Milli Məclisin Sosial Siyasət Komitəsinin sədri, YAP Siyasi Şurasının üzvü Hadi Rəcəbli "Bizim Yol"un suallarını cavablandırıb. YAP-çı deputatla söhbətimizdə qarşıdakı prezident seçkiləri, bir sıra beynəlxalq qurumların Azərbaycan hakimiyyətinə olan təpkiləri və müxalif düşərgəsindəki vəziyyətə nəzər saldıq.
Moderator.az həmin müsahibəni təqdim edir:
- Hadi müəllim, YAP rəhbərliyi İlham Əliyevin xüsusi təşviqat kampaniyası aparmayacağını bəyan etdi. Bəzi ekspertlər hesab edir ki, bu, dövlət başçısının növbəti dəfə xalqa vəd vermək istəməməsi ilə bağlıdır. Əsas gətirilir ki, ötən illərdə vədlər, açıqlamalar olsa da əhalinin sosial rifahında nə ciddi dəyişiklik oldu, nə də Dağlıq Qarabağ probleminin həlli yerindən tərpənmədi.
- Təəssüflər olsun ki, müxalif düşərgədə YAP-ın icra katibi Əli Əhmədovun bu açıqlaması fərqli yozulub. İlham Əliyevin ona görə xüsusi təşviqata, təbliğata ehtiyacı yoxdur ki, o bütün fəaliyyəti dönəmində xalq üçün çalışır. İlham Əliyev seçkidən seçkiyə camaat arasından çıxmır. Elə bir ay olmur ki, o bölgələrə səfərlər eləməsin. İnsanlarla ünsiyyət qurmasın. Azərbaycan prezidentinin hökumət qarşısında qoyduğu prioritetlərdən biri də regionların sosial-iqtisadi inkişafı barədədir. Bu gün Azərbaycanın ən ucqar dağ rayonu Tiflisdən qat-qat gözəldir. Bütün rayonlarımızda yeni yollar, parklar salınıb. Bunlar əhaliyə xidmət deyilmi? Bunlar görülən işlər deyilmi? Ötən dövr ərzində əhalinin sosial rifahının yaxşılaşdırılması istiqamətində də ciddi addımlar atılıb. İpoteka kreditlərinin verilməsi, ünvanlı yardımların aztəminatlı ailələrə verilməsi, Sovet banklarında qalan əmanətlərin qaytarılması buna nümunədir. Dağlıq Qarabağ məsələsinə gəlincə, Azərbaycan prezidenti bu işdə dayanmadan çalışıb. Uğurlu nəticə olmaması isə dünyanın Azərbaycana qarşı ədalətsizliyinin nəticəsidir. Bu gün təəssüf ki, dünya birliyində işğalçı Ermənistanla, işğala məruz qalan Azərbaycana eyni münasibətin şahidiyik. Bu gün biz dayanmadan çalışırıq.
- Bunlar əsas verirmi ki, hakim partiyanın namizədi seçicilərlə birbaşa ünsiyyətə girməsin?
- Kim deyir ki, İlham Əliyev xalq qarşısına çıxmır. İlham Əliyev bayaq dediyim kimi bölgələrə davamlı səfərlər edir. Bu səfərlər bu gün də var, sabah da olacaq. Amma bu səfərləri xüsusi dəstək məqsədilə
edilmədiyini də bildirmək istəyirəm. Sadəcə olaraq, Azərbaycan prezidentinin təbliğatına ehtiyacı yoxdur. Ötən 10 il ərzində xalq üçün gördüyü işlər əsas verir ki, ona yenə də etimad göstəriləcək. Keçirilən rəy sorğuları da bunu deməyə əsas verir.
- Belə rəylər var ki, YAP-ın namizədi rəqabətsiz seçkinin qalibi olacaq? Çünki, qeyri-bərabər şərait, rəqiblərin sıxışdırılması və sair amillər ortadadır...
- Əvvəla, Azərbaycanda İlham Əliyevə rəqib olacaq lider yoxdur ki, onunla yarışda ən azı yaxınında belə dura bilsin. Bu bizim problem deyil ki, niyə başqaları İlham Əliyevdən qat-qat zəifdir. Sualınıza gəlincə, seçkilərdə hər kəsin öz kampaniyasını aparması üçün bütün şərait yaradılıb. Bu gün prezidentliyə namizədlərin sayı o qədər çoxdur ki, saymaq da olmur. Bu o deməkdir ki, nə siyasi iradə, nə də qanunlar bu iddiaya düşənlərə mane olmur. Heç bir rəqib sıxışdırılmır. Rüstəm İbrahimbəyovu nəzərdə tutusunuzsa, o özü zamanında məsələsini həll etmədi. Azərbaycan Konstitusiyasında ikili vətəndaşlığı olan şəxsin namizəd olması qadağan edilir.
- Yeri gəlmişkən, Milli Şura daxilində durumu necə qiymətləndirirsiniz?
- Milli Şura, onun vahid namizədi ilə bağlı bütün proqnozlar özünü doğrultdu. Hələ öncəki açıqlamalarımız zamanı belə bir fikri təkrar-təkrar vurğulamışdıq idi ki, bunlar vahid namizəd tapa bilməyəcəklər. Vahid namizəd məsələsində həmişə bunların mübahisəsi, vuruşması olacaq. Çünki Milli Şuradakıların ambisiyaları xalqın maraqlarından öndə gedir və radikal müxalifətin bədbəxtliyi də elə ondadır. Birinci, Rüstəm İbrahimbəyov məsələsi ilk gündən məlum idi ki, bu, sonu olmayan bir addımdır. Bunu başa düşməyən müxalifətə də indi dövlət etibar etmək olar? Bunu başa düşməyən adamlara ölkənin, xalqın taleyini etibar etmək olar? Bunu heç cür etmək olmaz. Biz o vaxtdan bilirdik ki, Rüstəm İbrahimbəyov məsələsi dəqiq deyil. Çünki Rüstəm İbrahimbəyov qorxaqdı. Özü deyirdi ki, gəlsəm, məni tutacaqlar, gəlmirəm və sair... Biz eyni zamanda bilirdik ki, Rüstəm İbrahimbəyov liderliyə, prezidentliyə namizəd ola bilməz və lider kimi də, dövlət başçısı kimi də bu adamın keyfiyyətləri yoxdur. Onu da ki, özü göstərdi, təsdiq etdi... Çünki o, Putinin ağzına baxan , o birisinin əlinə baxan adam idi. Cəmil Həsənliyə gəlincə, deyim ki, müxalifətin öz içərisindən tapdığı bir normal adam vardısa, o da elə Cəmil Həsənlidir. Biz hakim partiya olaraq, onunla müxalifətin namizədi kimi siyasi müstəvidə vuruşmağa həmişə hazırıq. Ancaq onun özü də bizim namizədin qarşısında olduqca zəifdir və seçkilərdə uduzaq. Qələbə yenə bizimlə, İlham Əliyevlə olacaq. Milli Şurada son günlər yaşananlar isə əvvəldən gözlənilən idi, proqnozlaşdırılırdı. Əslində burada gözlənilməz, qeyri-adi heç nə yoxdur. Burada hansısa proqnozlaşdırılmayan hadisə də baş verməyib. Hamı bilir ki, Lalə Şövkətlə İsa Qəmbər arasında münasibətlər hər zaman gərgin olub. Eyni zamanda, İsa Qəmbərə yaxınlığı ilə seçilən qəzet tez-tez Lalə şövkəti və onun lideri olduğu təşkilatı hədəf götürüb. Eynilə də Lalə Şövkətin qatı tərəfdarlarından olan Əvəz Temirxan daim Müsavata və onun liderinə qarşı sərt mövqeyi ilə seçilib. Yəni, Milli Şurada bir araya gəlmələrinə baxmayaraq, bu insanların sonadək bir yerdə olmayacağı, bir-birilərini hədəf alacağı da əvvəlcədən məlum. Eyni zamanda, çox qəribə və gülməlidir ki, bu təşkilatın hələ də sədri olan şəxs burada nələr baş verdiyindən xəbərsiz olduğunu öz açıqlaması ilə açıb göstərir və həmçinin Lalə Şövkətin tərəfindədir. Bu boyda da absurdluq, qeyri-ciddilik olar? İndi siz deyin, belə bir qeyri-ciddi
qurumdan, onu yaradan şəxslərdən, onun namizədindən nəsə gözləmək olarmı?
Pərviz Həşimli
