Xəbər verdiyimiz kimi, dekabrın 17-də Sədərək Gömrük İdarəsinin rəisi  Mirməhəmməd Seyidov İstanbul-Qars təyyarə reysində ailəsi ilə birlikdə geri qayıdarkən Qars Hava Limanında polis tərəfindən saxlanılıb. Məlum olub ki, gömrük rəisi Türkiyədə Türkiyənin Mütəşəkkili Cinayətlərə Qarşı Mübarizə İdarəsinin əməkdaşları tərəfindən tutulub. İğdıra gətirilən M.Seyidov barəsində həbs qərarı çıxarılıb.

Qeyd edək ki, gələn xəbərlərdə Türkiyə ilə Naxçıvan arasındakı Dilucu Sərhəd Məntəqəsində 280 polisin apardığı əməliyyatda 1-i qadın olmaqla 7 gömrük əməkdaşı saxlanılıb. Əməliyyatda həmçinin 10 nəqliyyat şirkətinin sahibi də həbs olunub. Diplomatik mənbədən isə Trend-ə bildiriblər ki, Azərbaycanın Qarsdakı Baş Konsulluğunun əməkdaşları azərbaycanlı məmurun saxlanması məsələsini yaxından araşdırırlar. Baş Konsulluğun əməkdaşları Mirməhəmməd Seyidovun ifadə verməsi prosesində iştirak edirlər. Baş Konsulluq bu məsələni diqqətdə saxlayır.

Vəkil Aslan İsmayılov “Yeni Müsavat”a açıqlamasında gömrük rəisinin həbsinin Türkiyədə davam edən antikorrupsiya prosesi ilə bağlı olduğunu düşündüyünü deyib.

 Hüquqşünasın fikrincə, Türkiyə ərazisində qanun pozuntusunda ittiham olunan M.Seyidovun saxlanılması normaldır: “Məlumatda belə gedirdi ki, sərhədin o tərəfindən çoxlu şikayətlər olub. İkincisi də, bizimkilər deyir ki, bu həbsin Türkiyədə davam edən böyük rüşvət qalmaqalına aidiyyəti yoxdur, amma mən hesab edirəm ki, Türkiyədən daşınan qızıl və pulun Sədərəkdən keçən hissəsi olub. Onu çağırıb tutmayıblar və eyni zamanda onu tutanda buraya xəbər verməyiblər. Türkiyədə yüzlərlə azərbaycanlı tutulur, bununla bağlı Azərbaycan Xarici İşlər Nazirliyinə məlumat verilmir ki?

Həmçinin görünən odur ki, Türkiyə hüquq-mühafizə orqanları bunu ora çağırmayıblar, çağırsaydılar yəqin ki, getməzdi. Görünür, bu adam başqa işlə bağlı ora gedib və bu zaman həbs olunub. Sual olunur ki, o zaman niyə ora daxil olan kimi tutmayıblar? Hiss olunur ki, onun Türkiyədə keçirdiyi görüşlər, danışıqlar izlənilib və sərhəddən geri qayıdarkən tutublar".

Türkiyədə baş verən son həbslərə toxunan A.İsmayılov deyib ki, bu hadisə qonşu ölkədə kök salan korrupsiya cinayəti şəbəkəsinin ifşası hadisəsi kimi müsbət qiymətləndirilməlidir: “Bir çoxları Türkiyədə baş verənləri dövlət içində Ərdoğan-Gülən davası kimi qələmə verirlər. Ancaq əgər rüşvət cinayəti ilə bağlı həbslər aparılırsa buna görə təşəkkür etmək lazımdır. Bəli, Ərdoğan hakimiyyəti Türkiyə üçün böyük işlər görüb, amma bu o demək deyil ki, Ərdoğan hakimiyyəti milyonlarla rüşvət almalıdır. İstənilən halda baş verənlər Türkiyə cəmiyyətinin saflaşmasına və Qərbə doğru inteqrasiya etməsinə təkan verəcək”.

Türkiyədə hakimiyyət problemi, daha doğrusu dövlət içində təşkilatlanma məsələsinin olduğunu qeyd edən A.İsmayılov deyir ki, Türkiyədə başladılan bu əməliyyatın arxasında ABŞ-ın əli ola bilər: “Yadınızdadırsa Ərdoğan Fətullah Gülənin arxasında Amerikanın dayanmasından istifadə edərək ordunu zərərsizləşdirdi. Ərdoğan bilirdi ki, bunu Amerika edir. Biz yaxşı bilirik ki, Ərdoğanın təkbaşına orduya gücü çatmazdı.

Bugünkü proseslərin arxasında da Amerika var. Çünki Ərdoğan son zamanlar Amerikanı saya salmırdı, Çinlə, Rusiya ilə münasibətlər qurdu. Gömrük İttifaqına girəcəyi mesajını verdi, Şanxay Qrupunun assosiativ üzvü oldu. Amerika bunu qəbul eləməzdi, NATO-nun üzvünə bunu bağışlamazdılar. Ərdoğan iki kresloda oturmaq istədi, ona görə də onun ipini çəkdilər. Amma istənilən halda bu proseslər Türkiyə cəmiyyətinin faydasınadır. Ərdoğanın istefaya gedəcəyinə isə inanmıram".

Vəkilin sözlərinə görə, istənilən iqtidarın əli bulaşdığı rüşvət və korrupsiya faktını kim ifşa edirsə, bu, onun haqqıdır: “Necə olmalı idi ki? Birincisi, AKP zəifləyəcək. Ərdoğan hakimiyyəti parçalanacaq. Gələcək seçkilərdə AKP ciddi səs itiklinə məruz qalacaq. Yeni hakimiyyətə gələn qüvvələr də başa düşəcək ki, qanunsuzluqlara yol versələr gec-tez ifşa olunacaqlar. Ona görə də maksimum normal işləməyə çalışacaqlar”.

A.İsmayılov iddia edir ki, bu olaylardan ən böyük uduşla çıxacaq qüvvə Türkiyə cəmiyyəti olacaq. “Ərdoğan iqtidarının üzvlərinin rüşvət almalarını cəmiyyət, xalq həyata keçirmir. Bu prosesi hansısa gizli əl, iqtidardan da üstdə dayanan bir qüvvə həyata keçirir. Bunun özü daha qorxulu proses deyilmi” sualına A.İsmayılov belə cavab verdi: “Kim ifşa edir etsin, hansı qüvvə bu prosesin arxasında dayanırsa dayansın, ortada ciddi korrupsiya və rüşvətin, həmçinin qanunsuz əməllərin ifşası varsa, bunu ancaq alqışlamaq lazımdır. Bu, cəmiyyətin saflaşmasına xidmət edir”.

“Proseslərin yekunu olaraq Ərdoğan istefaya gedə bilərmi” sualına isə vəkilin cavabı belə oldu: “İnanmıram o, istefa verə. Çünki Ərdoğan xarakter etibarı ilə döyüşçüdür, inadçıdır. Amma onun komandası, hökuməti ciddi şəkildə parçalanacaq”.