Moderator.az azadliq.info-ya itinadən bildirir ki, aprelin 14-də Bakı Ağır Cinayətlər Məhkəməsində  hakim İradə Həsənzadənin sədrliyi ilə Cinayət Məcəlləsinin 144.1.2.8 və 144.2.1-ci maddələri ilə ağırlaşdırıcı halda insan alveri və əməyin istismarı cinayətləri törətməkdə  təqsirləndirilən Aynur Mehdiyevanın mühakiməsi davam edib. Bu məhkəmə iclasında Aynur Mehdiyevanın qonşusu, qulluqçusu və yaşadığı binanın mühafizəçisi şahid qismində ifadə vermişlər. Bu şəsxlərin ikisi Aynur Mehdiyevadan maliiyə asılığında, üçüncüsü isə ailənin yaxın dostudur.  Aynur Mehdiyevanın qonşusu, iş adamı Əyyub Haqverdiyev ifadəsində Mehdiyevanın həyat yoldaşı Məmməd Məmmədovla yaxın dost olduğunu və onunla birlikdə xaricə işgüzar səfərlərə getdiyini dedi. Şahid filippinli xanımı tanıdığını, onun binanın həyətində məhdudiyyətsiz gəzə bildiyini və qonşularla rahat təmasda olduğunu bildirdi. O, Llanto Fe Diazı A.Mehdiyevanın evində gördüyünü, evdə heç bir əməyə cəlb edilmədiyini, hər gün bir neçə dəfə uşaqla həyətdə gəzdiyini söylədi. Zərərçəkənin nümayəndəsi Əlövsət Əliyev ondan  "Zərərçəkənin hər gün neçə dəfə uşaqla gəzdiyini görmüsünüz?" "İki dəfə. Səhərlər və axşamlar həmişə uşaqla həyətdə gəzirdi". Əlövsət Əliyev şahiddən işə saat neçədə getdiyini və qayıtdığını soruşdu. Cavab belə oldu: "Səhərlər saat on, on birin yarısı gedirəm, axşam 7-8 radələrində qayıdıram". Əyyub Haqverdiyev tez-tez Məmməd Məmmədovun evinə gəldiyini, Aynur Mehdiyevanın isə çox vaxt anasının evində olduğunu bildirdi. Nümayəndənin sualına cavab olaraq Mehdiyevanın qardaşlarını da tez-tez orada gördüyünü dedi. Zərərçəkən Llanto Fe Diaz isə Əyyub Haqverdiyevin dedikləri ilə razı olmadığını söylədi. O, bildirdi ki, şahid onun evin içərisində və orda nə işlə məşğul olduğunu görməyib. Filippinli xanım bildirdi ki, uşaqla bulvara, teatra  gedərkən evdən bir nəfər ona nəzarət etmək üçün onunla gedirmiş. Əcnəbi xanım həyətə uşaqla çıxdığını, bu zaman Aynur Mehdiyevanın qızının onların yanında olduğunu və kənar şəxslərlə danışmağın ona qadağan olunduğunu da məhkəmənin diqqətinə çatdırdı.  Zərərçəkən onu da əlavə etdi ki, pasportu özündə olmadığı üçün qaça bilməyib.

 Hakim şahidə “Sizcə, bu xanım niyə şikayət edib?” sualına şahid “Mənə elə gəlir ki, polislər ona təzyiq ediblər,  aparıb polisdə saxlayıblar”, - deyə cavab verdi. Aynur Mehdiyevanın vəziyyətini yüngülləşdirməyə xidmət edən sualları dönə-dönə şahidə ünvanlayan hakimlər şahiddən  polislərin nə üçün filippinli qadına təzyiq etməli olduqlarının səbəbini soruşmağı isə "unutdular". 

Şahid qismində ifadə verən və Aynur Mehdiyevanın yaşadığı binada mühafizəçi işləyən Natiq İbrahimov filippinli xanımı uşaqlarla binanın həyətində gəzdiyini gördüyünü söylədi.  Mehdiyevanın vəkili dəfələrlə və təkidlə ondan zərərçəkənin binanın həyətində qonşularla ünsiyyət saxladğını gördüyünü soruşdu. Şahid də eyni təkidlə qadının heç bir qonşu ilə danışmadığını söylədi. Prokurorun sualına cavab olaraq şahid  polislərin Llanto Fe Diazı aparərkən ona heç bir zorakılıq etmədiklərini dedi : “Polislər 15-20 dəqiqə  onunla  danışdılar və dedilər ki, bizimlə getməlidir. Polislər maşının qapısını açdılar, filippinli xanım da özü maşına əyləşdi”.

Aynur Mehdiyevanın evində qulluqçu işləyən Günel Məmmədovanın verdiyi şahid ifadəsində evdə hər şeyin gözəl olduğunu, hər kəsin istədiyi işlə məşğul olduğunu elə təqdim etdi ki, hakim Əhməd Quliyev onun çıxışına müdaxilə etməli oldu: "Siz elə danışırsınız ki, elə bil biz başqa planetdən, Marsdan gəlmişik və heç nə bilmirik. Qulluqçunun öz məhdud hüquqları və məsuliyyəti var. Hər şeyi edə bilməz". Əlövsət Əliyev Məmmədovadan iş qrafikini soruşanda o dedi: "Səhər on, on birin yarısından axşam on, on bir, on iki, bəzən də birə kimi işləyirəm dedi". "Səhər siz gələndə Fe nə edir?" sualına şahidin "yatır" cabavı məhkəmədə canlanma yaratdı. Xatırladaq ki, digər şahid Əyyub Haqverdiyev bu zaman Fenin uşaqla birlikdə həyətdə olduğunu demişdi. Nədənsə hakimlər zərərçəkənin eyni saatlarda hən yatması, həm də həyətdə uşaqla gəzməsini deyən şahidlərin ifadələrindəki ziddiyyətə əhəmiyyət vermədilər.  Əlövsət Əliyev şahiddən əmək müqaviləsi olub-olmadığını soruşdu. Günel Məmmədova "yoxdur" dedi. Bu zaman hakim İradə Həsənzadə müdaxilə etdi: "Bunun məsələyə aidiyyatı yoxdur, sualı çıxarıram" Aynur Mehdiyevanın məhz əməyin istismarı cinayətini törətməkdə təqsirləndirildiyi məhkəmədə hakimin onun tərəfindən başqa bir şəxsin əməyinin istismarı faktına göz yumaraq bu faktın məsələyə aidiyyatı olmadığını deməsi artıq bəri başdan mühakimə icraatının obyektivliyinə kölgə salır. Şahid Günel Məmmədova ifadəsində sutkada 12-15 saat işlədildiyini, bunun qarşılığında 400 manat əməkhaqqı oldığını və əmək müqaviləsinin olmadığını etiraf etmişdi. Həyat yoldaşından boşandığını deyən və himayəsində iki azyaşlı uşağı olan Günel Məmmədovanın imkansızlığından və maddi asılığından istifadə edərək onun əməyini istismar edən Aynur Mehdiyevaya qarşı məhkəmənin bu davranışı, hazırki mühakimə icraatı üçün müstəsna əhəmiyyət daşıyan növbəti əməyin istismarı faktını görməzdən gəlməsi və hətta bu haqda sualın belə çıxarılması çox düşündürücüdür. Günel Məmmədovanın istintaqa verdiyi ifadəsi ilə məhkəmədə dedikləri arasında ziddiyətlər üzə çıxdı. Məlum oldu ki, o, istintaqa verdiyi ifadəsində Aynur Mehdiyevanın Llanto Fe Diazın və onun üstünə qışqırdığını deyib. Məhkəmədə isə o, Aynur Mehdiyevanın qışqırmadığını, bunu onun danışıq tərzi olduğunu qeyd etdi.  Llanto Fe Diazın qolundakı gematoma haqqında suala cavabında o, məhkəməyə bildirdi: “Fenin qolunda göyərmiş yer var idi. Soruşdum, dedi ki, Aynur xanımın oğlu İbrahimlə (o zaman iki yaşı  vardı) pilləkəndə oynayarkən olub”. "Bəs qolundakı qayçı kəsiyini görmüşdünüz?" G.Məmmədova dedi ki, bir dəfə hamamda olanda Llanto Fe Diaz  İbrahimin əlindən qaçyını almaq istəyəndə, İbrahim qayçı ilə onun qolundan vurub: “Fe qayçını İbrahimdən almaq istəyəndə, İbrahim qayçını onun qolun vurdu və onun qolu kəsildi”. Şahidin qeyri-ciddiliyi görən dövlət itihamçısı ona elə öz dilində cavab verdi: “Belə getsə, İbrahimi məsuliyyətə cələb edəcəyik”. Prokuror şahidin istintaqda ifadə verdiyini, Llanto Fe Diaz ilə üzləşdiyini xatırladaraq şahidin ifadəsində ziddiyətlərin olduğunu proses iştirakçılarının diqqətinə çatdırdı. Belə ki, Məmmədova Fe Diazın pasportunu zərərçəkənin əşyalarının içindən A.Mehdiyeva deyil, özü götürdüyünü desə də istintaqın pasportun rəngi haqda sualına səhv cavab verib. Pasport qırmızı rəngdə olduğu halda onun yaşıl olduğunu deyib.

 Llanto Fe Diaz G.Məmmədovanın dediklərinin düzgün olmadığını,  A.Mehdiyevanın əvvəlcə qayçının arxa hissəsi ilə onun başına döydüyünü, sonra isə iti tərəfi ilə qolundan vurulduğunu söylədi. Hakim: - Niyə vururdu? Llanto Fe Diaz:  - Qaşıqla çəngəlin yerini səhv qoyduğum üçün vurdu.

G.Məmmədova dedi ki, Aynur Mehdiyeva  Llanto Fe Diaza hansı işi görməsini ona sakit tonda başa salırmış.  Hakim Eynulla Vəliyev şahidə “Siz ingilis dilini bilməyə-bilməyə nə bildiniz ki Aynur Mehdiyeva ona nə deyirdi?” sualına şahid cavab verə bilmədi. Şahidin ifadələrinə sərt etiraz edən Llanto Fe Diaz dedi ki,  G.Məmmədova hər şeyi bilir. "Bəs onda niyə xanım məni ac saxlayanda gizlincə mənə yemək verirdin? Bəs onda niyə mənə başına gətirilənləri xanımın həyat yoldaşı  Məmmədə danış deyirdin?". Filppinlı xanım Dubaya zəng etmək üçün G.Məmmədovadan telefonunu istədiyini də söylədi, lakin xanım xəbər tutub məni döydü". Qeyd edək ki, tərcümə çox zəif olduğundan prosesdə ciddi anlaşılmazlıqlar yaşanırdı. Zərərçəkənin "mən də Məmmədə danışdım" ifadəsi tərcümə edilmədi və hakim İradə Həsənzadə "Axı niyə demirdi? Məmmədə demirdi? Polislərə demirdi?" sualı açıq qaldı. Halbuki, hakim işin materialları, elə ittiham aktı ilə dərindən tanış olsaydı Aynur Mehdiyevanın Llanto Fe Diazı  Daxili İşlər Nazirliyinin zabiti olan qardaşı Allahverən Mehdiyevlə qorxutduğunu bilərdi. O, evlərinə tez-tez polis formasında gələn qardaşının "polislərin böyüyü" olduğunu və qaçacağı təqdirdə Feni tapıb cəzalandıracağını deyirmiş. Məmməd Məmmədova gəlincə, Fe hələ ötən ilin bir noyabr tarixində BBC Azərbaycan xidmətinə verdiyi müsahibəsində Məmməd Məmmədovun   onunla yaxşı davrandığını və qulluqçunun məsləhəti ilə dərdini ona danışdışını bildirmişdi. Həmin məqalədə deyilirdi:" Madam mənə dedi ki, sən mənim ərimlə danışmısan, o mənə acıqlanıb. Bəlkə sən mənim ərimi istəyirsən? Xanım olmaq istəyirsən?-dedi və vurdu. Mən çox qorxdum".

Növbəti proses aprelin 21-nə, saat 14:30-a təyin edildi.