Bugünlərdə sabiq millət vəkili Gültəkin Hacıbəyliyə qarşı yol verilən məhkəmə haqsızlığı ilə bağlı azadliq.info saytında maraqlı yazı dərc olunub.
Mövzunun aktuallığını nəzərə alaraq Moderator.az həmin yazını təqdim edir.
Yasamal Rayon Məhkəməsində Milli Şura üzvü Gültəkin Hacıbəyliyə qarşı xüsusi ittiham qaydasında 24 yanvar tarixli son məhkəmə iclasında Mahmud Mehdiyevin zərərçəkmiş qismində yalan ifadə verməsi faktı ifşa olunub.
Xatırladaq ki, Mahmud Mehdiyev məhkəməyə təqdim etdiyi iddia ərizəsində ailəli olduğunu göstərmişdi. Məhkəməyə ifadə verərkən Gültəkin Hacıbəylinin təkidlə “Siz ailəlisinizmi? Axı mətbuat sizin sonuncu həyat yoldaşınızla boşandığınızı yazır?” sualının cavabında “Mən ailəliyəm, mətbuat yalan yazır” demişdi.
Mahmud Mehdiyevin sonuncu həyat yoldaşı Musayeva Müjgan Füzuli qızı ilə nigahına xanımın qaldırdığı iddia əsasında Nərimanov Rayon Məhkəməsi hələ ötən ilin iyul ayında xitam verdiyi halda, Mahmud Mehdiyev 28 oktyabr 2013-cü il tarixli məhkəmə iclasında ona dəfələrlə aydınlaşdırıcı sual verilsə də, zərərçəkən qismində yalan ifadə verərək məhkəməni aldadıb. Bununla da o, Cinayət Məcəlləsinin 297.1-ci maddəsi ilə məsuliyyət daşımalıdır.
Məhkəmədə Gültəkin Hacıbəylinin Mahmud Mehdiyevin CM-in 297.1-ci Maddəsi ilə xüsusi qərardad qəbul edilərək Baş Prokurorluğuna göndərilməsi ilə bağlı vəsatətinə isə hakim Sərdar Mehrəliyev çox aqressiv reaksiya verib. O, “Siz bu barədə artıq vəsatət vermisiniz və sizə bildirilib ki, bu məsələyə yekunda münasibət bildiriləcək” deyib. Gültəkin Hacıbəyli hakimin düz danışmadığını, onun öncəki vəsatətinin tamamilə başqa hal ilə bağlı olduğunu bildirib: “Əvvəlki vəsatətimiz Mahmud Mehdiyevin 28 oktyabr tarixli məhkəmə iclasında məhkəmə baxışı iştirakçısı kmi məni təhqir etməklə məhkəməyə hörmətsizlik göstərməsi və bununla da CM-in 289.1-ci Maddəsi ilə məsuliyyətə cəlb edilməli olması haqqında idi. Mahmud Mehdiyev hər iki maddə ilə məsuliyyətə cəlb olunmalıdır”. Hakim isə hər iki vəsatətə yekunda qiymət veriləcəyini deyib. Lakin bunun baş verəcəyi və Baş Prokurorluğun 2010-cu ildə hərbi xidmətdən yayındığına və prokurorluq orqanı işçisinə yaraşmayan hərəkətlər etdiyinə görə işdən qovduğu, 2014-cü ilin yanvar ayında isə, görünür ki, müstəsna xidmətlərinə görə daha yüksək vəzifəyə bərpa etdiyi Mahmud Mehdiyevi törətdiyi əməllərə görə cinayət məsuliyyətinə cəlb edəcəyi inandırıcı görünmür. Yeri gəlmişkən, Mahmud Mehdiyevin bacısı Aynur Mehdiyevanın törətdiyi insan alveri ilə bağlı əməllərlə bağlı hələ ötən ilin iyun ayında cinayət işi başlanıb. Iş üzrə zərərçəkən kimi tanınan filippinli qadın üzləşmədə ona qarşı işgəncələri sübut edib, amma Aynur Mehdiyeva hələ də cinayət məsuliyyətindən yayındırılır. Faktiki olaraq bu işdə onu DIN-lə yanaşı Baş Prokurorluq himayə edir. Iki dəfə rəsmən ailəli olub boşanan, keçmiş nigahlardan olan övladlarını illərlə itirib axtarmayan, Gültəkin Hacıbəyliyə qarşı 17 may 2013-cü il tarixdə keçirdiyi mətbuat konfransında ağır böhtanlar və təhqirlər səsləndirən və buna görə barəsində xüsusi ittiham qaydasında şikayət verilmiş, prokuroluq orqanlarından qovulan və elə məhkəmənin gedişində yalan ifadə verməklə cinayət törədən Mahmud Mehdiyevin və bacısının saxta ittihamları əsasında Gültəkin Hacıbəyli dörd aydır təqib olunur. Maraqlıdır, görəsən məhkəmə zalında yalan ifadə verməklə cinayət qanununu kobud şəkildə pozan şəxs, müstəntiq vəzifəsində qanunçuluğu necə qoruyacaq?
Aşağıdakı kadrlar 24 yanvar tarixli iclasdan sonra Yasamal rayon məhkəməsinin həyətində çəkilib.
Yalnız hakimlərin və məhkəmə işçilərinin daxil olması iznli olan, kənar şəxslərə isə giriş qadağan edilən bu qapalı ərazidə Mehdiyevlərin maşın saxlamasına xüsusi icazə verilib. Eyni zamanda, Gültəkin Hacıbəyli tərəfdən prosesə gələn hər bir şəxs məhkəməyə girişdə xüsusi yoxlamadan keçirildiyi halda, Mehdiyevlər hamının gözü qarşısında məhkəməyə sərbəst daxil olurlar. Onlar məhkəməyə hakim statusunda daxil olur, elə prosesin gedişində də hakimə rəhbər göstərişlər verir, proses işirakçıları ilə qeyri-etik davranırlar. Hakimiyyət Mehdiyevlərin göstərdiyi müstəsna xidmətlər qarşılığında, Baş prokuror Zakir Qaralova üç il əvvəl imzaladığı əmrini geri oxutdurub, imzasını hörmətsiz etdisə, Mehdiyevlər təbii ki, məhkəmə ilə istədikləri kimi davrana bilərlər. Səhvini düzəldən Zakir Qaralovdan sonra yəqin ki, Daxili Işlər Nazirliyi də iki idarəsinin 13 iyun 2013-cü il tarixində qanunsuz birgə əməliyyat tədbiri keçirdiyini etiraf edəcək və Aynur Mehdiyevaya böhtan atdıqlarına görə ondan üzr istəyəcək. Məhz Mehdiyevlərə, daha doğrusu bütün baş verənlərin “səbəbkarı” olan Gültəkin Hacıbəyliyə görə DIN-in və Baş Prokurorluğun nüfuzu xərclənir, Mətbuat Xidmətlərinin fəaliyyəti iflic olub. Günlərlə davamlı şəkildə zənglər etsək də, həm Aynur Mehdiyevanın işindən, həm də Mahmud Mehdiyevin təyinatından danışmaqdan boyun qaçırırlar. Yəqin, deməyə söz tapmırlar. Bizcə, əlavə şərhə ehtiyac yoxdur.