(Əvvəli burada://www.moderator.az/news/337553.html )

“...Bax, bunları, mən özümə səhv hesab edirəm. O ki qaldı iqtisadiyyat sahəsinə, onu tam açıq bilin, həm sənaye, həm də kənd təsərrüfatı sahəsində kobud səhvlər olmayıb... Sənayenin və kənd təsərrüfatının, sosial sahənin inkişafında 70-ci illərdə aparılmış iş, yaranmış potensial indi də Azərbaycanın iqtisadi potensialının əsasını təşkil edir. Bəzən düşünürəm, əgər 70-ci illərdə o böyük müasir zavodlar tikilməsəydi, indi Azərbaycanın o gəncləri harada işləyərdi? Əgər biz üzümçülüyü böyük sürətlə inkişaf etdirməsəydik?.. On gündən çoxdur ki, mən buradayam,  bütün gələn adamlar deyir, üzümdən biz nə qədər mənfəət götürmüşük. Ancaq təəssüf ki, sonralar başladılar üzüm bağlarını söküb-dağıtmağa...

Yaxud bu dağları deşə-deşə Bakıdan Naxçıvana qaz kəməri gətirmişik. Bir Naxçıvan üçün yox, Bakıdan Yevlağa, Yevlaxdan Ağdama, oradan Stepanakertə(indi rəsmi adı Xankəndi- S.L.),  ordan Gorusa, Sisyana, Sisyandan dağları aşıb Naxçıvana qaz kəməri gətirmişik...

-Yeri gəlmişkən, Heydər müəllim,  bilmək istəyirəm, qaz Yerevana gedib oradanmı Naxçıvana qaydır?

-Yox, yox. Bayaq dediyim istiqamətdə. O tərəfdən isə Rusiyadan gələn qaz Yerevana gedib çıxır. Əvvəllər Ermənistana, Gürcüstana qazı yalnız Azərbaycan verirdi. Ancaq Azərbaycanın qazı bütün Zaqafqaziyanı ödəyə bilmədi. Sonra Rusiyadan qaz gəldi...

Biz böyük-böyük su kəmərləri çəkirdik. Təkcə Bakıya yox, məsələn, buranın özünə indi yaxşı su gəlir.  Burada indi mən sərin su ilə əl-üzümü yuyuram, hətta bəzən içirəm də. Ancaq 70-ci ildə mən buraya gələndə Naxçıvanda camaat qışqırırdı ki, bir damcı su tapa bilmirik. Bir burada deyildi ki... Sabirabad zonasına, Xaçmaz və başqa zonalara da da böyük su kəmərləri çəkdik. Böyük su dəryaçalarını yada salıram...  Naxçıvanda Arpaçay su dəryaçası, Vayxır, Bənənyar... Sonra Xanbulaqçay hövzəsi, Ağstafaçay dəryaçası, Şamxor(hazırda Şəmkir- S.L.), Tərtərçay üzərində Sərsəng-Madagiz su hövzələri yaradıldı. Mirbəşir(indiki Tərtər-S.L.), Bərdə, Qasım İsmayılov(hazırkı Goranboy- S.L.) rayonlarının su ilə təchizatı yaxşılaşdırıldı. Böyük-böyük kanallar çəkilmişdi... 

Bunlar 70-ci illərdə yaranmışdı. Bəs sonra nə oldu?  Bakıda təyyarə meydanından şəhərə gələndə körpünün üstündəki bir binanı gördüm.  Orada böyük bir zavodun tikilməsi üçün vaxtilə Moskvadan naziri gətirdim buraya,  çox böyük məhsulu olan iri elektron zavodu tikilməliydi.  Binanın xarici görünüşünün də milli memarlıq əsasında olmasını istədim.  Yanından keçəndə gördüm ki, bina elə 8 il bundan qabaqkı (1982-ci il- S.L.) vəziyyətindədir... Tikib başa çatdırmayıblar... Yaxud İdman sarayı... Yadımdadır, 77-ci ildə başladıq...  İndi onun üstündən 13-14 il keçib... 

...Səhvim bir də o olub ki, bizim bəzi tədbirlər yerlərdə yerinə yetirilməyib, qəbul etdiyimiz qərarlar həyata keçirilməyib... ”

"Səhvim bir də o olub ki,  qəbul etdiyimiz bəzi  qərarlar  yerlərdə həyata keçirilməyib..."