Xəbər verdiyimiz kimi sentyabrın 27-dən bu günə kimi erməni təcavüzü nəticəsində 69 mülki şəxsimiz həlak olub, 322 nəfər isə yaralanıb.

Moderator.az-a açıqlamasında yazıçı, Əməkdar jurnalist İradə Tuncay çox dilbilməz bir düşmənlə üz-üzə olduğumuzu və onları qandırmağın çətin olduğunu deyib:

“Düşmənin planlarından xəbərdar deyiləm. Bu, bütün qaydasıyla, qanunuyla, qanunsuzluqlarıyla geniş müharibədir. Özünüz də görürsünüz ki, böyük bir sahədə döyüş gedir. Belə bir vaxtda hər hansı bir itkinin olması labüddür, yəni bu olur. Biz buna görə ağlaşma qurmayacağıq, içimizdə daşa döndərib bu ağrıları saxlayacağıq. İnşallah hər şey bitəndən sonra, mən çox inanıram ki, qələbə çalacağıq və onda bu haqda danışarıq. Dünyada baş verən bütün müharibələrdə mülki şəxslər, qadınlar, uşaqlar həlak olublar. Bu gün elə bir düşmənlə üz-üzəyik ki, onlara heç nəyi nə anlatmaq, nə də qandırmaq olmur. Ermənilər özlərinin də xeyrinə bunu anlamırlar, əslində gərək onlar çoxdan təslim olaydılar”.