Milli Qvardiyanın komandiri olmuş polkovnik Əzizağa Süleymanov 90-cı  illlərin əvvəllərində ölkənin siyasi və hərbi aləmində baş vermiş bir sıra maraqlı olayların birbaşa iştirakçısı kimi bir müddətdir ki, saytımıza ilginc materiallar göndərir. Polkovnik indi də 93-cü ilin aprelin əvvəllərində Füzuli istiqamətində baş verən döyüşlər barədə xatirələrini Moderator.az vasitəsilə oxuculara təqdim edir. Çoxlarımızın bilmədiyi şok məqamlar və rüsvayçı epizodlarla zəngin bu materialın hər kəs üçün maraqlı olacağına şübhəmiz yoxdur”¦

(əvvəlini ötən günlərin xəbər lentlərindən oxuya bilərsiniz) ...Kapitan Vəliməmmədov mənə bildirmişdi ki, Üçtəpə istiqamətində, yol kənarında  piyadaların döyüş maşını xarab olduğu üçün atılıb. ( PDM-1) Qvardiyaçı mexaniklər yarım saat içində atılan hərbi texnikaya əl gəzdirib tam döyüş vəziyyətinə gətiriblər. Bir xeyli də mərmisi var, icazə ver onu da gətirək. Mən kapitan Rüfət Vəliməmmədova bunun göydən düşmə olduğunu bildirib təcili olaraq həmin hərbi texnikanı da dayaq məntəqəsinə  gətirmələrini əmr etmişdim. Sonradan bu texnika barəsində briqada komandirinə məlumat verilmişdi.

    Milli qvardiyaçıların yerləşdiyi  döyüş istiqamətinin önündə  yerləşən düşmən mövqelərini əvvəlcədən yaxşı tanıdığım üçün  düşmən üzərinə hücum edəcəyimiz zaman çaş-baş düşmələri üçün müəyyən tədbirlər görməyə başlamışdım. İlk növbədə Milli Ordu əsgərləri Məngələnata dağı istiqamətində hücum edən zaman onlara əlavə kömək etmək zərurətı yaranarsa  düşmənin atəş nöqtələrini hədəfə alıb, susdurulmasında bizdən bir neçə kilometr arxada olan artileriyaçılarımıza  kömək etməli idik. 5 aprel 1993-cü il tarixində Milli ordunun hücumu zamanı onlara kömək edə biləcəyimiz istiqamətin minalı olub-olmamasını yoxlamalı idik. Buna görə  tağım komandiri vəzifəsini icra edən qvardiyaçı Qasımov Talehə və kəşfiyyatdan qayıtmış Xəlilov Vüqara göstəriş vermişdim ki, bu sahələri zərərsizləşdirsinlər. Bu istiqamətdə zirehli döyüş maşınlarını və iriçaplı silahları elə yerləşdirməli idim ki, düşmən hərəkət edə bilməsin. Gördüyümüz tədbirlər nəticəsində düşmənin hərəkət edə biləcəyi ehtimal olunan istiqamət tam nəzarətə götürülmüşdü. Düşmən artileriyası atəşindən zirehli texnikanı və şəxsi heyəti qorumaq üçün lazımı tədbirlər görməyə başlamışdım. Üçtəpə istiqamətində qvardiyaçılar yerləşən səngərləri gəzib onları döyüşə ruhlandıraraq, qazdıqları səngərlərdə çatışmazlıqları aradan qaldırmaq uçun göstərişlər verirdim. Kapitan Rüfət Vəliməmmədov da vaxtında ehtiyat qüvvələri göndərmişdi. Ehtiyat qüvvələrinin üstündə gələn kapitan Eyyub Eyyubova tağım komandirlərini mənim yanıma toplaması barədə tapşırıq  vermişdim. Vaxt getdikcə daralırdı. Saat 11-12-yə işləyirdi. Taqım komandirlərini yığıb onlara  əlavə tapşırıqlarımı vermişdim. Milli ordu  əsgərləri Məngələnata istiqamətində ermənilərin üstünə hücum edərkən onlara kömək edəcək tağım komandirlərini təyin etmişdim. Təyin etdiyim komandirlər qvardiyaçı baş leytenant Hüseynov Rəşid Mustafa oğlu, qvardiyaçı  Qasımov Taleh Qiyas oğlu, qvardiyaçı Hüseynov İsmayıl Məhəmməd oğlu idi. Onların tabeçiliyində olan qvardiyaçı döyüşçülərin siyahısına baxış keçirərək göstəriş vermişdim ki, hələlik səngərlərin qazılmasına nəzarət etsinlər. Hər ehtimala qarşı döyüşə hazır olsunlar və əmrimi gözləsinlər.

      Bizə qardaş Türkiyə tərəfindən hərbi geyim ləvazımatları ilə yardım edilmişdi. Bunlar göy rəngli hərbi gödəkçə plaşlar idi. Füzuliyə  döyüş əməliyyatında iştirak etmək üçün gələn zaman bölük giziri Mədətxanov Ağəli Hacıbəy oğlu o hərbi geyimdən 70 dəst gətirmişdi. Hələ qvardiyaçılara paylamamışdı. Mən ona göstəriş vermişdim ki, təcili olaraq həmin gödəkçələri qvardiyaçılara paylasın. O gödəkçələr paylamaqda məqsədim var idi. Erməni hərbiçiləri ilə bizim hərbiçilərin döyüş geyimləri demək olar ki, eyni idi. Hər iki ordu döyüşçüləri sovet ordusundan qalma döyüş geyimindən istifadə edirdi. Döyüşdə bu eyni geyim paltarları çox böyük çətinliklər törədirdi. Bütün bunları nəzərə alaraq ermənilərə pisxoloji təsir etmək istəyirdim. Ermənilər türk ordusundan çox qorxurdular. Bunu gündəlik alınan məlumatlardan və tarixdən bilirdim. Əlimə düşən bu fürsətdən istifadə edib, ermənilərə hücum edən qvardiyaçıların zahiri görünüşündə Türk ordusunun xüsusi təyinatlı dəstəsinin obrazını yaratmaq istəyirdim. Düşündüyüm və döyüşdə tətbiq edəcəyim bu pisxoloji döyüş taktikası gələcəkdə qələbəmizə çox  böyük təsir edəcəyinə çox inanırdım. Gizir Mədətxanov türk geyim formalarını qvardiyaçılara paylamışdı və onlar bu formaları geymişdilər. Qvardiyaçıları türk ordusunun geyim formasında gördükdən sonra tam əmin olmuşdum ki, düşündüyüm  plan döyüşdə bizə uğur gətirəcək.

        Kapitan Vəliməmmədov rabitə vasitəsi ilə döyüş əməliyyatı üçün lazım olan sursatın və ərzaq ləvazimatlarının artıqlaması ilə əldə etdiyini bildirmişdi. Mən ona əlavə göstərişlər verib, döyüş səngərlərini bir daha nəzərdən keçirtmişdim. Saat 12-yə az qalırdı. Briqada komandiri Murad Həmidov mənimlə əlaqəyə çıxıb döyüşə hazır olmağı tapşırmışdı. Əvvəlcədən planlaşdırılmış qərara əsasən Milli Ordu 12-00-da hücuma keçməli idi. O mənə əmr edib bildirmişdi ki, Üçtəpə istiqamətində möhkəm dur, Milli ordunun Məngələnata dağı istiqamətində hücumuna düşmən tərəfindən yaranan maneələri aradan qaldır, düşmənin bu istiqamətdə əks hücumunun qarşısını al. Ona əmri tam yerinə yetirəcəyimiz barədə söz vermişdim. Saat 12-yə 15-dəqiqə qalmışdı. Bizim artilleryya  qurğuları erməni hərbi birləşmələrnin bu istiqamətdəki mövqelərini qəflətən güclü top və Qrad qurğullarından aramsız atəşə tutmuşdullar. 25-30 dəqiqədən çox çəkən artiileriyya atəşindən sonra milli ordu qüvvələri bu istiqamətdə hücuma keçməli idi. Lakin planlaşdırılmış hücumdan əsər əlamət yox idi. Mən briqada komandiri ilə rabitə əlaqəsinə girib milli ordu taborlarının hücuma keçməmələrinin səbəbini soruşdum. Briqada komandiri Murad Həmidov bildirdi ki, hücum edəcək taborların şəxsi heyətini komandirlər tam toplaya bilmədikləri ücün hücum əməliyyatını bu gün dayandırmaq məcburiyyətindədir. Rabitədə ona yalvardım ki, cənab polkovnik, biz yaxın məsafədən düşmənin bütün hərəkətlərinə nəzarət edirik, düşmən artilleriya zərbəsindən özünü itirib, əlverişli məqamdır, fürsəti əldən vermək olmaz.  Briqada komandirindən öz kəşfiyyatçıllarımdan  aldığım dəqiq məlumatlara əsaslanaraq, güclü artilleriya zərbəsindən erməni tərəfində  yaranmış çaşqınlığı nəzərə alıb, Məngələnata dağı istiqamətində hücum etməyə icazə verməsini dönə-dönə xahiş etdim. Briqada komandiri Həmidov bir qədər tərəddüd etsə də, mənim verdiyim məlumatlara inanıb, Məngələnata dağı istiqamətində hücum etməyimizə icazə verdi. Komandirləri çağırıb hazır vəziyyətdə olan 3 tağımın Məngələnata yüksəkliyi istiqamətində hücuma keçəçəklərini əmr etdim. Hücumda iştirak edəcək tağım komandirlərinə şəxsi heyətlərini sıraya düzmələri barədə göstəriş verdim. Onlara üzümü tutub dedim ki, qardaşlar, bu gün bizi həyat ağır imtahana çəkib. Biz müstəqil Azərbaycanın Milli Qvardiyaçılarıyıq. Bu gün biz ermənilərə sübut etməliyik ki, Azərbaycan ordusu nəyə qadirdir. O hansı qüvvəyə malikdir. Bu gün vətən yolunda biz hamımız ya şəhid olmalıyıq, ya da bu döyüşdə ermənilərə qalib gəlməliyik. Sizinlə bərabər dəstənin önündə özüm gedəcəm. “Ya Allah” deyib kapitan Eyyubovu Uçtəpədə qalan qvardiyaçılar üstündə  müdafiə mövqeyinə rəhbər təyin edib döyüş əmri verdim”¦