“Artıq qələbə bizim və ya o tayın qələbəsi yox, bütövlükdə Azərbaycan xalqının qələbəsidir. İnsanlarımız dünyanın harasında yaşamasından asılı olmayaraq buna sevindi, özünü o əsgərlərimizdən biri hesab etdi, şəhidlərimizə görə göz yaşı tökdü, dərdimizə və sevincimizə şərik oldu. Yəni artıq hesab edirəm ki, o tay, bu tay söhbəti yoxdur, bunu birmənalı olaraq başa düşmək lazımdır”

Bunu Moderator.az-a açıqlamasında yazıçı, Azərbaycan Yazıçılar Birliyinin Güney Azərbaycan Şöbəsinin rəhbəri Sayman Aruz deyib:

“Ümumiyyətlə, hesab edirəm ki, Qarabağdakı qələbəmiz dünyanın hər bir ölkəsində yaşayan azərbaycanlıları birləşdirdi və həmrəyliyimizi möhkəmləndirdi. Artıq qələbə bizim və ya o tayın qələbəsi yox, bütövlükdə Azərbaycan xalqının qələbəsidir. İnsanlarımız dünyanın harasında yaşamasından asılı olmayaraq buna sevindi, özünü o əsgərlərimizdən biri hesab etdi, şəhidlərimizə görə göz yaşı tökdü, dərdimizə və sevincimizə şərik oldu. Yəni artıq hesab edirəm ki, o tay, bu tay söhbəti yoxdur, bunu birmənalı olaraq başa düşmək lazımdır. Siyasi sərhədlər yerindədir, amma mənəvi və psixoloji sərhədlər yoxdur. Cənubda yaşayan soydaşlarımız da həmişə təkrar ediblər, xüsusilə indiki dönəmdə lap təkidlə təkrar edirlər ki, bir xalqın bir bayrağı, bir dövlətin bir Ali Baş Komandanı olar. Mənə gələn məlumatların hamısı bunu təsdiq edir. Hətta sizə onu da deyim ki, əgər Azərbayca Respublikasının prezidenti İranda seçkilərdə iştirak etsə, birmənalı olaraq birinci yerdə olar. Yəni cənab prezident o dərəcədə sevilir. Hamımız da bilirik ki, İranda 52 milyondan artıq Azərbaycan və türk xalqı var. Ona görə də ən böyük səs də bizdədir. Əgər bu qələbəmiz, dirçəlişimiz, inkişafımız belə sürətlə gedərsə, Azərbaycan xalqını, dövlətçiliyini gələcəkdə də çox böyük nailiyyətlər gözləyir. Mən xahiş edirəm ki, Araz çayını bizim ayrılıq yerimiz kimi hesab etməsinlər. Çünki biz Xudafərin körpüsüylə bir-birimizə birləşdik, Qarabağ qələbəsiylə bütövləşdik”.

S.Aruz ədəbiyatımızda da qələbə ruhlu şeirlərin yazılacağını bildirib:

“Qalib millətin ədəbiyyatı və mədəniyyəti də qələbə ətri verər. Bu cənabda da, bizdə də belədir. Keçən onillikdə Qarabağı itirmiş bir xalq olaraq Nizami Gəncəvini təqdim edəndə hardasa bir az çəkinirdik, Nəsiminin 650 illiyini qeyd edəndə torpaqları işğalda olan bir xalq kimi bu hissləri keçirirdik. Amma bu gün artıq onlar qalib Azərbaycanın şairləridirlər. Biz onları həm bütün dünyaya təqdim edirik, həm də bundan sonrakı ədəbiyyatımız da bu qələbəni özündə daşımalıdır. Cənubi Azərbaycanda da bu belədir. Yəni yazılan şeirlər, psixologiya “sınmış” insanların əhval-ruhiyyəsi deyil.  Onlar da artıq dirçəliblər, başıuca gəzirlər. Dünənə kimi bizim xalqımızın ana dilini, mədəniyyətini əlindən alan, təhqir edən iadamların məğrur şəkildə üzünə dayanıb deyirlər ki, biz qalibik, məğruruq, qəhrəmanıq. Və bu sənsən ki, işğalçısan, ermənisifətsən, başqa bir xalqın mədəniyyətinə, varlığına göz dikənsən. Mən bunu necə ki, Qarabağda etdim və bundan sonra dünyanın harasında azərbaycanlılara zor, zülüm var, orda da qalib olub, öz haqqımı alacam. Bu əhval-ruhiyyə ədəbiyyatımıza da təsir edib. Bizim Mədəniyyət kanalında “Körpü” verilişimiz var və bu əslində dünya azərbaycanlılarının mədəniyyət platformasıdır. Ona görə də orda da bizim məqsədimiz dünya azərbaycanlılarını Azərbaycan və Azərbaycançılıq ideologiyası ətrafında birləşdirməkdir. Yəni artıq qələbə oxumuz yaydan çıxıb, mümkün deyil, geri qayıtmayacağıq. Biz axıra kimi gedəcəyik”.