Müsavat Gənclər Təşkilatının sədri Tural Abbaslı avqustun 22-də 15 günlük məhbəs həyatından sonra sərbəst buraxıldı. O, Daxili İşlər Nazirliyinin Binəqədi müvəqqəti saxlama təcridxanasında saxlanılırdı. T.Abbaslının saat 14:00-da buraxılacağı deyilsə də onu vaxtından bir neçə saat tez evə göndərdilər. Təcridxanadan birbaşa evə gələn T.Abbaslını müsavatçı gənclər qarşıladılar. 15 günlük məhbəs həyatı haqda MGT sədri “Yeni Müsavat”a müsahibə verdi.

T.Abbaslı bir neçə dəfə Binəqədi təcridxanasında saxlanıldığını və bu dəfəki kimi problemlər yaşamadığını dedi: “Binəqədi təcridxanasında dəfələrlə saxlanılmışam. Ancaq bu dəfə həmin təcridxanada bir neçə problemlə üzləşdim. Əvvəl təcridxananın rəisi Nazim müəllim idi. İndiki rəisə nisbətən keçmiş rəis azdan-çoxdan qanunlara riayət edirdi. Təbii, onun dönəmində də problemlər var idi, ancaq nisbətən az idi. 15 günlük həbsimin ilk günündə rəisin qəbuluna getdim. Rəis öz kabinetində mənə bəzi suallar verdi. Sonra söhbətə əyləşib davam etmək istədim, buna rəis icazə vermədi. Mən də buna etiraz olaraq kabineti tərk etdim. Bundan sonra rəis mənə qarşı qərəzli davranmağa başladı. Hər gün mənə qeyri-qanuni tələblər irəli sürülürdü. Məsələn, ”çarpayıda oturma, uzanma, ancaq taxta stulda otura bilərsən" deyirdilər. Mən də dedim ki, elədirsə, onda daxili intizam qaydaları haqqında qanunu gətirin, mən də yerinə yetirim. Son günə qədər də təlimatlarla bağlı bilgi mənə təqdim olunmadı".

T.Abbaslı ən əsas problemlərdən birinin qidalanma ilə bağlı olduğunu dedi: “Bildiyiniz kimi, evdən gələn sovqatı təcridxana qəbul etmirdi. Özlərinin verdiyi qidanı da yemək mümkün deyil. Heç qidanın hardan, necə gəldiyi bilinmir. Belə müəssisələrdə adətən bir dəfəlik qablardan istifadə olunmalıdır. Təcridxanada yoluxucu xəstəliyə tutulmuş məhbuslar da var. Onların istifadə etdikləri qablar yuyucu vasitələrsiz yuyulur. Sonra da həmin boşqablardan digər dustaqlar da istifadə edir. Buna da etiraz etdim. Bildirdim ki, bu, bizim sağlamlığımız üçün təhlükəlidir”. 

T.Abbaslı deyir ki, kameralarda havalandırma sistemi də yoxdur, istidə orda qalmaq çox çətindir. Həmçinin çimməklə bağlı problemlərin olduğunu söylədi: “Normaya görə, orada həftədə bir dəfə çimmək olar. İsti su gəlmədiyi üçün soyuq sudan istifadə edirdik”. 

T.Abbaslı dedi ki, təcridxanada saxlanılan şəxsin kamerada qandallanması qanunsuzdur: “Bu, tamamilə qanunsuzdur. Bütün bunları rəisin kefinə görə həyata keçirirdilər. Bu da bütün normativlərə qarşıdır. Məni 5 gün 6 nəfərlik kamerada tək saxladılar. Əlimi arxadan qandallamışdılar. Bu halda iki saat ərzində heç nə edə bilmirdim. Orada da kimsə gəlib soruşmur ki, bəlkə su lazımdır”.

T.Abbaslı təcridxanada olarkən vəkili ilə görüşdə yaşanan problemdən da danışdı. Dedi ki, vəkillə ilk görüşdə yanlarında nəzarətçi olub: “Ombudsman məsələyə müdaxilə edəndən sonra mənim ailəmlə görüşüm baş tutdu. Ona da cəmi 10 dəqiqə vaxt verilirdi. Bu görüş də nəzarət altında olurdu”. 

T.Abbaslı Binəqədi təcridxanasını məşhur Quantanamo həbs düşərgəsi ilə müqayisə etdi: “Elə bil Quantanamo dustaqxanasıdır. Bir insanın özünə çay hazırlamaq belə imkanı yoxdur. Bunun üçün nəzarətçi çağırılmalıdır. Hər şeydən təcrid vəziyyətdə saxlayırlar. Bütün bunlar tam sıfırdan həll olunmalıdır. Heç bir standartlara cavab verilmir”.

Sonda anası Başxanım Abbaslı da oğlunun azadlığa çıxması ilə bağlı “Yeni Müsavat”a öz fikirlərini bildirdi: “Biz saat ikidə gözləyirdik ki, Turalı buraxsınlar. Saat 12-də buraxdılar. Özləri tez çıxardıblar ki, təcridxana önünə heç kəs gəlib səs-küy yaratmasın. Turala verilən cəzaya cavab olaraq biz mütləq apelyasiya, hətta Avropa Məhkəməsinə qədər gedəcəyik. Turala heç bir təlimat göstərilmədən ona öz xoşlarına görə cəza olaraq əlini qandallayırdılar. Tələb edirdilər ki, rəis içəri girəndə ayağa qalxmalısan. Tural da buna etiraz edirdi. Mən ora yazılı surətdə Turala sovqat verilməsi ilə bağlı müraciət etdim. Buna da icazə vermədilər. ATƏT-in nümayəndəsi Əliməmməd Nuriyev təcridxanaya getdi və oradakı çatışmazlıqlarla bağlı lazım olan instansiyalara məlumat verəcəyik. Təcridxananın rəisi dəyişib, yəqin yeni rəis yuxarılara yaxşı görünmək üçün belə özbaşınalıqlar edirdi”.

Xatırladaq ki, avqustun 7-də Nəsimi Rayon Məhkəməsi Müsavat Gənclər Təşkilatının sədri Tural Abbaslıya 15 sutka həbs cəzası verib. Bu qərar T.Abbaslının məhkəmə qərarını icra etmədiyinə görə çıxarılıb. Təşkilat sədri bu il yanvarın 12-də Bakıda əsgər ölümlərinə etiraz olaraq keçirilən aksiyada iştirakına görə 600 manat cərimələnib. Cəriməni ödəmədiyi üçün mayın 3-də məhkəmə onun 220 saat islah işləri ilə məşğul olmasına qərar verib. Amma Tural Abbaslı bu qərarı da icra etməyib.