Jurnalist və hüquq müdafiəçisi Pərviz Həşimlinin işgəncəyə məruz qalması və saxlanma yerinin dəyişdirilərək, MTN-in İstintaq Təcridxanasından Bakı İstintaq Təcridxanasına köçürülməsi ilə bağlı şikayəti təmin edilmədi. Qapalı keçirilən məhkəmə prosesi barədə Bizimyol.info saytına vəkil Yalçın İmanov məlumat verib. Onun sözlərinə görə, Pərviz Həşimli qeyri-insani şəraitdə saxlanılması, ötən məhkəmədən sonra “kars”a salınması, ailəsi ilə görüşlərə icazə verilməməsi ilə bağlı məhkəməyə məlumat verib. Lakin məhkəmə Səbail Rayon Məhkəməsinin qərarını qüvvədə saxlayıb. 

Yada salaq ki, dekadrın 13-də sözügedən iddiaya baxılarkən vəkil Elçin Sadıqov Pərviz Həşimlinin qeydlərinin məhkəməyə gətirilməsinə icazə verilmədiyi üçün etiraz əlaməti olaraq prosesi tərk etmişdi. Pərviz də qeydlərinin gətirilməməsinə etiraz olaraq kürəyini məhkəməyə çevirdiyi üçün hakim onu prosesdən kənarlaşdırmışdı. Bundan sonra özünün və vəkilinin iştirakı olmadan keçirilən məhkəmədə iddia təmin edilməmişdi.

Pərviz Həşimli sentyabrın 17-də Milli Təhlükəsizlik Nazirliyinin keçirdiyi əməliyyatla saxlanıb. Ona qarşı Cinayət Məcəlləsinin 206.3.2-ci (qabaqcadan əlbir olan bir qrup şəxs tərəfindən odlu silahın və döyüş sursatının qaçaqmalçılığı- beş ildən səkkiz ilədək müddətə azadlıqdan məhrum etmə ilə cəzalandırılır) və 228.2.1-ci (qabaqcadan əlbir olan bir qrup şəxs tərəfindən qanunsuz olaraq odlu silah, onun komplekt hissələrini və döyüş sursatını əldə etmə, saxlama, daşıma - üç ildən beş ilədək müddətə azadlıqdan məhrum etmə ilə cəzalandırılır) maddələri üzrə ittiham irəli sürülüb və barəsində Səbail rayon məhkəməsi tərəfindən 2 aylıq həbs-qətimkan tədbiri seçilib. Noyabrın 7-də həbs-qətimkan tədbirinin müddəti 3 ay artırılıb.

Pərviz Həşimli ittihamları qəbul etmir, hüquq müdafiəçiliyi və jurnalist fəaliyyətinə görə saxta ittihamla həbs edildiyini bəyan edir. «Amnesty İnternational» təşkilatı Pərviz Həşimlini “vicdan məhbusu” kimi tanıyıb