Prezident seçkilərinə vaxt azaldıqca beynəlxalq qurumların Azərbaycan hakimiyyətinin tənqidinə yönəlik  açıqlamaları davam edir. Qeyd edək ki, son bir neçə gün ərzində dünyanın müxtəlif nüfuzlu qurumları və xarici kütləvi informasiya vasitələri hakimiyyəti seçkiqabağı insan hüquqlarını tapdalamaqda, vətəndaşların sərbəst toplaşmaq azadlığını və ifadə azadlığını məhdudlaşdırmaqda günahlandırıb. ATƏT Müşahidə Missiyasının seçkilərlə bağlı ilkin hesabatı da hakimiyyətin tənqidinə həsr edilib. Bu arada isə Amerika Dövlət katibinin demokratiya, insan hüquqları və əmək məsələləri üzrə köməkçisi Tomas Melianın sentyabrda Bakıya nəzərdə tutulan səfəri ləğv edilib. ABŞ-ın Azərbaycandakı səfirliyi açıqlamasında bildirib ki, Azərbaycan hökuməti ölkədə oktyabrın 9-da keçiriləcək prezident seçkilərinədək səfərin təxirə salınmasını istəyib. ABŞ səfirliyi hakimiyyətin bu qərarından təəssüfünü də ifadə edib. Moderator.az YAP icra katibinin müavini, millət vəkili Siyavuş Novruzovun “Bizim Yol” qəzetinə bu məsələlərə dair müsahibəsini təqdim edir:

 -       Siyavuş müəllim,  hakimiyyət ATƏT Müşahidə Missiyasının ilkin hesabatının belə tənqidi olacağını gözləyirdimi?

 -       Bu hesabatda subyektiv fikirlər çoxdur. Mən həmin hesabatla tanış olmuşam. Orada prezident seçkiləri ilə bağlı məsələlərdən daha çox başqa məsələlərə yer ayrılıb. Məsələn seçkiyə heç bir aidiyyatı olmasa da yazıblar ki, Milli Məclisdəki  125 deputat yerinin 71-nin birbaşa YAP-çılardan ibarətdir. Bu nə dərəcədə məntiqli bir fikirdir? Bəyəm, Milli Məclis təyinatlı orqandır? Demokratik seçki olub və parlament seçki yolu ilə formalaşıb. İndi Yeni Azərbaycan Partiyası öz yerlərindən imtina eməli deyil. Yazırlar ki, Milli Məclisdə müxalifət yoxdur. Bu gün Milli Məclisdə 10-na yaxın partiya var. 

 -        Son hesabatda seçici siyahısı ilə bağlı ciddi problem olduğu deyilir... 

 -        Mən bu fikirlər razı deyiləm. Hansısa dairənin hüdudunda bir neçə belə hal olan. Amma bunu kütləvi şəkildə təqdim etmək doğru deyil. Azərbaycanda seçici siyahıları təkcə seçki dövründə müəyyən edilmir. Qanunvericiliyin tələbinə görə, bu proses 6 aydan bir aparılır. Müvafiq seçki komissiyaları seçici siyahıları ilə bağlı ciddi işləyirlər. Bu gün hər bir seçici adının siyahıda olması üçün harasa getməsinə ehtiyacı yoxdur. Oturub, kompüterin qarşısında adını seçici siyahında axtara bilər. Seçki Məcəlləsinə görə, seçici hətta qeydiyyatda olmadığı rayonda belə səs verə bilər. Bunun üçün sadəcə qeydiyyatda olduğu rayondakı seçki komissiyasından arayış alıb, faktiki yaşadığı rayondakı məntəqə seçki komissiyasına təqdim etməlidir. Yaxud  son 6 ayda yaşadığını aktla sübut edə bilərsə, həmin ərazidə səsvermə hüququ var. Bunları ona görə xatırlatdım ki, Azərbaycan dövləti hər bir vətəndaşın seçki hüququndan yararlanması üçün əlindən gələni edib. Bunun üçün təminatlı qanunverici baza da yaradılıb.

 -       Seçkiqabağı durumu necə dəyərləndirirsiniz? Niyə ölkə telekanallarında seçki xəbərləri azdır. Sanki hakimiyyət ölkədə güclü seçki ab-havasının olmasında maraqlı deyil.

 -       Azərbaycanda seçkiqabağı durum yüksək səviyyədədir. Bu gün 20-yə yaxın prezidentliyə namizəd var. Artıq prosesin birinci mərhələsi geridə qalır. Bu prosesdə heç kəs çıxıb demədi ki, hansısa maneələrlə üzləşib. Müxalifətin namizədləri də imza kampaniyası apardı. Seçkilər seçki qanunun tələblərinə uyğun aparılır. Mən o fikirdə də deyiləm ki, seçki əhval-ruhiyyəsi cəmiyyətdə yoxdur. Bu gün Yeni Azərbaycan Partiyasının rayon-şəhər təşkilatları bu prosesdə aktivdirlər. Biz seçkilərdə məntəqələrə təyin edəcəyimiz müşahidəçilərə təlimlər keçirik. Bir sözlə seçki ilə bağlı bütün işləri fəaliyyət planına

uyğun olaraq həyata keçiririk. Müxalifətin elektoratı yoxdur ki, ölkə boyunca seçki işi ilə məşğul olsunlar. Bakıda bir qrup adamın qohum-əqrəbası hər dəfə bir yerə yığışıb, dağılışır.  Telekanallarla bağlı dediklərinizə gəlincə, bildirib ki, İctimai televiziyada seçkilərlə bağlı gündəlik maarifləndirmə verilişləri yayınlanır. Digər telekanalların da xəbərlərində Mərkəzi Seçki Komissiyasının iclasları barədə xəbərlər verilir. Xəbər portallarının, qəzetlərin əsas xəbərləri də seçkilərə aiddir. 

 -       Beynəlxalq təşkilatlar siyasi fəalların kütləvi həbsinin seçkilərlə bağlı olduğunu deyir. Qələbəsinə əmin olduğunu bəyan edən hakimiyyəti siyasi müxalifəti nədən həbsə atır?  

 -       Bu iddialar yersizdir. Çünki, Azərbaycan prezidentinə xalq dəstəyi var.  Kimlərsə tutulubsa, konkret əməlləri var. Heç kəs siyasi mövqeyinə görə həbs olunmur.  Əgər belə bir hal olsaydı, elə Cəmil Həsənliyə imza toplayanları həbs edərdilər. Axı hakimiyyətin belə bir niyyəti də yoxdur. Azərbaycanda hər kəs bilir ki, İlham Əliyevə xalq yenidən etimad göstərəcək. Bunun üçün ciddi əsaslar da var. Ötən illər ərzində cənab prezidentin gördüyü işlər göz önündədir. Kimsə cinayətdə

ittiham olunub, həbs edilirsə, ona siyasi don geyindirmək doğru deyil. 

 -       ATƏT Müşahidə Missiyası namizədlərin təbliğat kampaniyasının 28 gündən 23 günə endirilməsini, 2009-cu ildə Konstitusiyaya dəyişiklik edilərək eyni şəxsin 2 dəfədən artıq prezident seçilməsinə məhdudiyyət qoyulmasının aradan qaldırılmasını mənfi hal kimi dəyərləndirib. 

 -       Adından da göründüyü kimi bu prezident seçkiləri ilə bağlı ilkin dəyərləndirmədir. Bu hesabatda namizədlərin imza kampaniyası və seçki qanunvericiliyinin tətbiqindən irəli gələn məsələlərə yer ayrılmalıdır. Yoxsa ki, bir neçə il əvvəl olan hadisələri buraya yazmağa dəyməz. Bunun səbəbi var. Görünür, seçkinin bu mərhələsində nöqsan tapa bilmirlər, əvvələ qayıdırlar. Azərbaycanda refendum olanda bu kifayət qədər əsaslandırılıb. Bir də bu Konstitusiya dəyişikliyini hakimiyyət

yox, xalq edib. Xalqın qərarına hörmətlə yanaşmaq lazımdır. Təşviqat məsələsinə gəlincə, hesab edirəm ki, müəyyən olunan müddət tam normaldır. Hansısa namizədin seçki platforması varsa, onu efirdən də elan edə bilər. Bundan əlavə telekanallarda pullu efir vaxtları var. Ona görə də hesab edirəm ki, bu yanaşma doğru deyil.

-       ABŞ Dövlət Katibinin müavini Tomas Melia ilə niyə Azərbaycana buraxılmadı? O, Bakı səfərində insan hüquqları sahəsində problemləri müzakirə edəcəkdi?

-       Bununla bağlı mən geniş bilgiyə malik deyiləm. Azərbaycan tərəfi bu barədə qərarını təbii ki, əsaslandırıb. Yəqin ki, bir səbəb olub ki, səfərin başqa zamana keçirilməsi qərarı olub. Ancaq bununla bağlı ABŞ səfirliyinin açıqlamasını da doğru saymıram. Tomas Melia az qala ayda bir dəfə Azərbaycana gəlir. Burada prezident başda olmaqla ən yüksək

səviyyədə qəbul olunur. İndi texniki məsələyə görə, buna siyasi don geyindirmək doğru deyil.