Əməkdar artist Baloğlan Əşrəfov həmkarı Tacir Şahmalıoğlunun fəxri ada layiq görülməsi üçün ölkə başçısına müraciət etməsini dəstəklədiyini bildirib. B.Əşrəfov Moderator.az-a açıqlamasında bunun T.Şahmalıoğlunun haqqı olduğunu deyib:

“Azərbaycanda məndən sonra konsert salonlarında ən çox konsert verən müğənni olmayıb və indi kim necə qiymət verər özü bilər. Bu gün fəxri ada layiq görülməsini istəyən Tacir Şahmalıoğlunu da qınamıram. Muğam müsabiqələrində Tacirin səsindən istifadə olunur və ona görə onun haqqı var ki, bunu tələb etsin. Bir sözlə, bu işlərə qarışmaq istəmirəm. Amma vaxtilə Qarabağla bağlı oxuduğum mahnıya görə mənim də başıma olmazın işləri gəlib”.

 

Müğənni hadisəni belə nəql edib və ölümlə hədələndiyini bildirib:

“1990-cı ildə 20 Yanvar faciəsindən sonra insanlar arasında bir mənəvi düşkünlük yarandı, musiqimiz, tamaşalarımız olmadı. O zaman Mərkəzi Komitədə qərara gəlirlər ki, insanların əhval-ruhiyyəsini qaldırmaq üçün konsert təşkil edək. Qərara gəlirlər ki, mənim konsertimi təşkil etsinlər. Azərbaycan Televiziyası heyəti ilə “Yaşıl Teatr”a gəldi və mənim orda konsetim təşkil olundu. Salon tamaşaçılarla dolu idi. Artıq səhnəyə çıxmağı gözləyəndə bir nəfər mənə yaxınlaşdı və soruşdu ki, “proqramda hansı mahnılarınız var, nə oxuyacaqsınız?” Dedim ki, başa düşmədim, sizə nə lazımdır? Dedi ki, “mən bilmək istəyirəm ki, sən nə oxuyacaqsan”. Dedim ki, sevgiyə, anaya, vətənə aid və bir də Tofiq Bayramın yazdığı “Öz canımı verərəm, Qarabağı vermərəm” mahısını oxuyacam. Dedi ki, “sən bu mahnını oxumayacaqsan”. Mən artıq onunla mübahisə etmək istəmədim və düşündüm ki, konsertim ləğv olunar. Bundan sonra adım çəkildi və səhnəyə çıxdım. Bütün mahnılarımı oxudum və həmin konsert “YouTube” kanalında da var. Bunu AzTV çəkib. Mahnılarımı oxuyub qurtarandan sonra elan etdim ki, indi də sizlərə sözləri Tofiq Bayrama aid olan “Öz canımı verərəm, Qarabağı vermərəm” mahnısını oxuyacam. Bunu deyən kimi tamaşaçılar alqışlamağa başladılar. Bu zaman o həmin adama baxanda gördüm ki, “mənə barmaq silkələdi və başımı kəsəcəyinə işarə etdi”. Mahnını oxuyub qurtarandan sonra uşaqlara dedim ki, məni dərhal burdan çıxarın, çünki burda təxribat var. Məni gizli yolla evə yola saldılar. Dərhal Mərkəzi Komitədən AzTV-yə əmr gəldi ki, o konsert efirə getməsin. O konserti çəkən rejissor mənə kasetini verdi və dedi ki, bizə əmr verilib ki, bunu efirə verməyin, ona görə kaseti sənə verirəm, saxlayarsan. Mənə dedilər ki, sən bundan sonra heç bir şeyə nail olmayacaqsan. Hətta o adama mən deyəndə ki, niyə Qarabağdan oxumayım? Əliylə hündürmərtəbəli binaları göstərib dedi ki, “orda yaşayanlar istəmir ki, sən Qarabağdan oxuyasan”. Buna görə bütün televiziyalarda mənə qadağa qoydular”.

B.Əşrəfov Heydər Əliyev hakimiyyətə gələndən sonra bu qadağanın aradan götürüldüyünü bildirib:

 “Allah ruhun şad etsin, ulu öndər Heydər Əliyev hakimiyyətə gələndən sonra mənə televiziyanın qapılarını açdırdı. Amma o hadisə heç vaxt yadımdan çıxmaz, bu mənə böyük zərbə oldu. Siz də bilirsiniz ki, Azərbaycan dövlət konsert saraylarını mənim qədər tamaşaçılarla dolduran olmayıb. Allah canın sağ eləsin indiki mədəniyyət nazirimiz Anar Kərimovun. Cavan kadrdı. Yəqin ki, onun bütün bunlarla maraqlanmağa vaxtı olmayacaq və kimin nə işlə məşğul olduğundan xəbəri olmayacaq. Yenə özləri bilərlər”.