Moskva şəhər məhkəməsi mayın 24- də apellyasiyanı rədd edərək Aleksey Navalnı barədə hökmü qüvvədə saxlayıb. Ona dələduzluq və məhkəməyə hörmətsizlik ittihamları ilə 9 il ciddi rejimli koloniyada həbs cəzası verilib.

 

Moderator.az xəbər verir ki, bu barədə "Meduza" nəşri yazıb.

 

Müzakirələr zamanı və özünün son sözündə Navalnı Rusiya hakimiyyətini "rus xalqının düşməni, xain və qatil adlandırıb" və Ukraynadakı müharibəni pisləyib.

 

"Müzakirələr mənə məhkəməni nəyəsə inandırmağım üçündür. Mən nə deyə bilərəm?

 

Mənim məhkəməm açıq olub, amma mən həbsxanadayam. Biz prosesin gedişində hakim Marqarita Kotovanın prezident Administrasiyası əməkdaşı ilə telefon danıışığını ələ keçirmişik, lakin bu, heç bir təəssürat yaratmayıb. Mənim şərti işimi real işlə əvəz edən hakim Natalya Repnikova tanış vəkillər vasitəsilə mənə mesaj göndərib ki, qəbul etdiyi qərara təəssüf edir, sonradan koronavirusdan vəfat edib. Mən bununla spekulyasiya etmək istəməzdim, amma o, risk qrupuna aid olan adam təsiri bağışlamayıb.

 

Ona görə də əgər hakimlər mənə nəsə göndərmək istəsələr, ehtiyatlı olsunlar, çünki öz qapıları ağzında kriminalistləri aşkar etməyəcəklər.

 

Siz mənim sözümü kəsəcəksiniz?

 

Bu, son ilyarım ərzində mənim altıncı və ya yeddinci son sözümdür.

 

Mənim sonuncu son sözüm zamanı komik hadisə baş verib, bir mayora mülki paltar geyindirib, məhkəmənin texniki işçisi yerinə əyləşdiriblər. Mən müharibədən danışanda səsi kəsirdilər. Məni bu, bir tərəfdən hiddətləndirib, amma digər tərəfdən ilhama gətirib: siz hansısa "zek"in   nəsə deməyindən qorxursunuz. Mən "siz" deyəndə bütün hakimiyyətinizi nəzərdə tuturam: Putini, Dövlət Dumasını, Federasiya Şurasını.

 

Hökmə görə, mən məhkəməni təhqir etmişəm, amma Rusiya məhkəməsinə heç kim hörmət etmir. Ən uyğun gələni "məhkəməyə nifrət" maddəsi olardı, çünki mən sizin məhkəmənizə, sisteminizə, hakimiytətinizə nifrət edirəm. Mən nə sizdən, nə də bunker qocasından qorxuram. Mən hamınızı qorxmamağa çağırıram, çünki bu, özünüzə qarşı cinayətdir.

 

Son illərdə rusları Putindən çox öldürən olmayıb. Mən müharibədən danışanda xoşunuza gəlmir? Mən müharibədən sizin məhkəmələriniz üçün metafora kimi istifadə edəcəyəm, çünki onlar da yalan üzərində qurulub. Televizorda hər reportajda deyilirdi ki, Ukraynaya qoşunlar yeridilməyəcək. NATO haqqında danışmaq gülməlidir, çünki Rusiya Ulyanovskda NATO- nun bazasını açanda hamı razı olub. Hər bir sözünüzdə riyakarcasına yalan danışırsınız, dünən dediklərinizi təkzib edirsiniz.

 

Məhkəmənin işində müsbət cəhətlər də var: yüksək əmək haqqı, mənzil, toxunulmazlıq hüququ. Sizin bütün prosesləriniz mənasızdır. Siz nəyə nail olmaq istəyirsiniz? Rusiyada inkişafı dayandırmağa?Siz çox taleləri dağıda bilərsiniz, amma siz burada, bu ağılsız müharibədə tarixi məğlubiyyətə uğrayacaqsınız.

 

Bu müharibınin nə məqsədləri, nə mənası var. Məsələn, Xarkovda bir hakim yaşayır. Günlərin bir günü, fevralın 24- də, o, nasist adlandırılır, raket körpə övladını öldürür. O, bundan sonra necə yaşayacağını bilmir.

 

Rusiyada heç də hamı belə ağılsız, pozğun və qaniçən deyil. Mən, şübhəsiz, həbsxanada yatmağa hazıram ki, hamıya insanların həlak olmasını söyləyəm. Burada, Vladimir vilayətində müharibədə Rusiya qvardiyasının rəhbərliyi həlak olub. Mənim hökmümdə dələduzluq maddəsi var. 2015- ci ildən bizə "Armata" tankı göstərirlər, amma müharibədə T- 72 tankından istifadə edirlər. Nəyə görə?

 

"Rusiya Federasiyası adından".

 

Mən sizin simanızda yalnız bu "Rusiya Federasiyası"nı görürəm: putinləri, xristenokları, qolikovları. Suzsiz necə də yaxşı olardı! Hamının hamını sakit buraxması gərəkdir: bizim Ukraynadan, hakimlərin adi vətəndaşlardan əl çəkməsi gərəkdir.

 

Sizin üçün ən gözəl iqtibas: "İndi sizin və zülmət hakimiyyətinizin dövranıdır". Bu heç sizə toxunmur, əksinə, cuşa gətirir: "Biz sərtik, biz zülmət hakimiyyətiyik".

 

Amma sizin zamanınız keçəcək. Siz cəhənnəmdə yanacaqsınız, XXI əsrdə yeni müharibələri törətməyinizi istəməyən babalarınız isə ocağa odun atacaqlar. Məndən bu qədər", - Navalnı son sözünə yekun vurub.

 

Xatırladaq ki, Moskva şəhər məhkəməsinin qərarı ilə Navalnı barədə hökm qüvvəyə minib, yaxın zamanlarda o, ciddi rejimli həbsxanaya köçürüləcək.

 

Martın 22-də Lefortovo məhkəməsi Vladimir vilayətində keçirdiyi səyyar iclasında Navalnını 9 il müddətinə ciddi rejimli koloniyada həbs və "xüsusilə iri məbləğdə dələduzluq və məhkəməyə hörmətsizlik" maddələri ilə 1, 2 milyon rubl cərimə cəzaları verilib.

 

Mayın əvvəlində Navalnı məlumat verib ki, onu  Vladimir vilayətində İK- 6 Melexovo ciddi rejimli həbsxanaya köçürmək istəyirlər.

 

O, bu barədə onun üçün "həbsxanada həbsxana" hazırlanması barədə başqa məhbuslardan öyrənib.

 

Bu ərəfədə Navalnı 2022- ci ildə dünyada ən böyük təsir gücünə malik insanların siyahısını dərc edən "Times" jurnalı üçün Putin haqqında məqalə yazıb. Navalnı bəyan edib ki, Putinin gerçək missiyası dünya liderlərinə, ekspertlərə və adi adamlara dərs verməkdir.

 

"O, bizə yenidən xatırladıb ki, "seçkilərə bir balaca əl gəzdirməklə" başlanan yol həmişə diktatura ilə bitir", - müxalif siyasətçi vurğulayıb və dünya liderlərinə Rusiya Federasiyasının başında duran bu "ağılsız"la bütün əlaqələri kəsməyi tövsiyə edib.