Məlum olduğu kimi 16 sentyabr 2013-cü il tarixi Azərbaycan Respublikasının növbəti Prezident seçkilərində seçkiqabağı təşviqat mərhələsinin ilk günü idi. Qanunvericiliyə görə, Prezidentliyə namizədlər üçün İctimai radioda çıxış etmək üçün efir vaxtı ayrılsa da, nədənsə Ədalət Partiyasının sədri İlyas İsmayılov və ya onun nümayəndəsinin səsini eşitmək mümkün olmadı. Sirr deyil ki, bu efir vaxtı indiki şəraitdə namizədlər üçün yaradılmış azsaylı təbliğat imkanlarından sayılır. Bəs, prezidentliyə namizəd ona yaradılmış bu fürsətdən niyə könüllü şəkildə imtina edib? Ədalət Partiyasının bu gün yaydığı bəyanatda bu məsələyə aydınlıq gətirilib.Moderator.az həmin bəyanatı təqdim edir:
“2013-cü il Prezident Seçkilərinin
seçkiqabağı təşviqat mərhələsi başlasa da nə yazıq ki, MSK-nın qanunvericiliyin
tələblərinə zidd olaraq həyata keçirdiyi yeni qaydalar namizədlərin seçki
hüquqlarını məhdudlaşdırmağa yönəlib. Yeni qaydaya əsasən efir vaxtından
istifadə etmək istəyən namizədlər və onların nümayəndələri çıxış edəcəkləri gün
MSK-ya müracət etməli və orda qeydiyyatdan keçməlidirlər. Halbuki, Azərbaycan Respublikasının
Seçki Məcəlləsində bu haqda heç bir göstəriş yoxdur. MSK isə təlimatlarında
qanunda nəzərdə tutulmayan yeni qaydalar tətbiq etməklə bizə yaradılmış onsuz
da kifayət qədər məhdud zamandan faydalanmaq imkanımızı belə məhdudlaşdırdı.
Biz hüquqi dövlət qururuq, bu dövlətdə də bütün ictimai münasibətlər qanunlarla
tənzim edilməlidir. MSK sovet dövründə olduğu kimi təlimatlarla qanuna zidd
qaydalar müəyyən etməklə namizədlərin hüquqlarını məhdudlaşdırmaqla məşğuldur.
Ədalət Partiyası bəyan edir ki, seçkiqabağı təşviğat
mərhələsində namizədlərin hüquq və vəzifələri Azərbaycan Respublikası Seçki Məcəlləsinin
74-cü maddəsində təsbit olunur və bu maddədə belə bir zərurətdən söhbət
açılmır. Yeni qayda isə bu məsələni xeyli çətinləşdirir və namizədlər qarşısında
bürokratik əngəllər yaradır.
Üstəlik, qanunda nəzərdə tutulmayan yeni
qaydalar haqqında namizədlərə də heç bir məlumat verilmədiyindən faktiki olaraq
iş vaxtından sonraya salınmış efir vaxtı zamanı ortaya çıxan problemlərin həlli
yolu da qalmır. Ədalət Partiyası İctimai Televiziyada və Radioda namizədlər
üçün yaradılmış çıxış saatlarının zamanlamasının da bilərəkdən təşviqat
prosesinə maneələr yaratmaq üçün planlaşdırıldığını düşünür. Belə ki, radioda
efir vaxtı saat 21-00, televiziyada isə 19-00-a təsadüf edir. Zamanlamanın bu şəkildə
seçilməsi sanki seçkinin taleyində həlledici rol oynamaq imkanına malik olan
seçicilərin böyük əksəriyyətinin prezidentliyə namizədlərin çıxışına qulaq
asmaq imkanlarını məhdudlaşdırılmağa yönəlib. Adətən saat 18-19 arasında işdən
ayrılan seçicilərin müəyyən zaman ərzində evə qayıtdığını nəzərə alsaq onların
bu çıxışları dinləmək üçün yolda televiziyaya baxmaları tələb olunur ki, bu da
reallıqla bir araya sığmır. Müasir çağımızda radiodan adətən avtonəqliyyatlarda
istifadə olunduğu da bir gerçəklikdir ki, MSK üzvləri özlərini sanki 100 il
bundan əvvəlki dövrün insanları kimi aparır və hələ də radionu gündəlik həyatda
istifadə olunan yeganə kütləvi informasiya vasitəsi hesab edir.
MSK-nın qanunda nəzərdə tutulmayan qaydaların
tətbiqində göstərdiyi operativlik də diqqətı çəkir. Halbuki biz - “ədalətçilər”
bu qurumu müraciətlərimizə qanunun tələblərinə zidd olaraq cavab verməyən orqan
kimi tanımışıq. Ədalət Partiyasının sədri, Milli Məclisin deputatı İlyas
İsmayılovun öz həmkarlarının qeyri-qanuni olaraq zəbt etdikəri iş yerləriylə
bağlı sorğusuna aylarla cavab verməməsinə baxmayaraq MSK-nın seçkiqabağı təşviqat
mərhələsində qanunda nəzərdə tutulmayan qaydalarla bizi tanış etməsindəki
“operativ”lik bizi xeyli təəccübləndirdi.
Ədalət Partiyası MSK-nı qanunlara hörmət etməyə
və qanunazidd təlimatları ilə namizədlərə təbliğat-təşviqat işində əngəl
yaratmamağa çağırır.