Tanınmış hərbi ekspert, "Hərbi Jirnalistlər" İctimai Birliyinin rəhbəri, polkovnik-leytenant Üzeyir Cəfərov NATO təlimlərində iştirak edən azərbaycanlı zabitlərin sayıyla bağlı Müdafiə Nazirliyinin açıqlamasını Moderator.az-a şərh edib, həmin qurumda təcrübə toplamış zabitlərə qarşı MN rəhbərliyinin tutduğu qeyri-adekvat davranışı kəskin tənqid edib:

"Mətbuatda bu ilin ortalarında NATO-nun strukturlarında xidmət edən Azərbaycan Silahlı Qüvvələrinin zabitlərinin sayının artırılması xəbəri mənim də diqqətimi cəlb etdi. Bu çox yaxşı xəbərdir. Əgər bu sadəcə görüntü xatirinə edilməyəcək bir addım olmasa. Çünki həm sabiq müdafiə naziri Səfər Əbiyevin dönəmində, həm də indiki nazir Zakir Həsənovun rəhbərliyi altında NATO-nun mənzil qərargahında, o cümlədən onun ayrı-ayrı bölmələrində Azərbaycanı ləyaqətlə təmsil etmiş zabitlərin bir çoxu heç bir əsas olmadan tam başqa vəzifələrə təyinat alıblar. Onların illərlə Şimali Alyansın qərargahlarında topladıqları böyük təcrübə hansısa ambisiyalı generalların, rəhbər şəxslərin günahı ucbatından Silahlı Qüvvələrimizdə tətbiq edilmir. Əslində  belə əcaib yanaşma şəxsən mənə təəccüblü də gəlmir. Müdafiə Nazirliyinin rəhbər şəxslərinin heç biri, baxmayaraq ki çiyinlərində yekə-yekə ulduzlar daşıyırlar, NATO sistemini nə oxuyublar, nə də o sistemin 21-ci əsrdə necə önəm daşıdığını dərk etmək qabiliyyətində deyillər. Sadə dillə desək, onların özləri NATO sistemini yaxşı bilən savadlı, müasir dünyagörüşünə malik zabitlərdən potensial rəqib kimi çox ehtiyyat edirlər. O zabitlərimiz çox savadlı və hazırlıqlı olduqlarına görə, onlar burada yaxşı qəbul olunmurlar. Uzağa getməyəcəyəm. 2 nəfər zabitin timsalında bu məsələləri izah etməyə çalışacağam. Uzun illər Azərbaycan SQ-ni Brüssüldə təmsil etmiş polkovnik Vidadi Əsgərov hazırkı müdafiə naziri Zakir Həsənovun əndrabadı kadr islahatları nəticəsində MN-nin Kadrlar İdarəsinin rəisi vəzifəsindən çıxarıldı və onun yerinə Milli Məclisin sədri Oqtay Əsədovun yaxın qohumu  polkovnik Mahmud Ağadadaşov təyin edildi. Üstündən bir neçə ay keçməmiş bəzi maraqlı qüvvələr adı çəkilən zabiti də MN sistemindən uzaqlaşdırdılar. Niyəsini və nə üçünü isə "döyüş görmüş" bəzi rəhbərlər gözəl bilirlər. Deməli, NATO-da 8-9 il çalışmış polkovnik Vidadi Əsgərovun günahı o olmuşdu ki, o Səfər Əbiyevlə eyni vaxtda və onun əmri ilə vəzifəyə təyinat almışdı. Zakir Həsənovun ikinci bağışlanılmaz səhvi isə polkovnik Samir  Musayevin MN-nin Katibliyinin rəisi vəzifəsindən çıxarılaraq əvvəl Təlim Tədris Mərkəzinə aşağı vəzifəyə təyinat alması, sonra isə Baş Qərargah rəisi, ambisiyalı general-polkovnik Nəcməddin Sadıkovun əmri ilə Naxçıvandakı Əlahiddə Qoşun Ordusuna göndərilməsi oldu. Baxın, bizim ordu rəhbərliyində təmsil olunan bir qrup təsadüfi şəxslər dövləti maraqları kənara qoyaraq NATO təcrübəsi görmüş savadlı, bacarıqlı və ən əsası həm vicdanı, həm də əlləri təmiz olan 2 zabiti təyinatı üzrə istifadə etmək əvəzinə onlarla qisasçılıq zəminində belə səviyyəsiz şəkildə davrandılar. Mən onlarla belə misallar çəkə bilərəm. Ona görə də ölkəmizi NATO-nun müxtəlif qərargahlarında Tərəfdaşlığın Qərargah Elementi vəzifələrində təmsil edən hər bir zabiti çalışmaq lazımdır ki qonşu Gürcüstanda, elə Türkiyə SQ-də olduğu kimi rəhbər vəzifələrdə istifadə etsinlər. İndi zabit heyətin sayının neçə nəfər artırılması məsələsi gündəmə gələndə burda daha çox ordumuzun qazana biləcəyi nələrisə önə çəkmək lazımdır. Daha hansısa biznesmen-generalın müəyyən maraqlar müqabilində kimlərisə xaricdə ölkəmizi guya təmsil edəcəkləri kimi başa düşmək kimi olmasını istəməzdim. O da sirr deyil ki,  hər il ölkəmizin bütün güc strukturlarından NATO-nun “Sülh Naminə Tərəfdaşlıq” proqramı çərçivəsində minlərlə nümayəndəsi iştirak edir. Buna dövlətin xeyli maliyyəsi sərf edilir. Olmazmı ki, həmin təhsil və təcrübə görmüş gənc və bacarıqlı zabitlərimizi Azərbaycanın bütün güc strukturlarının rəhbərliyinə tədricən gətirək? Onda heç rüşvətxorluq və koorupsiya hallarının da sayı artmaq əvəzinə daha da azalacaq. Sonda onu da qeyd edim ki, bu il təkcə  90 tədbirdə Müdafiə Nazirliyinin 900-ə yaxın hərbi qulluqçusunun iştirakı nəzərdə tutulur. Bu tədbirlərdə 81-i xarici dövlətlərdə, 9 tədbirin isə Azərbaycanda keçirilməsi planlaşdırılır. Çox istərdik ki, bu tədbirlərin hər biri ölkəmizə fayda gətirsin, ordumuz inkişaf etsin, nəhayət ki, torpaqlarımızın işğaldan azad edilməsi məsələsi gündəmə gələndə, düşmənlərimiz də anlasınlar ki, Azərbaycanın NATO təcrübəsi və təhsili görmüş müasir savadlı kadrları var..."