Artıq bir neçə gündür ki, Ermənistanda uşaqların, azyaşlıların ordu sıralarına cəlb edilməsi ilə bağlı informasiyalar yayılmaqdadır. Bu informasiyaları təsdiq edən çoxsaylı foto-video materiallarda azyaşlı qız uşaqlarının belə əllərinə silah verildiyi, onların məcburi şəkildə hərbi təlimlərə cəlb edildiyi görünür.
Azərbaycan ordusu ilə qarşıdurmada böyük itkilərə məruz qalan, zərbə qüvvəsindən məhrum olan rəsmi İrəvanın uşaqları ordu sıralarına cəlb etməsində məqsəd insan resursu çatışmazlığını ortadan qaldırmaq, boş qalan səngərləri necə olursa-olsun doldurmaqdır. Məhz bu səbəbdən də qadınlar və yaşlılarla yanaşı, uşaqları da hərbi əməliyyatlara cəlb edən Ermənistan, bu yolla Azərbaycan ordusunun müzəffər yürüşünü qismən də olsa önləməyə çalışır. Baxmayaraq ki, I Qarabağ müharibəsində iştirak edən, döyüş təcrübəsinə malik erməni hərbçilərinin sürətlə məhv edən Azərbaycan əsgərinin qarşısında uşaqlardan və qadınlardan ibarət “ordu”nun davam gətirməyəcəyi gün işığı kimi aydındır.
Maraqlıdır, madam ki, getdikcə daha çox uşaq və qadın ittifaqından ibarət birliyə çevrilən müasir erməni ordusunun Azərbaycan əsgəri qarşısında davam gətirməyəcəyi bu qədər aydındır, o zaman Paşinyanın ana və uşaqları səngərlərə doldurması hansı məntiqdən irəli gəlir?
Uşaq qanı üzərində qərarlaşan hakimiyyət və ya yunan mifologiyasından alınan örnək!
Hadisə və proseslərin təhlili sübut edir ki, Paşinyanın uşaq və qadınları hərbi əməliyyatlara cəlb etməkdə məqsədi sadəcə və sadəcə öz hakimiyyətini qoruyub saxlamaq, ən pis halda onu mümkün qədər uzatmaqdır. Çünki Paşinyan siyasi müstəvidə nə qədər naşı olsa da, hərbi uğursuzluqların onun siyasi baxımdan da sonunu gətirəcəyinə əmindir. Paşinyan dəqiq bilir ki, işğal edilmiş torpaqları itirmək illər uzunu səfalət içərisində yaşayan Ermənistan toplumu qarşısında son təsəllidən və qalxandan da məhrum olmaq, hakimiyyətlə vidalaşmaq deməkdir. Bu da mümkündür ki, Paşinyanın vidalaşdığı yeganə şey bir tək hakimiyyət olmasın. Paşinyanın baş nazir postunda qərarlaşdığı ilk gündən etibarən Azərbaycan xalqı ilə yanaşı, erməni xalqına yönəlik də böyük cinayətlərə imza atdığını nəzərə alsaq, hakimiyyətdən gedəcəyi təqdirdə onun sərt mühakiməyə məhrum qalacağı, azadlığını və hətta həyatını itirəcəyi ehtimalı böyükdür.
Məhz bu səbəbdən də Paşinyan bu labüd sonluğu önləmək məqsədi ilə cəbhədəki uğursuzluqlara son qoymağa, Azərbaycan ordusunun irəliləməsinin qarşısını erməni uşaqları hesabına müvəqqəti də olsa almağa çalışır. Bu isə Paşinyan hakimiyyətinin sözün həqiqi mənasında uşaq qanı üzərində qərarlaşdığını göstərir.
Nə qədər qəribə də olsa, Paşinyanın uşaq qanı üzərində qurduğu səltənət qədim yunan mifalogiyasından Saturn nümunəsini yada salır. Mifologiyaya görə Kron (Roma mifologiyasında Saturn) övladlarının onu hakimiyyətdən devirə bilcəyindən ehtiyat edərək uşaqlarını udmuş, onları diri-diri yemişdir. Bu gün Paşinyanın öz hakimiyyətini qorumaq naminə erməni uşaqlarını silahlandıraraq ön xəttə göndərməsi, Azərbaycanın güclü və peşəkar ordusu qarşısına uşaq-qadın ittifaqını çıxarması, onun eynən Saturn kimi hərəkət etdiyini, erməni uşaqlarını anbaan, saatbasaat “yediyini” göstərir. Bu isə o deməkdir ki, “Ermənistan Saturnu”na qarşı ilk növbədə erməni toplumunun özü mübarizə aparmalı, övladlarını yeyən hakimiyyət hərisinə “dur” deməyi bacarmalıdır. Əks təqdirdə, XXI əsrin Saturnu erməni uşaqlarını, onların timsalında isə Ermənistanın gələcəyini yeməkdə davam edəcək.
“Övladlarını” öz təhlükəsizliyinə sipər edən “ata”
Ermənistanın mövcud rəhbərliyinin uşaq faktorundan öz hərbi-siyasi ambisiyaları üçün istifadə etdiyinə dair çoxsaylı faktlardan biri də düşmənin hərbi rəhbərliyinin uşaq bağçalarından qərargah və hərbi toplanış məntəqəsi kimi istifadə etməsi faktıdır. Mediada yer alan fotoların təhlili göstərir ki, Ermənistanın, eləcə də separatçı rejimin hərbi rəhbərliyi Azərbaycan ordusunun hücumlarından qorunmaq məqsədi ilə bir çox hallarda döyüş planlarını məhz uşaq bağçalarından müzakirə edir ki, bu da onların erməni uşaqlarının taleyini heçə saydığını, onların deyil, öz təhlükəsizliklərini düşündüklərini göstərir.
Bu günlərdə Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyevin verdiyi məlumatdan bəlli olub ki, separatçıların hərbi məşvərət keçirdiyi yerlərdən biri Xankəndi şəhərində yerləşən 3 saylı uşaq bağçasıdır. Sözügedən məşvərəti əks etdirən fotoların təhlili, separatçı hərbi liderlərin toplaşdığı otaqdakı rəng çalarları, divardakı güllər və xüsusi işarələr toplantı otağının bağça olduğunu təsdiq edir. Bu fakt bir daha təsdiq edir ki, Ermənistan hakimiyyəti sadəcə Azərbaycan xalqının deyil, eyni zamanda erməni uşaqlarının qanına susayıb və onları risk altına qoymaqdan qorxmur. Bu gün Paşinyan erməni uşaqlarını öz təhlükəsizliyi üçün sipər edən “ata” obrazında çıxış edir və bu obraz gün keçdikcə daha qorxunc mahiyyət kəsb etməkdədir. Və baş verənlər göstərir ki, bu “ata” öz maraqlarını təmin etmək üçün bütün “övladlarını” sonuncu nəfərinə qədər qurban etməyə hazırdır.
Seymur ƏLİYEV
E-mail: [email protected]