Prezident İlham Əliyev ötən gün Türkiyə Prezidenti Rəcəb Tayyib Ərdoğana zəng edib. Dövlət başçısı telefon danışığı zamanı Azərbaycan Prezidenti, Avropa İttifaqı Şurasının Prezidenti və Ermənistanın baş naziri arasında Brüsseldə keçirilən görüş barədə Ərdoğana məlumat verib.
Prezident İlham Əliyev Brüsseldə Zəngəzur dəhlizinin açılması, o cümlədən həm dəmir yolu, həm də avtomobil yolunun çəkilməsi məsələləri ilə bağlı tərəflərin razılığa gəldiyini diqqətə çatdırıb.
Brüssel görüşündə Zəngəzur dəhlizinin açılmasına dair razılığın əldə olunması region üçün olduqca önəmli hadisədir. Ermənistanda etirazların alovlandığı bir dönəmdə baş nazir Nikol Paşinyanın tarixi əhəmiyyət daşıyan dəhlizin açılmasına razılıq verməsi, İrəvanın artıq Azərbaycanın irəli sürdüyü təklifləri qəbul etməsi, reallıqlarla barışması kimi qiymtətləndirilir.
Modertor.az xəbər verir ki, bu barədə Modern.az-a danışan politoloq İlqar Vəlizadə bildirib ki, Ermənistanın Rusiyanın təsiri altından çıxıb-çıxmaması artıq ikinci dərəcəli məsələdir. Hazırda Azərbaycan üçün əsas prioritet məqsədlərimizə nail olmaq və regionda postmünaqişə dövründə yaranmış reallıqları möhkəmləndirmək, tam suverenliyimizə nail olmaqdır.
Onun sözlərinə görə, planların kimin vasitəsilə reallaşması bizim üçün maraqlı deyil, əsas istəklərimizə çatmağımızdır:
"İndi Avropa İttifaqının göstərdiyi səylər göz qabağındadır. Ancaq bu, o demək deyil ki, Rusiya bu məsələlərdən tam çəkilir. Kommunikasiyaların açılması ilə bağlı məsələlər Rusiya, Azərbaycan və Ermənistan üçtərəfli kommisiyası tərəfindən həyata keçirilir. Yeri gəlmişkən, Avropa İttifaqı Şurasının prezidenti Şarl Mişel qeyd edib ki, baş nazirlərin işini biz dəstəkləyirik. Baş nazirlərin müavinləri də üçtərəfli kommisiya çərçivəsində görüşüb qərarlar qəbul edirlər".
Rusiyanın regional proseslərə müdaxiləsinə gəlincə, politoloq Ermənistanın KTMT-nin üzvü olmasına diqqət çəkib:
"Yaddan çıxarmayaq ki, Ermənistan KTMT-nin üzvüdür. Rusiya və ya KTMT Ermənistanın əli ilə bu məsələyə müdaxilə edəcək. Ermənistan Rusiyanı tam oyundankənar vəziyyətdə saxlaya bilərmi? Yox. Ermənistandan fərqli olaraq, biz müstəqil fəaliyyət göstəririk. Digər tərəfdən sülh müqaviləsi ilə bağlı danışıqları həm Avropa İttifaqı, həm tərəflər, həm də Rusiya dəstəkləyir. Ancaq burada bir məsələ var ki, ermənilərin hələ də Dağlıq Qarabağ iddiası var. Bu iddianı Rusiya qəbul edir. Avropa İttifaqı isə dolayı yolla dəstəkləyir".
Ermənistanda etirazlar fonunda hökm sürən vəziyyət barədə danışan politoloq baş nazir Nikol Paşinyanın vəziyyətə nəzarət etdiyini vurğulayıb:
"Ermənistanda etirazlara baxmayaraq, baş nazir vəziyyəti nəzarətdə saxlayır. Buna görə də, mitinqlər onun qərarlarına təsir göstərmir. Mitinqlər var, ancaq bunların kütləviliyi, təsir mexanizmləri çox cüzidir. Yəni qatar öz axarı ilə gedir. Düşünmürəm ki, mitinq iştirakçıları nəyəsə nail ola bilərlər".
Politoloq Qabil Hüseynli hesab edir ki, Zəngəzur dəhlizinin açılmasına artıq heç kim mane ola bilməyəcək. Onun sözlərinə görə, dəhliz təkcə Naxçıvana yol deyil, həm Türkiyəyə, həm də İrana istiqamətlənəcək:
"Bu, bölgənin mühüm dəmiryolu qovşağıdır. Qovşaq Ermənistanı da dünyaya açacaq. Özəlliklə Türkiyə və Naxçıvan arasında əlaqələr düzənlənəcək. Zəngəzur dəhlizi bölgənin bütün ölkələri üçün çox faydalı olacaq”.
Politoloq vurğulayıb ki, bundan sonra Ermənistan öz ərazisində 42 kilometrlik məsafədə dəmiryolu xəttini çəkməlidir:
“Azərbaycan artıq öz ərazisində Füzulidən Zəngilanın Ağbənd, Mincivan ərazisinə qədər dəmiryolu xəttini və ona paralel şosse xəttini bitirmək üzrədir. Düzdür, Ermənistanın hələ tikintiyə başlamaması prosesi müəyyən qədər ləngidəcək, amma çətini tikintiyə başlayana kimidir. Tikinti başlayandan sonra hər şey öz qaydasına düşəcək”.
Ermənistan müxalifətinin fəallaşdığı bir vaxtda Paşinyanın dəhlizin açılmasında razılıq verməsindən söz açan politoloq qeyd edib ki, İrəvandakı narazı qüvvələr təxribatçı mövqedən əl çəkmir.
“Ermənistandakı etirazlar Qarabağ klanının planıdır. Onların güclü dəstəkçi bazası yoxdur. Müxalifət Rusiyanın köməyi ilə müəyyən qədər güc ortaya qoya bilər. Ancaq bütövlükdə Nikol Paşinyanı yıxacaq gücləri yoxdur. İndiki məqamda Brüssel görüşünü çox böyük uğur kimi qiymətləndirirəm. Belə hesab edirəm ki, artıq Rusiyanın proseslərə təsir imkanı get-gedə heçə enir və Nikol Paşinyanın da mövqeyi güclənir” - Q.Hüseynli fikirlərini belə əsaslandırıb.