Xəbər verdiyimiz kimi bu gün Qarakənd faciəsində şəhid olan Əməkdar jurnalist, Milli Qəhrəman Alı Mustafayevin doğum günüdür. 

 

Moderator.az-ın əməkdaşı bu münasibətlə tanınmış jurnalistlərin fikrini öyrənib. Professor Qulu Məhərrəmli saytımıza açıqlamasında bildirib ki, o, uzun müddət A.Mustafayevlə bir yerdə çalışıb və onu cəsarətli insan kimi tanıyır:

 

“Alı Mustafayevlə biz uzun illər bir yerdə çalışmışıq və həm də jurnalistika fakültəsində təxminən eyni vaxtda oxumuşuq. AzTV-də “Xəbərlər” proqramında birgə çalışmışıq. Alı çox parlaq, millətsevən, həqiqətsevən bir insan kimi yadımda qalıb. Biz keçid dövrü yaşayırdıq, indi olduğu kimi çoxlu problemlərimiz var idi və Alı o problemlərin heç birisinə biganə qalmırdı. Yəni başqaları kimi susa da, laqeyd də ola bilərdi, amma Alının o böyük ürəyi, vətəndaşlığı, vətənpərvərliyi buna imkan vermədi. Ona görə də o, çox maraqlı reportajlar hazırlayırdı, milli problemlərdən söhbət açırdı. Xüsusən erməni işğalıyla bağlı Moskvanın ədalətsizliyi ilə bağlı  çox maraqlı reportajları var idi. Alı yaxşı şair idi, çox gözəl təbi, ifadə tərzi var idi, çox səmimi şeirləri var idi. Ona görə belə bir adamın bizim həm mətbuat tariximizdə, həm də ədəbiyyat və jurnalistika tariximizdə olması milli ideyaların yayılması üçün çox önəmli idi. Harda bir mürəkkəb çətin çəkiliş var idisə, Alı mütləq çalışırdı ki, ora getsin.Vertolyot hadisəsindən sonra onun həlak olmasını hamımız milli kədər kimi qəbul etdik. Çünki bir vətənpərvər jurnalistin həlak olması bizim üçün çox böyük itki idi. Həm də yaxın dost, sirdaş, gözəl bir reportyor idi. Yəni bunlar hamısı Alını səciyyələndirən keyfiyyətlər idi. Məsələn, televiziyada verilişlər müzakirə olunurdu və Alı orda çox kəskin danışırdı. Yadımdadır ki, toplantıların birində o vaxt televiziyanın sədri Elşad Xəlilov camaatı sakitləşdirmək üçün mənzərə yaratmağa çalışanda Alı ayağa qalxıb dedi ki, “Elşad müəllim, siz niyə belə yanlış məlumatlar verirsiniz? Bilirsiniz ki, sərhədlərimizə hücumlar olur və ölənlərimiz var”. Yəni o vaxt bunu deməyə cəsarət lazım idi. Alı haqsızlığa, yanlışlığa dözmürdü. O, mənim yaddaşımda parlaq insan kimi qalıb, həmişə onu xatırlayırıq. Bəzən yolum Alının yaşadığı evin yanından keçir və orda onun xatirə lövhəsi vurulub. Hər dəfə o istiqamətə gedəndə xatirə lövhəsinə gül qoyuram. Sevinirəm ki, bizim televiziyanın tarixində Alı Mustafayev kimi fədakar bir jurnalist və gözəl bir reportyor olub. Allah rəhmət eləsin”. 

 

Media eksperti Arif Əliyev saytımıza açıqlamasında Alı Mustafayevin həm gözəl jurnalist və həm də insan olduğunu bildirdi:

 

“Alı Mustafayev gözəl bir insan və jurnalist idi. Həm insan və həm də peşə şərəfini yaşayıb ömrünü o cür də başa vurdu. Çox sevinirəm ki, uğrunda getdiyi bir işi sonrakı nəsillər və jurnalist nəsilləri başa çatdırmaqdadır. Hələki deyə bilmərik biz o işi başa çatdırmışıq, amma hər halda bu istiqamətdə xeyli addımlar atılıb. Allah rəhmət eləsin!”.

 

“525-ci qəzet”in baş redaktoru Rəşad Məcid saytımıza açıqlamasında bildirib ki, Alı Mustafayev bir əfsanə kimi cəmiyyətimizin yaddaşında qalıb:

 

“Ruhu şad olsun. Alı Mustafayev bir əfsanə kimi Azərbaycan cəmiyyətinin, insanların yaddaşında qalıb. Onun faciəvi ölümü heç vaxt unudulmur. O, həm də gözəl şeirlər müəllifi idi, jurnalist idi. Doğum günündə onu bizim yad etməyimiz isə elə bilirəm ki, bir vəfa borcudur. Allah onu rəhmət eləsin”.