Bakı Ağır Cinayətlər Məhkəməsində hakim Novruz Kərimovun sədrliyi ilə jurnalist və hüquq müdafiəçisi Pərviz Həşimlinin və onunla birgə təqsirləndirilən Təvəkkül Qurbanovun cinayət işi üzrə hazırlıq iclası davam etdirilib. 

İclas başlamazdan əvvəl Pərviz Həşimli jurnalistlərə açıqlama verib. O bildirib ki, dünən vəkili Bəhruz Bayramov görüşə gələn zaman MTN-in istintaq təcridxanasında onun qeydlərini alıblar. “Buna etiraz etdiyim üçün iki gündür məni gəzintiyə çıxarmırlar. Əslində, gəzinti yeri də qapalıdır, 6 kvadrat metr qapalı ərazinin yalnız üstü açıqdır” - deyə Pərviz bildirdi. Jurnalist əlavə etdi ki, NTN-də ona əvvəl yazdığı yazıları xatırladaraq, onu nazirliyin əleyhinə fəaliyyət göstərməkdə ittiham ediblər. “2 il əvvəl yazdığım “Gəncədə MTN-in Antiterror Mərkəzinin əməliyyatı uğursuz oldu” yazıda qüsurlu əməliyyat təşkil olunduğunu yazmışdım.  “Sahibkar MTN rəhbərindən kömək gözləyir” başlıqlı digər yazımda isə MTN əməkdaşının sahibkardan pul istədiyindən bəhs olunurdu. Həmçinin ötən il MTN-in sabiq nazir müavini, hazırda Korrupsiyaya Qatşı Mübarizə İdarəsinin rəis müavini Əli Nağıyevin qəzaya düşməsi barədə mətbuatda yazılar gedərkən, onun özü ilə əlaqə saxlayaraq, belə bir qəzanın olmadığını aydınlaşdırmışdım. İndi həmin yazıların hamısını qarşıma qoyaraq bildirilər ki, biz sənə çoxdan nəzarət edirdik” - deyə Pərviz vurğuladı.  Jurnalist onu da bildirdi ki, o, istintaqda cəmi 3 dəfə ifadə versə də, cinayət işinin materiallarında onun adından ifadələr var: “Düzdür, həmin ifadələrdə əleyhimə bir şey yazılmayıb. Qeyd olunub ki, mən ittihamları rədd edirəm.  Ã–züm verdiyim ifadələrdə isə bu fikirlərlə yanaşı, siyasi motivlə həbs olunduğumu da deyirdim”.

Pərviz Həşimli proses başlayan kimi hakimdən söz alaraq ona müraciət təqdim etdi. “Ötən prosesdə mənə xəbərdarlıq etdiniz ki, məhkəməyə hörmətlə yanaşmaq borcumdur. Bəli, hakimə və məhkəməyə hörmət etmək  qanunla borcumdur. Amma qanunlara hörmət etmək də sizin borcunuzdur. Ötən prosesdə MTN-in istintaq təcridxanasında işgəncəyə məruz qaldığımı, hüquqlarımın pozulduğunu və basqı altında olduğumu bildirərək, qanunvericilikdə nəzərdə tutulmuş qaydada Bakı İstintaq Təcridxanasına köçürülməyim barədə vəsatət verdik və kifayət qədər əsaslandırmağımıza baxmayaraq, təmin etmədiniz. Həmin məhkəmədən sonra məni gəzinti hüququmdan da məhrum ediblər. Həmçinin orada mənə qanunvericilikdə nəzərdə tutulmuş qaydada ailə üzvlərim və yaxınlarımla görüşmək hüququm, vəkillərimlə konfedensil ünsiyyət hüququm pozulur. Ötən dəfə də bildirdim ki, sizə və digər instansiyalara göndərdiyim müraciət və şikayətlərim ünvanına çatdırılmır. Ona görə də müraciəti sizə məhkəmədə təqdim edirəm” - deyə P.Həşimli bildirdi.

Hakim isə jurnalistin müraciətini elan etdi. Müraciətdə qanunvericilikdə nəzərdə tutulmuş - ailəsi ilə görüş, telefon əlaqəsi və s. hüquqlarının təmin olunması ilə bağlı istintaq təcridxanasının rəhbərliyinə məktub hanzırlanması məhkəməsən xahiş edilib.

Hakim bildirdi ki, təqsirləndirilən şəxsin bu hüquqları qanunvericilkdə nəzərdə tutulub və bu hüquqları təmin etmək təcridxana rəhbərliyinin vəzifəsidir. 

Hakim Novruz Kərimov: - Hər dəfə mənim  MTN-də işləməyimi xüsusilə vurğulamağa ehtiyac yoxdur. Mən əvvəllər sizi tanımamışam. Siz məni tanıyırdınız?

Pərviz Həşimli: - Tanımırdım, adınızı eşitmişdim...

Hakim: Mən heç adınızı da eşitməmişdim. Cinayət işi icraatıma verilən günün səhəri vəkil bildirdi ki, sizin icrratda belə bir iş var. Yalnız ondan sonra işlə tanış olub, sizin barənizdə məlumat almışam.

Pərviz Həşimli: - Ancaq hörmətli hakim, mənim hələ istintaqım gedən zaman demişdilər ki, sənin işinə məhkəmədə də özümüz baxcağıq. Şəxsən də sizin adınızı çəkdilər ki, MTN-in sabiq müstəntiqi Novruz Kərimov işə baxaraq sənə 6 il iş verəcək...

Hakim: - Sizə kim nə deyib bilmirəm, bir daha deyirəm ki, mən işi icrrata götürəndən 1 gün sonra sizin adınızı oxumuşam. Ona qədər sizi şəxsən tanımamışam. Bu, mənim üçün icraatımda olan adi işlərdən biridir. O ki qaldı MTN-in istintaq təcridxanasında hüquqlarınızın pozulması ilə bağlı dediklərinizə, sizin bu hüquqlarınız qanunvericilikdə nəzərdə tutulub və təmin olunmalıdır.

Pərviz Həşimli: - Faktiki olaraq təmin olunmur, ona görə də, xahiş edirəm, mənim Bakı İstintaq Təcridxanasına köçürülməyimi təmin edəsiniz. 

Hakim: - Sizin yaxın qohumlarınızdan müraciət daxil olub, bu məsələni araşdırarıq, sizə də cavabını deyərik. Amma bu, məhkəmə iclasında araşdırılan məsələ deyil. Sizin kimdənsə narazılığınız, şikayətiniz ola bilər, biz burada həmin məsələlərə baxmırıq. 

Hakim: Mən məhkəmənin səlahiyyətinə aid olan məsələlərə baxacağam. Amma kiminsə səlahiyyətinə və vəzifəsinə aid olan məsələyəni öz üzərimə götürsəm, qanunu pozmuş olaram. Təcridxana rəhbərliyinin sizin hüquqlarınızı pozduğunu hesab edirsinizsə, bununla bağlı Prokurorluğa müraciət edə bilərsiniz.

Vəkil Bəhruz Bayramov: - Mənim əlimdən qeydlərim qanunsuz olaraq alınıb, halbuki o qeydlər konfidensialdır...

Hakim: - Bununla bağlı vəzifəli şəxsin qanunsuz hərəkətindən müvafiq qaydada şikayət vermək hüququnuz var.

Hakim: - Sizin hüquqlarınızın pozulması yox, hüquqlarınızın bərpa olunması məni qane edir. Burada bütün məsələlər qanunvercilik qaydasında araşdırılaraq hüquqi qiymət veriləcək...

Daha sonra məhkəmə hazırlıq iclasının yekunlaşması və işin mahiyyəti üzrə baxışa təyin olunması ilə bağlı tərəflərin fikrini soruşdu. Vəkil Fariz Namazlı bildirdi ki, ötən məhkəmə iclası vəkillərin Pərviz Həşimli ilə görüşə bilmədiyi üçün müdafiə taktikası müayyənləşdirilməməsi səbəbilə təxirə salınmışdı. “Siz görüşə icazə verilməsi ilə bağlı məktub təqdim etsəniz də, arada cəmi 2 gün vardı və bu müddət məktubun təqdim edilməsi proseduru üçün yetrəli olmadı” - deyən vəkilə hakim bildirdi ki, məhkəmə vaxt verə bilər. Pərviz Həşimli isə vəkilə təxirə salmağa ehtiyac olmadığını bildirdi. Digər təqsirləndirilən və vəkili də cinayət işinin baxışa təyin edilməsinə etiraz etmədilər.

Daha sonra dövlət ittihamçısı çıxış edərək, təqsirləndirilən şəxslər barəsində həbs-qətimkan tədbiri dəyişdirilmədən, işin məhkəmə baxışına təyin edilməsi və açıq məhkəmə iclası vasitəsilə baxılması barədə qərar çıxarılmasını xahiş etdi. 

Müşavirədən qayıtdıqdan sonra hakimlər təqsirləndirilən şəxslər barəsində həbs-qətimkan tədbirinin dəyişdirilmədən işin baxışa təyin olunması və ilk prosesin 11 mart 2014-cü il saat 10.00-a təyin edilməsi barədə qərarı elan etdilər. 

Tanınmış jurnalist və hüquq müdafiəçisi Pərviz Həşimli sentyabrın 17-də Milli Təhlükəsizlik Nazirliyinin keçirdiyi əməliyyatla saxlanıb. Onlara qarşı Cinayət Məcəlləsinin 206.3.2-ci (qabaqcadan əlbir olan bir qrup şəxs tərəfindən odlu silahın və döyüş sursatının qaçaqmalçılığı- beş ildən səkkiz ilədək müddətə azadlıqdan məhrum etmə ilə cəzalandırılır) və 228.2.1-ci (qabaqcadan əlbir olan bir qrup şəxs tərəfindən qanunsuz olaraq odlu silah, onun komplekt hissələrini və döyüş sursatını əldə etmə, saxlama, daşıma - üç ildən beş ilədək müddətə azadlıqdan məhrum etmə ilə cəzalandırılır) maddələri üzrə ittiham irəli sürülüb və barəsində Səbail rayon məhkəməsi tərəfindən 2 aylıq həbs-qətimkan tədbiri seçilib. Noyabrın 7-də həbs-qətimkan tədbirinin müddəti 3 ay artırılıb. İstintaqın yekunu olaraq  Pərviz Həşimliyə qarşı  Cinayət Məcəlləsinin 228.2.2-ci (qanunsuz olaraq odlu silah, döyüş sursatı və sair əldə etmə, saxlama, satma kimi əməllər təkrar törədildikdə ) maddəsi ilə də əlavə itiham irəli sürülüb.  

Pərviz Həşimli ittihamları qəbul etmir, hüquq müdafiəçiliyi və jurnalist fəaliyyətinə görə saxta ittihamla həbs edildiyini bəyan edir. Amnesty İnternational təşkilatı Pərviz Həşimlini “vicdan məhbusu” kimi tanıyıb.