilov bildirib ki, Milli Təhlükəsizlik və Müdafiə Şurasında Yermakın Rusiya Federasiyası ilə iddia edilən əlaqələrini təsdiqləyən heç bir sənəd yoxdur...

Sultan Laçın