Xəbər verdiyimiz kimi Əməkdar artist, birinci Qarabağ döyüşlərinin iştirakçısı, xanəndə Cabir Abdullayev Vətən müharibəsində şəhid olan hərbçimiz Səxavət Məmmədovun anası Mətanət Məmmədovanın arzusunu yerinə yetirib. Xanəndə şəhid anasının istəyi ilə şəhidin məzarı başında “Qarabağ şikəstəsi”ni ifa edib. 

 

Moderator.az-a açıqlamasında Cabir Abdullayev şəhid anasıyla Ağdamda Şəhidlər Xiyabanında rastlaşdığını bildirib:

 

“Şəhidimiz Səxavət Məmmədov Ağdamın Paşabəyli kəndindəndir. Sentyabrın 27-də şəhidlərimizin anım günündə Şəhidlər Xiyabanında şəhidlərimizi ziyarət edib xiyabandan çıxanda bir az da qəhərlənmişdim və arxadan kimsə qolumdan tutdu. Gördüm ki, şəhidimizin anasıdır və dedi ki, “Cabir müəllim, sizdən bir xahiş etmək istəyirəm. Mən şəhid Səxavət Məmmədovun anasıyam”. Dedim ki, buyurun xanım. Dedi ki, “1990-cı ildə siz bizim toyumuzda oxumusunuz. Oğlumuz da dünyaya gələndə arzu etmişdik ki, onun da toyunda oxuyasınız. Gedək onun qəbrinin üstündə “Qarabağ şikəstəsi” oxuyun”. Dedim ki, xanım, indi mənə oxumaq çətindir, çox qəhərliyəm. Geri qayıdıи şəhidin məzarını ziyarət edib şəhid anasına dedim ki, söz verirəm sizin arzunuzu yerinə yetirəcəm”. 

 

Xanəndə bildirib ki, daha sonra bəzi saytlar bunu başqa cür ictimaiyyətə təqdim ediblər:

 

“Daha sonra Bakıda jurnalistlər məndən müsahibə aldı və mən də olanları sizə dediyim kimi nəql etdim. Onlar isə yazının başlığında yazmışdılar ki, “Cabir Abdullayev şəhid anasının arzusunu yerinə yetirmədi”. Bu da təbii ki, birmənalı qarşılanmadı. Mənim yüz dənə dişim olsa, hamısını qoyub şəhidin yolunda gedərəm. Heç kim bilmir ki, mənim ağlamaqdan ürəyim partlayırdı deyə oxuya bilmirdim. Həmin başlığın da altından biri yazıb ki, “bu ağdamlıları birbaşa güllələmək lazımdır”. Bunu elə adam deyir ki, heç ömründə bir yaralının qolundan tutmayıb. Bu gün insanlarımız mənə çox hörmət edir, sağ olsunlar. Amma içində belə adamlar da var”.  

 

 

Muğam ifaçısı daha sonra jurnalist Lalə Azərtaşın dəvəti ilə Ağdama gedərək çəkiliş zamanı “Qarabağ şikəstəsi”ni ifa etdiyini deyib:

 

“Daha sonra bizim hörmətli jurnalistimiz Lalə Arətaş zəng vurub mənimlə danışdı, bundan kövrəldiyini bildirdi və təklif etdi ki, gedək şəhid anasının arzusunu yerinə yetirək.  Biz də Ağdama yollandıq və orda “Qarabağ şikəstəsi”ni ifa etdim. O, şəhid anasının bir ildir ki, üzü gülmür. Mənə qonşuları dedi ki, bu çəkilişdən, siz gəlib-gedəndən sonra onun üzü güldü, sanki arzusuna çatdı. Şəhidin məzarı üstündə oxumaq çətindir, amma bu şəhid anasının arzusu idi. O, şəhidə də bizim mərhum xanəndəmiz Səxavət Məmmədovun adını qoyublar. Şəhidimizin ailəsi çox kasıbdır, adamın ürəyi ağrıyır. Dünən verilişdə olduq və şəhid anasına dedim ki, qürurlu olun. Mən həmişə belə olmuşam”. 

 

Xanəndə birinci Qarabağ savaşında döyüşlərdə iştirak etdiyini və yaralılarımıza yardım etdiyini bildirib: 

 

“Camaat gedib qrimlənib rol oynayanda mən bütün günü yaralı daşımışam. Bütün bunlar bizim borcumuzdur. Həyatdı, şəhid anası da öz doğmasını itirib, çox çətindir, bu dərdi çəkənlər bilir. Şəhidlərimiz olmasaydı, torpaqlarımızı işğaldan azad edə bilməzdik. Şəhidlərimiz canları və qanlarıyla üstümüzdən bu töhməti götürdülər. Hamısı cavan uşaqlardır. 

 

Səxavətin də 24 yaşı var idi, BMP sürüb və yolda düşmən tərəfindən BMP-si vurulandan sonra döyüşməyə başlayıblar. Düşmən snayperi çox təəssüf ki, Səxavəti düz boğazından vurub. 21 gün Səxavətin nəşi ərazidə qalıb və sonra götürüblər”. 

 

Qeyd edək ki, şəhid Səxavət Vahab oğlu Məmmədovun ölümündən sonra ölkə başçısı tərəfindən “Vətən uğrunda”, “Cəsur döyüşçü”, “Suqovuşanın azad olunmasına görə”, “Qubadlının azad olunmasına görə” və “Laçının azad olunmasına görə” medalları ilə təltif edilib.