Xəbər verdiyimiz kimi aparıcı Nigar Sabirqızı telekanalların mart ayı üzrə “YouTube” reytinqini paylaşıb. Sıralamada İctimai Televiziya birinci yerdə olub. AzTV isə 8-ci yerdə qərarlaşıb. Bir sözlə, 2-ci, 3-cü yerləri özəl kanallar tutub. 

 

2021 ci ilin mart ayı üçün telekanalların Youtube reytinqi:

 

1. İCTİMAİ TV -  10 024 651
2. ARB TV - 9 507 155
3. BAKU TV- 9 503 344
4. XƏZƏR TV - 5 686 803
5. ATV - 5 021 879
6. CVN TV - 2 977 029
7. DALGA TV -  988 804
8. AZTV - 316 241
9. REAL TV - 284 917
10. KANAL 8 - 37 699
11. MƏDƏNİYYƏT TV - 21 320
12. SPACE TV - 11 135
13. CBC SPORT - 6 422
14. İDMAN TV - 586
 

Bəs görən Azərbaycan Dövlət Televiziyası niyə bu siyahıda özəl kanallardan geridə qalıb?

 

Moderator.az-ın əməkdaşı bununla bağlı ekspertlərin fikrini öyrənib.

 

Professor Qulu Məhərrəmli saytımıza açıqlamasında məsələni bu cür şərh edib:

“Mart ayının çox hissəsi bayram günləridir. Bu ay daha çox konsert, əyləncə proqramları və sair var. Bununla yanaşı, əlbəttə, veriliş cədvəlində daimi proqramlar var ki, onlar heç nədən asılı olmadan gedir. Təkcə xəbərləryox, irihəcimli müzakirə, diskussiya proqramları, portret verilişləri və yayım cədvəlində daimi yeri olan verilişlər var ki, onlar yayımlanır. Ona görə də haqqında danışdığımız cədvəl deməzdim ki, tam obyektivdir və yaxud kimsə buna subyektiv yanaşıb. Auditoriyanı öyərənən reytinq təşkilatlarının konkret metodikası olur və onun əsasında bunu müəyyənləşdirirlər. Bunu şərti cədvəl kimi qəbul etmək olar. Məsələn, burda doğru olan İctimai Televiziyanın birinci yerdə olmasıdır. Hesab edirəm ki, İctimai Televiziyaya baxanların sayı çoxdur. Son vaxtlar “ARB 24” informasiya kanalı kimi özünü doğruldur. “Baku TV”də çox maraqlı verilişlər, operativ reportajlar gedir. Başqa televiziyalarda olmayan bir çox proqram formatları orda görürəm. “Xəzər”TV-də müəyyən dinamik proseslər gedir və bunu danmaq olmaz. Amma eyni zamanda, əlbbəttə ki, bu gün baxılan kanallarımız var. Tutaq ki, “REAL” TV baxılır, AzTV-də hər halda müəyyən verilişlər gedir və tutaq ki, ATV-nin özü, xüsusən onun xəbər proqramında maraqlı süjetlər olur. “Space” oyanış və keçid dövrünü yaşayır, orda da yeni nüanslar nəzərə çarpır. Ona görə də bunları öyrənmək və dəqiq reytinq çıxarmaq çox vacibdir. Bir ayın reytinq cədvəli ilə tam mühakimə yürütmək olmur. Bunun üçün Azərbaycanda əlbəttə ki, alternativ reytinq təşkilatları olmalıdır, onların metodikası açıq olmalıdır və onların ictimaiyyətə təqdim etdiyi reytinq cədvəli konkret meyarlara əsaslanmalıdır”.  

 

Media eksperti Arif Əliyev isə saytımıza açıqlamasında dövlət televiziyalarının fəaliyyət dariəsinin həmişə məhdud olduğunu bildirdi:

“Ümumiyyətlə, dövlət kanalları gedirə qalırlar. Bu hər yerdə belədir. Çünki onların məhdudiyyəti böyük olur. Bu gün dövlət kanalları yox dəcəsindədir və ancaq ictimai kanallar mövcuddur. Yəni dövlət kanalları ictimai kanala çevrilib. Azərbaycanın qarşısında 2000-ci illərdə Avropa Şurasına daxil olanda belə şərt qoyulmuşdu. Amma sonradan fikir dəyişildi və AzTV-nin bazasında yeni bir İctimai Televiziya yarandı. Yəni bu beynəlxalq aləmdə də çox tanış səhnədir. Dövlət televiziyaların məhdudiyyət sahəsi həmişə dar olub, çünki onlar daha çox dövlət siyasətinin təbliği üçün fəaliyyət göstərirlər. Ona görə də tamaşaçıların onlara marağı o qədər də böyük deyil. Yəni bu sorğusuz da qəbul olunur.

 

İctimai Televiziyanın statusu xeyli dərəcədə fərqlidir. Onun haqqında ayrıca qanun var. Uzun müddətdən sonra Azərbaycan efirində İctimai Televiziyada dəyişikliklər birinci olaraq baş verdi və biz bunun şahidi olduq. Ora yeni rəhbərlik gələndən sonra verilişlər açılmağa, birbaşa efir genişlənməyə, uzun müddət efirə qadağa qoyulan insanlar ora gəlməyə başladı. Ona görə də bunun onun baxışına təsiri var. Eyni zamanda, bizim təşkilat media orqanlarının sosial şəbəkələrdə irəliləmələrinə də fikir verir. Orda da İctimai Televiziyanın göstərdiyi nəticələr bir çoxlarından xeyli dərəcədə üstündür. Bununla yanaşı, televiziyada kadrlardan da çox şey asılıdır. Maliyyə cəhətdən biz müqayisə etsək, əlbəttə, heç bir kütləvi informasiya vasitəsi dövlət televiziyası ilə müqayisə oluna bilməz. Yəni AzTV-nin maliyyə imkanları daha çox üstündür. Ancaq İctimai Televiziyanın həyata keçirdiyi proqram siyasəti daha uğurludur və daha çox tamaşaçı cəlb edə bilir”.